دۇنيەجۇزىلىك دەنساۋلىق ساقتاۋ ۇيىمى (ددسۇ) الەمدە ءبىر كۇندە 106 مىڭنان استام ادامنان كوروناۆيرۋس تابىلعانىن حابارلادى. بۇل - بۇرىن-سوڭدى بولماعان ەڭ جوعارى كورسەتكىش.
الەمدە ۆيرۋس جۇقتىرعاندار 5 ميلليون ادامعا جۋىقتادى. 325 مىڭنان استام ادام كوروناۆيرۋستان قايتىس بولعان.
ەۋروپا ەلدەرى ىندەتتىڭ بەتى قايتقانىن حابارلاپ، شەكتەۋ شارالارىن بىرتىندەپ جۇمسارتسا، دامۋشى ەلدەردە ۆيرۋس ورشىگەن.
ددسۇ-نىڭ مالىمەتى بويىنشا، لاتىن امەريكا ەلدەرى، ءۇندىستان جانە وزگە ايماقتاردا ينفەكتسيا جىلدام تاراپ، تەستتەر ءجيى جۇرگىزىلە باستاعان.
"پاندەميا ءالى ۇزاققا سوزىلادى. ءبىز تابىسى ورتاشا جانە تومەن ەلدەردە كوروناۆيرۋس جۇقتىرعانداردىڭ ارتۋىنا الاڭداپ وتىرمىز" دەدى دۇنيەجۇزىلىك دەنساۋلىق ساقتاۋ ۇيىمىنىڭ جەتەكشىسى تەدروس گەبرەيەسۋس.
برازيليادا كوروناۆيرۋستان قايتىس بولعاندار سانى ارتىپ، 18 مىڭنان اسقان. لاتىن امەريكاداعى ەڭ ءىرى ەل الەمدە كوروناۆيرۋس جۇقتىرعاندار سانى (275 مىڭ ادام) بويىنشا ءۇشىنشى ورىنعا شىقتى. ءۇندىستاندا ءبىر كۇندە 100 مىڭنان استام تەست جۇرگىزىلىپ، ءبىر كۇندە 5 611 ادامنان كوروناۆيرۋس تابىلدى.
