دوستار، ماعان قاتىستى بولىپ جاتقان دۇنيەلەرگە ءشۇبا كەلىتىرىپ جاتقاندار دا بار ەكەنىن بايقاپ وتىرمىن. ياكي بۇل ءبىرىنشى رەت بولىپ جاتقان نارسە ەمەس، قۇتىلىپ شىعادى دەگەن جانە وزگە دە كوزقاراستار. جاۋاپ بەرەيىن.
بىرىنشىدەن، مەن قۇتىلىپ شىعۋدى قالامايمىن دا، قۇتىلىپ شىقپايمىن دا. مەن كوبىسى ويلاپ وتىرعانداي، كەلىسىمگە كەلۋگە نەمەسە قۇتىلىپ كەتۋگە جۇگىرىپ قۇلشىنىپ وتىرعانىم جوق، مەن تەك قانا ورگانداردىڭ ماعان قاتىستى ارەكەتتەرىنىڭ بارىنەن جۇرتشىلىقتى حاباردار ەتىپ وتىرمىن. ادام كەلىسىمگە كەلىپ، كەز كەلگەن ءىستىڭ ءىزىن سۋىتقىسى كەلسە، كەرىسىنشە، تىنىش وتىرادى. وسىنى ايتپاي-اق تۇسىنبەيسىز بە؟ كەز كەلگەن جەمقورلىق تىنىشتىقتى جاقسى كورەدى، ال مەن وعان قارسىمىن، سوندىقتان، مەن جاريالىلىق پەن اشىقتىقتى ۇستانامىن.
ەكىنشىدەن، مەن جورامال قاۋىپ تۋرالى ەمەس، قۇقىق قورعاۋ ورگاندارىنىڭ ءىس جۇزىندەگى ايقىن، تاپسىرىسپەن جاساپ وتىرعان ارەكەتتەرى تۋرالى جازىپ وتىرمىن. مەن قاراپايىم تەرگەۋ مەن تاپسىرىسپەن بولاتىن بوپسالاۋدىڭ اراجىگىن جاقسى تۇسىنەمىن جانە بىلەمىن.
ۇشىنشىدەن، مەنى نەگىزسىز قورعاۋدى سۇراپ وتىرعانىم جوق. مەن تەك قانا تەرگەۋ شەكتەن شىقپاسا دەيمىن، تەرگەۋ بارىنشا اشىق بولعانىن، سوت (ەگەر سوعان دەيىن بارسا) اشىق جانە جاريالى تۇردە بولعانىن قالايمىن.
تورتىنشىدەن، مەن جۇرتشىلىققا جۇگىنىپ وتىرعان سەبەبىم – مەن ەشقانداي دا زاڭعا قايشى ارەكەتتەر جاسامادىم، اقيقات پەن مورال مەنىڭ جاعىمدا. مەن نەگە ۇندەمەي وتىرۋىم كەرەك؟
بەسىنشىدەن، ءدال وسى جۇرتشىلىق مەنى شەكتەن شىعۋشىلىق پەن زاڭسىزدىقتان بىرنەشە رەت امان الىپ قالدى. ارقا سۇيەر باسقا كىمىم بار؟
التىنشىدان، مەن تۇرمەدە وتىرعىم كەلمەيدى، ەش كىنام بولماسا نەگە وتىرۋىم كەرەك. سوندىقتان، مەنى الدىن الا ويلاستىرىلعان سەبەپپەن جاۋاپقا تارتىپ، تۇرمەگە وتىرعىزۋى مۇمكىن قاۋىپ تونگەن كەزدە مەن بۇل تۋرالى ءاردايىم جازىپ وتىرامىن.
جانە جەتىنشىدەن، قۇرمەتتى مەنىڭ جاماندىق ويلاۋشىلارىم مەن ەشنارسەگە سەنبەۋشىلەرىم، سىزدەر مەن ءۇشىن كۇرەسەتىن بولساڭىز، مەن ءۇشىن ەمەس، ەلدە شەكتەن شىعۋشىلىق بولماۋى ءۇشىن، ەرتەڭگى كۇن ءسىزدىڭ دە بيزنەسىڭىزدى تۋرا وسىلاي باسىنباۋ ءۇشىن كۇرەسەسىز. مەن بيزنەسىمدى بىرنەشە رەت جوعالتقانمىن، قاجەت بولسا، تاعى دا جوعالتۋعا دايىنمىن، بىراق، مەن قوعامىمىز جاقسارا ءتۇسۋى ءۇشىن قولىمنان كەلگەنىن جاساۋعا تىرىسامىن. ەگەر ءسىز ولاي جاساعىڭىز كەلمەسە، مەنى وقىماڭىز، ءوز الەمىڭىزدە ءومىر سۇرە بەرىڭىز.
P.S. مۇمكىن ءسىز جىلدار بويى قۇرىپ، جيناقتاعان دۇنيەڭىزدى ەشقاشان جوعالتىپ كورمەگەن بولارسىز. سوزىمە سەنىڭىز، جىلداپ جاساعان ەڭبەگىڭىزدى جوعالتۋ وتە وتە اۋىر جانە ول كوڭىل قىنجىلتادى. سوندىقتان، ءوزىڭىز سىنعا ۇشىراماس ءۇشىن وزگەنى سىناماڭىز.
مارعۇلان سەيسەمبايدىڭ الەۋمەتتىك جەلىدەگى جازباسى
