پاۆلودار وبلىسى، قالقامان اۋىلىنىڭ تۇرعىندارى جالعىز جايىلىمنىڭ كاسىپكەرلەرگە بەرىلىپ، مال جاياتىن جەر قالماعانىن ايتىپ، اكىمدىككە سيىر تابىنىن ايداپ اكەلگەن. اشۋلى تۇرعىندار نارازىلىق اكتسياسىن وسىلاي ۇيىمداستىرۋدان باسقا امالدارى قالماعانىن ايتادى. بۇل تۋرالى كتك ارناسى حابارلادى.
اۋىل تۇرعىندارىنىڭ ايتۋىنشا، جىلدار بويى مال جايىپ جۇرگەن جالعىز جايىلىمدى اۋماققا قازىر اياق باسۋ مۇمكىن بولماي تۇر. سەبەبى، ول جەرگە جەرگىلىكتى كاسىپكەرلەردىڭ ءبىرى باۋ-باقشا ەگىپ تاستاعان. مالدى قولعا ۇستاۋ قىمباتقا تۇسەدى.
"ال، سيىرلار، جايىلىڭىزدار! سەندەرگە جەر جوق، سەندەردىڭ اتتاپ شىعاتىن جەرلەرىڭنىڭ ءبارىن الىپ قويعان! ەندى ەرتەڭنەن باستاپ وسىندا جايىلىپ قايتاسىڭدار!" - دەيدى اشىنعان اقساقال.
سيىرلار جەرگىلىكتى جەردەگى قوقىس الاڭىندا جايىلىپ، سول جەردە قالدىقتارمەن ۋلانىپ، ءسۇتىن جوعالتادى ەكەن. بۇرىن اۋىلدا 200-دەن استام سيىر بولعان، قازىر مال باسى ءۇش ەسەگە ازايىپ كەتكەن.
"500 مىڭ تەڭگە الىپ ەكى سيىر العان ادامدار بار. ەندى سول مالدى وسىرەتىن مۇمكىنشىلىك كەلتىرمەي وتىر. قالقامانعا ءبىر اكىم كەلەدى. سوزبەن "جوندەيمىز-جوندەيمىز" دەپ شىعارىپ سالادى. مال باعاتىن جەر جوق", - دەيدى اۋىل تۇرعىندارىنىڭ ءبىرى.
بىرنەشە كۇن بۇرىن ءبىر اۋىل تۇرعىنىنا ونىڭ سيىرى مەكتەپ اۋلاسىنداعى گۇلدى جەگەنى ءۇشىن مال يەسىنە 50 مىڭ تەڭگە ايىپپۇل سالىنعان.
ال اكىمدىكتەگىلەر جاعداي جانجال شىعاراتىنداي ەمەس، تەك 50 گەكتار جەر جالعا بەرىلگەنىن، قالعان جەردىڭ ءبارى بوس جاتقانىن، ءارى زاڭدى بەرىلگەنىن ايتۋدا.
"جايىلىم بويىنشا ماسەلە جوق، جالعىز ماسەلە – سۋارۋ. سۋارۋ كەزىندە بارلىق مال وسى اتىز ارقىلى جۇرەدى. ەندى ءبىز الداعى ءبىر اپتا ىشىندە كاسىپكەرلەرگە ءوز اۋماعىن قورشاۋدى ۇسىنامىز", – دەدى قالقامان اۋىلىنىڭ اكىمى نۇربۇلان مۇسابەكوۆ.
جەرگىلىكتى تۇرعىندار ەسكى جايىلىمدى قايتارۋدى تالاپ ەتتى. ولاي بولماعان جاعدايدا سيىرلاردى كۇن سايىن اكىمشىلىككە قاراي ايدايتىندارىن ايتىپ وتىر.
"ادىرنا" ۇلتتىق پورتالى
