جامبىل وبلىسى سورتوبە اۋىلىنىڭ تۇرعىندارى 27 جاستاعى مارات يۋنحۋ مەن ونىڭ 60 جاستاعى اكەسى ەرسمانە يۋنحۋعا اقساقالدى ۇرىپ-سوقتى دەگەن ايىپ تاعىلعان.
"جولدا بوگەت بولىپ تۇرعان مارات يۋنحۋدى كورگەن نۇرلان قۇداشباەۆ توقتاپ، كولىكتەن شىققان. مارات نۇرلانعا بالاعات سوزدەر ايتىپ، ماشينانىڭ الدىڭعى بامپەرىنەن بىرنەشە رەت تەپكەن. (...) مارات ەكى قولىمەن نۇرلاندى كيىمىنەن ۇستاپ، وزىنە قاراي تارتقان. سول كەزدە ماراتتىڭ ءىنىسى ولارعا جاقىنداپ، ءوزىنىڭ اعاسىن جانعا قاراي يتەرىپ جىبەردى. سودان كەيىن ول نۇرلانعا جاقىنداپ، ارت جاعىنان قۇشاقتاپ، ولاردى اجىراتۋ ءۇشىن باسقا جاققا سۇيرەي باستاعان", - دەلىنگەن ءىس ماتەريالىندا.
"مارات وسى ءساتتى پايدالانىپ، نۇرلاننىڭ بەتىنەن بىرنەشە رەت ۇرعان. نە بولىپ جاتقانىن كورگەن مارلەن ولارعا جاقىنداپ، اجىراتا باستايدى. الايدا مارات مارلەننىڭ بەتىنە ەكى رەت سوققى جاسايدى. سودان كەيىن توبەلەسكە تولەگەن قۇداشباەۆ ارالاسىپ، ولاردى اجىراتۋعا تىرىسادى. سول تۇستا ەرسمان كەلىپ، اقساقالدىڭ قابىرعا استىنان بالعامەن ۇرادى. مارات اكەسىنىڭ ارتىنان تولەگەن اتاعا جۇگىرىپ كەلىپ، ونىڭ ىشىنەن تەپكەن. كۋداشباەۆ اۆتوجولدىڭ شەتىنە قۇلادى، ونىڭ سانى سىنعان. اعايىندى قۇداشباەۆتار اكەسىنە كومەكتەسۋگە تىرىسقاندا، مارات مارلەننىڭ باسىنان تاسپەن ۇرعان.
يۋنحۋ مەن قۇداشباەۆتاردىڭ توبەلەسى
سوتتا مارات يۋنحۋ كىناسىن مويىندامادى.
"مەن نۇرلانى تىنىشتاندىرۋ ءۇشىن ونى سىلكىلەي باستادىم. سول كەزدە بىزگە مارلەن كەلىپ، جەلكەمنەن ۇردى، ال مەن مارلەننىڭ باسىنان بىرنەشە رەت ۇردىم. (...) تولەگەن قۇداشباەۆ كەلىپ، تاياعىن سىلتەي باستادى. سول كەزدە تولەگەن اتانى شىنتاعىممەن يتەرىپ جىبەرگەنمىن، ول قۇلاپ قالدى. ارتىنشا پوليتسەي كەلىپ، كولىككە وتىرعىزدى دا، پوليتسيا بولىمىنە جەتكىزدى. مارلەننىڭ باسىن تاسپەن ۇرعان جوقپىن", - دەدى ول سوتتا.
ونىڭ اكەسى ەرسمانە يۋنحۋ دا كىناسىن مويىنداعان جوق.
"تولەگەن قۇداشباەۆ تاياعىن سىلتەپ، بالالارىمنىڭ باسىنان ۇرا باستادى. ارتىنشا اقساقال جەردەن تاس الىپ، بالالارىما لاقتىرعىسى كەلدى، بىراق ءوزى قۇلاپ قالدى. مەن وعان كومەكتەسكىم كەلگەندە، نۇرلان مەن مارلەن جۇگىرىپ كەلىپ، تولەگەن اتاعا جاقىنداتپادى. قولىما بالعا بولعان جوق، قۇداشباەۆتى بالعامەن ۇرمادىم", - دەدى سوت ەرسمانە يۋنحۋ.
سوت ايىپتالۋشىلاردىڭ، جابىرلەنۋشىلەر مەن كۋاگەرلەردىڭ ايعاقتارىن تالداي وتىرىپ، ايىپتالۋشىلار مارات پەن ەرسمانە يۋنحۋلاردىڭ ايعاقتارىنا سىني كوزقاراسپەن قارادى جانە ولاردى قورعانىستىڭ تاڭداۋلى ءادىسى رەتىندە قاراستىردى. جابىرلەنۋشى قۇداشباەۆتاردىڭ ايعاقتارىنا قاتىستى سوت ونى "سوتقا دەيىنگى تەرگەۋ كەزىندە راستالعانىن، ولاردىڭ دايەكتى جانە تۇراقتى بولعانىن" ايتتى.
سوتتا نۇرلان قۇداشباەۆ ايىپتالۋشىلاردان مورالدىق شىعىن (1,5 ميلليون تەڭگە) ءوندىرىپ الۋدى سۇرادى. ونىڭ اعاسى مارلەن قۇداشباەۆ تا ءۇش ميلليون تەڭگەنى ءوندىرىپ الۋدى ءوتىندى، ويتكەنى ول كەلتىرىلگەن زالالدان "بۇگىنگە دەيىن كۇتىم قاجەت ەتەتىنىن" ايتتى. ولاردىڭ اكەسى تولەگەن قۇداشباەۆ ايىپتالۋشىلاردان ءتورت ميلليون تەڭگە ءوندىرىپ الۋدى سۇرادى، سەبەبى كەلتىرىلگەن زالالدان "ول وسى ۋاقىتقا دەيىن وزدىگىنەن جۇرە الماي، كۇتىم مەن ەمدەلۋدى قاجەت ەتەتىنىن" مالىمدەدى.
سوت ءىس ماتەريالدارىن تەكسەرگەن سوڭ سوڭ، مارات يۋنحۋدى ەكى جىل التى ايعا باس بوستاندىعىنان ايىردى، ول جازاسىن كۇشەيتىلگەن رەجيمدەگى مەكەمەدە وتكىزدى. ەرسمانە يۋنحۋ ەكى جىل التى ايعا باس بوستاندىعىنان شەكتەلدى. سوتتالعاندار تولەگەن قۇداشباەۆقا ەكى ميلليون تەڭگە، مارلەن مەن نۇرلانعا 500 مىڭ تەڭگەدەن تولەۋى كەرەك.
ەسكە سالايىق، وقيعا 5 اقپاندا سورتوبە اۋىلىندا بولعان. ءىىم مالىمەتى بويىنشا، قورداي اۋدانىندا بولعان جاپپاي توبەلەسكە وسى وقيعا سەبەپ بولعان.
قاقتىعىستا 11 ادام قازا تاۋىپ، 185 ادام زارداپ شەككەن، ونىڭ 34-ءى اۋرۋحاناعا جەتكىزىلگەن. وسى وقيعا سالدارىنان 39 تۇرعىن ءۇي، 20 كوممەرتسيالىق نىسان مەن 47 اۆتوكولىك ورتەنىپ كەتكەن.
