وزبەكستان سىرتقى ىستەر مينيسترلىگى رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆانىڭ مەملەكەتتىك تىلدە ءىس جۇرگىزۋ تۋرالى وزبەكستان زاڭ جوباسى جايلى سوزىنە بايلانىستى مالىمدەمە جاسادى.
مالىمدەمەدە زاحاروۆانىڭ اتى-ءجونى اتالماعان، بىراق "كەيبىر شەتەلدىك شەنەۋنىكتەر" دەگەن سوزدەن كىمدى مەڭزەيتىنى بايقالعان.
وتكەن اپتادا رەسەي سىرتقى ىستەر مينيسترلىگىنىڭ رەسمي وكىلى "وزبەكستاننىڭ جاڭا زاڭ جوباسىن قولدايتىندار ازشىلىق" دەپ سانايتىنىن بىلدىرگەن.
زاحاروۆانىڭ ءسوزى "وزبەكستاننىڭ ىشكى ىسىنە ارالاسۋ" رەتىندە باعالانعان.
وزبەكستان سىرتقى ىستەر مينيسترلىگى "مەملەكەتتىك ءتىلدى رەتتەۋ ماسەلەلەرى مەملەكەتتىڭ ىشكى ءىسى بولىپ سانالادى، وعان ارالاسۋعا جول بەرىلمەيدى" دەپ مالىمدەدى جانە 1995 جىلى قابىلدانعان "مەملەكەتتىك ءتىل تۋرالى" وزبەكستان زاڭىنىڭ 9-بابىنا ساي مەملەكەتتىك بيلىك ورگاندارىنىڭ جۇمىسى مەملەكەتتىك تىلدە جۇرگىزىلەتىنىن ەسكە سالدى.
تاياۋدا "وزبەكستان رەسپۋبليكاسىنىڭ اكىمشىلىك جاۋاپكەرشىلىك كودەكسىنىڭ 42-بابىنا وزگەرىستەر ەنگىزۋ تۋرالى" زاڭ جوباسى قوعام تالقىلاۋىنا شىعارىلعان. جوبادا مەملەكەتتتىك ورگاندار مەن مەكەمەلەر جۇمىسىندا مەملەكەتتىك ءتىل تۋرالى زاڭ تالاپتارى ساقتالماسا، جاۋاپتى لاۋازىمدى تۇلعالارعا 446 مىڭنان 1,1 ميلليون سۋمعا دەيىن ($44-108) ايىپپۇل سالۋ ماسەلەسى قاراستىرىلعان.
زاڭ تالقىلاۋعا شىعارىلعاننان كەيىن وزبەكستان ادىلەت مينيسترلىگىنىڭ ءباسپاسوز حاتشىسى سەۆارا ۋرينباەۆا "رەسەيدىڭ كەي اقپارات قۇرالدارى مەن وزبەكستانداعى كەيبىر ورىس ءتىلدى سايتتاردى مينيسترلىك ۇسىنعان زاڭ جوباسىن بۇرمالاپ ءتۇسىندىردى" دەگەن بولاتىن.
سەۆارا ۋرينباەۆانىڭ سوزىنشە، بۇل باستامانىڭ تەك قانا مەملەكەتتىك ورگاندارعا قاتىسى بار، ودان ەشكىمنىڭ قۇقىعىنا نۇقسان كەلمەيدى، وزبەكستاندا تۇراتىن ازاماتتارعا وزگە تىلدە سويلەگەنى ءۇشىن ايىپپۇل سالىنبايدى.
