Ózbekstan Reseı SIM ókiliniń sózine baılanysty málimdeme jasady

3035
Adyrna.kz Telegram

Ózbekstan syrtqy ister mınıstrligi Reseı syrtqy ister mınıstrliginiń resmı ókili Marııa Zaharovanyń memlekettik tilde is júrgizý týraly Ózbekstan zań jobasy jaıly sózine baılanysty málimdeme jasady.

Málimdemede Zaharovanyń aty-jóni atalmaǵan, biraq "keıbir sheteldik sheneýnikter" degen sózden kimdi meńzeıtini baıqalǵan.

Ótken aptada Reseı syrtqy ister mınıstrliginiń resmı ókili "Ózbekstannyń jańa zań jobasyn qoldaıtyndar azshylyq" dep sanaıtynyn bildirgen.

Zaharovanyń sózi "Ózbekstannyń ishki isine aralasý" retinde baǵalanǵan.

Ózbekstan syrtqy ister mınıstrligi "memlekettik tildi retteý máseleleri memlekettiń ishki isi bolyp sanalady, oǵan aralasýǵa jol berilmeıdi" dep málimdedi jáne 1995 jyly qabyldanǵan "Memlekettik til týraly" Ózbekstan zańynyń 9-babyna saı memlekettik bılik organdarynyń jumysy memlekettik tilde júrgiziletinin eske saldy.

Taıaýda "Ózbekstan Respýblıkasynyń Ákimshilik jaýapkershilik kodeksiniń 42-babyna ózgerister engizý týraly" zań jobasy qoǵam talqylaýyna shyǵarylǵan. Jobada memleketttik organdar men mekemeler jumysynda memlekettik til týraly zań talaptary saqtalmasa, jaýapty laýazymdy tulǵalarǵa 446 myńnan 1,1 mıllıon sýmǵa deıin ($44-108) aıyppul salý máselesi qarastyrylǵan.

Zań talqylaýǵa shyǵarylǵannan keıin Ózbekstan ádilet mınıstrliginiń baspasóz hatshysy Sevara Ýrınbaeva "Reseıdiń keı aqparat quraldary men Ózbekstandaǵy keıbir orys tildi saıttardy mınıstrlik usynǵan zań jobasyn burmalap túsindirdi" degen bolatyn.

Sevara Ýrınbaevanyń sózinshe, bul bastamanyń tek qana memlekettik organdarǵa qatysy bar, odan eshkimniń quqyǵyna nuqsan kelmeıdi, Ózbekstanda turatyn azamattarǵa ózge tilde sóılegeni úshin aıyppul salynbaıdy.

centralasian.org

Pikirler