وزبەكستاننىڭ كونستيتۋتسيالىق سوتىندا سوت وتىرىستارىنا ونلاين قاتىسۋ مۇمكىندىگىن ەنگىزۋ مەن تىكەلەي ترانسلياتسيالار جۇرگىزۋ جوسپارلانىپ وتىر. بۇل تۋرالى ەل پرەزيدەنتىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
اتالعان ۇسىنىستار 17 جەلتوقساندا مەملەكەت باسشىسى شاۆكات ميرزيوەۆكە تانىستىرىلعان. شەنەۋنىكتەر كونستيتۋتسيالىق سوت قىزمەتىن تسيفرلاندىرۋ ماسەلەسىنە ەرەكشە نازار اۋدارعان. ايتۋلارىنشا، تسيفرلىق شەشىمدەر – سوتتىڭ الداعى دامۋىنىڭ نەگىزگى باعىتتارىنىڭ ءبىرى. اتاپ ايتقاندا، ازاماتتار مەن كاسىپكەرلەردىڭ وتىنىشتەرىن قاراۋ راسىمدەرىن جەڭىلدەتۋ جانە ولاردى قاراۋ مەرزىمىن جەدەلدەتۋ كوزدەلىپ وتىر.
سونداي-اق كونستيتۋتسيالىق شاعىم ينستيتۋتىنىڭ تيىمدىلىگىن ارتتىرۋ شارالارىتالقىلاندى. ۇسىنىسقا سايكەس، سوت قولدانعان زاڭ كونستيتۋتسياعا سايكەس ەمەس دەپ تانىلعان جاعدايدا، بۇل سوت شەشىمىن قايتا قاراۋعا نەگىز بولادى.
ايتا كەتەيىك، وزبەكستاندا ءارتۇرلى دەڭگەيدەگى سوت وتىرىستارى جوعارعى سوت جۇيەسى ارقىلى ونلاين رەجيمدە كورسەتىلەدى. سونىمەن قاتار پروتسەستەرگە بەينەبايلانىس ارقىلى قاتىسۋ مۇمكىندىگى بار. ول ءۇشىن ارنايى باعدارلامالىق قامتاماسىز ەتۋدى جۇكتەپ، سوت الدىن الا ۇسىنعان لوگين مەن قۇپياسوز ارقىلى جۇيەگە تىركەلۋ قاجەت.
