بۇگىن قازاق جۋرناليستيكاسىنىڭ ساڭلاعى، قازاق سپورت جۋرناليستيكاسىنىڭ نەگىزىن قالاۋشى سەيداحمەت بەردىقۇلوۆتىڭ تۋعان كۇنى. سەيداعاڭنىڭ ەسىم-سويىن سپورتسۇيەر قاۋىم جاقسى بىلەدى. "ارباعان مەنى ءبىر سيقىر", "جۇمىر جەردە تەڭبىل دوپ" كىتاپتارى ارقىلى وقىرمان فۋتبولعا بىرگە بارىپ كەلگەندەي كۇي كەشكەنىن اعالارىمىز تالاي ايتىپ وتىراتىن. تۇمانباي مولداعاليەۆتىڭ دوسى سەيداحمەتكە جازعان ولەڭىن ۇسىنامىز.
تۇمانباي مولداعاليەۆ. فۋتبول كەلدى
جوقتاۋشىسى، جاقتاۋشىسى فۋتبولدىڭ،
ءبىلىنىپ تۇر بۇل شاقتارى كۇندە ورنىڭ.
سەزىمى از سەمىزدىكتى قالاماي،
سەرگەكتىكپەن سەركە بوپ سەن كۇن كوردىڭ.
سول فۋتبولدان جارىس تاعى باستالدى،
فۋتبول دەگەن ءبىر ءسوز بيلەپ اسپاندى.
ەستىرتپەيدى باسقا ءسوزدىڭ بارلىعىن،
باسقا سوزدەر ماعىناسىز بوس قالدى.
سەن دە وسى ءبىر تەڭبىل دوپ قۋالاپ،
دودالاردا دوپپەن بىرگە دومالاپ،
ءوتىپ ەدىڭ ار جاعىنا مۇحيتتىڭ،
جۇرت ويلادى: «نەعىپ ءجۇر، – دەپ، – بۇل اراب؟!».
فۋتبول جايلى جىر جازاتىن سول اراب،
شەبەرلەردىڭ شەكسىزدىگىن باعالاپ.
وتانداستىڭ ەپسىزىنە كۇيىنىپ،
ءوشىپ قالىپ، ءجۇرۋشى ەدى جانا قاپ.
ىشكەن اسىن جەرگە قويعان دوپ دەسە،
ارامىزدا سول ءبىر قازاق جوق، باسە...
ۇندەمەيدى ۇڭىرەيىپ الماتى،
ءبىر اعايىن شىعار ەدى ايتپەسە.
جەتكىزبەيتىن ارمانى كوپ اڭساعان،
باقىتتى عوي يگىلىككە جانسا جان.
قازاقتاردان ءبىر كوماندا قۇرىپ اپ،
ترەنەر بوپ كەتسەم دەۋشى ەڭ سەن سوعان.
نامىس ۇلى، نار نامىستىڭ بالاسى،
باستالدى عوي فۋتبولشىلار دوداسى.
ۇيقى كورمەي جۇرەتىن بۇل كەزىڭدە،
نەعىپ ءۇنسىز ۇيىقتاپ جاتسىڭ، اعاسى؟!
ەڭ بولماسا وسىناۋ ءبىر دودانى،
كورىپ كەتسەڭ، كوڭىلگە دەم و داعى.
بولمايتىنعا بولار ەدى كىم قارسى،
الدىنا ساپ الىپ كەتسە جول ءارى.
سەيداحمەت، سەكەم مەنىڭ، سەيدەشىم،
كوپ كيۋشى ەڭ فۋتبولشىنىڭ جەيدەسىن.
ايتقاندارىن اقتارۋشى ەڭ قازاقشا،
پەلەمەنەن يسپانشا ءبىر سويلەسىپ.
كەتپەي قويدى كوز الدىمنان ءبىر الاۋ،
سەزىم باردا سونبەي جەلگە تۇرار-اۋ!
الماتىدا كورىنبەيسىڭ، چيكاگو
سەن كەلەر دەپ كۇتىنگەن دە شىعار-اۋ!
سەكەم، سەكەم... سەيىلمەيتىن سەنىمىم،
بىزدەن الىس كەتتى-اۋ الىپ سەنى كۇن.
اشىلماستان قالدى-اۋ سەنىڭ ارالىڭ،
باسىلماستان قالدى-اۋ اراي جەلىگىڭ.
جىگىت قاندا، ءۇمىت باردا ولمەيسىڭ،
اجال ءيتتىڭ ايتقانىنا كونبەيسىڭ.
فۋتبول كەلدى، سەنىڭ اسەم فۋتبولىڭ،
الاسۇرىپ نەگە تۇرەگەلمەيسىڭ؟!
اسپان انە، جۇلدىزى وشپەي، اي تونگەن،
ءۇمىت اناۋ سەمىپ بارىپ، قايتا ونگەن.
سول فۋتبولدى كورۋ سەنىڭ كوزىڭمەن،
مەن بايعۇسقا بۇيىرمادى، قايتەم مەن؟
اقىنمىن با مەن اڭىزعا سەنبەسەم،
تارىلعانداي بولدى-اۋ بۇگىن كەڭ كوشەم.
فۋتبول دەگەن قۇدىرەتتى كوتەرىپ،
جاس عاسىرمەن بىرگە كەلەسىڭ بە سەن؟!
