وقۋ-اعارتۋ مينيسترلىگى پەداگوگتەردى اتتەستاتسيالاۋ تارتىبىنە بىرقاتار ماڭىزدى وزگەرىس ەنگىزدى، دەپ حابارلايدى "ادىرنا" ۇلتتىق پورتالى.
جاڭا جۇيە مۇعالىمدەردىڭ پاندىك تەست تاپسىرۋ تالابىن الىپ تاستاپ، باعالاۋدى پراكتيكالىق قىزمەت ناتيجەسىنە نەگىزدەۋدى كوزدەيدى.
مينيسترلىكتىڭ مالىمەتىنشە، ەندى مەكتەپتە جۇمىس ىستەپ جۇرگەن ۇستازدار اتتەستاتسيا كەزىندە پاندىك ءبىلىم بويىنشا تەست تاپسىرۋدان بوساتىلادى. بۇل شەشىم مەملەكەت باسشىسى قاسىم-جومارت توقاەۆتىڭ تاپسىرماسىمەن قابىلدانعان. الايدا تەستىلەۋ جۇيەسى پەداگوگيكالىق جوعارى وقۋ ورىندارىن جاڭا بىتىرگەن جاس ماماندار ءۇشىن ساقتالادى.
ۆەدومستۆو وكىلدەرىنىڭ ايتۋىنشا، بۇل تالاپ جاس مامانداردىڭ باستاپقى كاسىبي دەڭگەيىن راستاۋ ءۇشىن قاجەت.
مۇعالىمدەردىڭ بىلىكتىلىگى تەست ناتيجەسىمەن ەمەس، ولاردىڭ ناقتى كاسىبي قىزمەتى ارقىلى باعالانادى. اتتەستاتسيا ساناتتارعا بولىنگەن جۇيە بويىنشا جۇرگىزىلەدى. ەڭ جوعارى دەڭگەي – پەداگوگ-شەبەر ساناتى. بۇل ساناتقا ۇمىتكەرلەرگە ماگيستر نەمەسە PhD دارەجەسى، حالىقارالىق سەرتيفيكاتتار (IELTS, CELTA جانە ت.ب.), عىلىمي جاريالانىمدار، جىل سايىن اشىق ساباقتار وتكىزۋ جانە ارىپتەستەرگە تالىمگەرلىك جاساۋ سياقتى تالاپتار قويىلادى.
پەداگوگ-زەرتتەۋشى ساناتى ءۇشىن اشىق ساباقتار وتكىزۋ، عىلىمي ماقالالار جاريالاۋ نەمەسە وقۋ قۇرالدارىن ازىرلەۋ جانە ارىپتەستەرگە ادىستەمەلىك قولداۋ كورسەتۋ مىندەتتەلەدى.
پەداگوگ-ساراپشى دەڭگەيىندە مۇعالىمدەر اۋدان نەمەسە قالا دەڭگەيىندە تاجىريبە الماسىپ، سەمينارلار مەن كونفەرەنتسيالارعا قاتىسۋى جانە تالىمگەرلىك قىزمەت اتقارۋى قاجەت.
ال پەداگوگ-مودەراتور – بىلىكتىلىكتى ارتتىرۋدىڭ باستاپقى ساتىسى. بۇل دەڭگەيگە كەمىندە ەكى جىل ەڭبەك ءوتىلى بار مۇعالىمدەر (ماگيسترلەر ءۇشىن – 1 جىل) ءوتىنىش بەرە الادى.
سونداي-اق، وقۋ-اعارتۋ مينيسترلىگى پەداگوگتەردى اتتەستاتتاۋدىڭ جاڭا ەرەجەسىن ازىرلەۋ جۇمىسى جالعاسىپ جاتقانىن حابارلادى.
"قازىرگى ۋاقىتتا قۇجاتتىڭ جوباسى تالقىلاۋ جانە كەلىسۋ كەزەڭىندە.
