وقۋ-اعارتۋ ءمينيسترى عاني بەيسەمباەۆ قازاقستاندا وقۋ جىلىن 1 ماۋسىمعا دەيىن ۇزارتۋ ماسەلەسىنە قاتىستى تاعى دا ءوز پىكىرىن ءبىلدىردى، دەپ حابارلايدى "ادىرنا".
بەيسەمباەۆتىڭ ايتۋىنشا، بۇل ماسەلە ءالى اشىق كۇيىندە قالىپ وتىر، سەبەبى الدىمەن ينفراقۇرىلىمدى دايىنداۋ قاجەت.
«بۇل ماسەلە ءالى اشىق. ويتكەنى ەڭ الدىمەن ءبىلىم بەرۋ ۇيىمدارىنىڭ، ولاردىڭ ينفراقۇرىلىمىنىڭ بارلىعىن تالاپقا ساي كەلتىرۋىمىز كەرەك. وزدەرىڭىز بىلەسىزدەر، ەلىمىزدە ءالى دە مىڭنان استام مەكتەپ كۇردەلى جوندەۋدى، جاڭعىرتۋدى قاجەت ەتەدى. سوندىقتان بارلىق مەكتەپتى زاماناۋي وقۋ كابينەتتەرىمەن جابدىقتاۋ قاجەت»، – دەدى ۆەدومستۆو باسشىسى.
بەيسەمباەۆ بارلىق مەكتەپ ينفراقۇرىلىمدىق تۇرعىدان تولىق دايىن بولعان جاعدايدا عانا مۇنداي جاڭاشىلدىقتارعا قايتا ورالۋعا بولاتىنىن اتاپ ءوتتى.
ء«بىز ءارتۇرلى جاڭاشىلدىقتارعا ارقاشان ورالا الامىز، ەگەر ءبىلىم بەرۋ ۇيىمدارىنىڭ ءبارى 100% دايىن بولسا، ەڭ بولماسا ينفراقۇرىلىم جاعىنان. ينفراقۇرىلىمدىق دامۋ ماسەلەسى تولىق شەشىلمەيىنشە، بۇل تاقىرىپقا قايتا ورالمايمىز. بيىل مۇنداي وزگەرىس بولمايدى، بۇل – ناقتى»، – دەدى ول.
بۇعان دەيىن جاڭا وقۋ جىلىنىڭ كۇنتىزبەسى جاريالانعان بولاتىن. سوعان سايكەس وقۋشىلاردىڭ وقۋ جانە دەمالىس كەزەڭدەرى ايقىندالدى. وقۋ پروتسەسى 2025 جىلدىڭ 2 قىركۇيەگى باستالىپ، 2026 جىلدىڭ 25 مامىرىندا اياقتالادى.ء بىلىم كۇنىنە ارنالعان سالتاناتتى جيىننىڭ ۋاقىتى مەن كۇنى مەكتەپتىڭ پەداگوگيكالىق كەڭەسىنىڭ شەشىمىمەن بەلگىلەنەدى.
