Oqu-aǧartu ministrı Ǧani Beisembaev Qazaqstanda oqu jylyn 1 mausymǧa deiın ūzartu mäselesıne qatysty taǧy da öz pıkırın bıldırdı, dep habarlaidy "Adyrna".
Beisembaevtyŋ aituynşa, būl mäsele älı aşyq küiınde qalyp otyr, sebebı aldymen infraqūrylymdy daiyndau qajet.
«Būl mäsele älı aşyq. Öitkenı eŋ aldymen bılım beru ūiymdarynyŋ, olardyŋ infraqūrylymynyŋ barlyǧyn talapqa sai keltıruımız kerek. Özderıŋız bılesızder, elımızde älı de myŋnan astam mektep kürdelı jöndeudı, jaŋǧyrtudy qajet etedı. Sondyqtan barlyq mekteptı zamanaui oqu kabinetterımen jabdyqtau qajet», – dedı vedomstvo basşysy.
Beisembaev barlyq mektep infraqūrylymdyq tūrǧydan tolyq daiyn bolǧan jaǧdaida ǧana mūndai jaŋaşyldyqtarǧa qaita oraluǧa bolatynyn atap öttı.
«Bız ärtürlı jaŋaşyldyqtarǧa ärqaşan orala alamyz, eger bılım beru ūiymdarynyŋ bärı 100% daiyn bolsa, eŋ bolmasa infraqūrylym jaǧynan. İnfraqūrylymdyq damu mäselesı tolyq şeşılmeiınşe, būl taqyrypqa qaita oralmaimyz. Biyl mūndai özgerıs bolmaidy, būl – naqty», – dedı ol.
Būǧan deiın jaŋa oqu jylynyŋ küntızbesı jariialanǧan bolatyn. Soǧan säikes oquşylardyŋ oqu jäne demalys kezeŋderı aiqyndaldy. Oqu prosesı 2025 jyldyŋ 2 qyrküiegı bastalyp, 2026 jyldyŋ 25 mamyrynda aiaqtalady. Bılım künıne arnalǧan saltanatty jiynnyŋ uaqyty men künı mekteptıŋ pedagogikalyq keŋesınıŋ şeşımımen belgılenedı.
