Búgin qazaq jýrnalıstıkasynyń sańlaǵy, qazaq sport jýrnalıstıkasynyń negizin qalaýshy Seıdahmet Berdiqulovtyń týǵan kúni. Seıdaǵańnyń esim-soıyn sportsúıer qaýym jaqsy biledi. "Arbaǵan meni bir sıqyr", "Jumyr jerde teńbil dop" kitaptary arqyly oqyrman fýtbolǵa birge baryp kelgendeı kúı keshkenin aǵalarymyz talaı aıtyp otyratyn. Tumanbaı Moldaǵalıevtiń dosy Seıdahmetke jazǵan óleńin usynamyz.
Tumanbaı Moldaǵalıev. Fýtbol keldi
Joqtaýshysy, jaqtaýshysy fýtboldyń,
Bilinip tur bul shaqtary kúnde ornyń.
Sezimi az semizdikti qalamaı,
Sergektikpen serke bop sen kún kórdiń.
Sol fýtboldan jarys taǵy bastaldy,
Fýtbol degen bir sóz bılep aspandy.
Estirtpeıdi basqa sózdiń barlyǵyn,
Basqa sózder maǵynasyz bos qaldy.
Sen de osy bir teńbil dop qýalap,
Dodalarda doppen birge domalap,
Ótip ediń ar jaǵyna muhıttyń,
Jurt oılady: «Neǵyp júr, – dep, – bul arab?!».
Fýtbol jaıly jyr jazatyn sol arab,
Sheberlerdiń sheksizdigin baǵalap.
Otandastyń epsizine kúıinip,
Óship qalyp, júrýshi edi jana qap.
Ishken asyn jerge qoıǵan dop dese,
Aramyzda sol bir qazaq joq, báse...
Úndemeıdi úńireıip Almaty,
Bir aǵaıyn shyǵar edi áıtpese.
Jetkizbeıtin armany kóp ańsaǵan,
Baqytty ǵoı ıgilikke jansa jan.
Qazaqtardan bir komanda quryp ap,
Trener bop ketsem deýshi eń sen soǵan.
Namys uly, nar namystyń balasy,
Bastaldy ǵoı fýtbolshylar dodasy.
Uıqy kórmeı júretin bul kezińde,
Neǵyp únsiz uıyqtap jatsyń, aǵasy?!
Eń bolmasa osynaý bir dodany,
Kórip ketseń, kóńilge dem o daǵy.
Bolmaıtynǵa bolar edi kim qarsy,
Aldyna sap alyp ketse jol ári.
Seıdahmet, Sekem meniń, Seıdeshim,
Kóp kııýshi eń fýtbolshynyń jeıdesin.
Aıtqandaryn aqtarýshy eń qazaqsha,
Pelemenen ıspansha bir sóılesip.
Ketpeı qoıdy kóz aldymnan bir alaý,
Sezim barda sónbeı jelge turar-aý!
Almatyda kórinbeısiń, Chıkago
Sen keler dep kútingen de shyǵar-aý!
Sekem, Sekem... seıilmeıtin senimim,
Bizden alys ketti-aý alyp seni kún.
Ashylmastan qaldy-aý seniń aralyń,
Basylmastan qaldy-aý araı jeligiń.
Jigit qanda, úmit barda ólmeısiń,
Ajal ıttiń aıtqanyna kónbeısiń.
Fýtbol keldi, seniń ásem fýtbolyń,
Alasuryp nege túregelmeısiń?!
Aspan áne, juldyzy óshpeı, Aı tóngen,
Úmit anaý semip baryp, qaıta óngen.
Sol fýtboldy kórý seniń kózińmen,
Men baıǵusqa buıyrmady, qaıtem men?
Aqynmyn ba men ańyzǵa senbesem,
Tarylǵandaı boldy-aý búgin keń kóshem.
Fýtbol degen qudiretti kóterip,
Jas ǵasyrmen birge kelesiń be sen?!
