اقوردانىڭ ءباسپاسوز قىزمەتى بەرگەن اقپاراتقا ساي، اۋەجايدا مارتەبەلى مەيماندى سالتاناتپەن، قۇرمەت قاراۋىلمەن قارسى العان.
مەملەكەت باسشىسىن پرەزيدەنت شاۆكات ميرزيوەۆ قارسى الدى. پرەزيدەنتتىڭ وزبەكستانعا ساپارى باعدارلاماسىنا مەملەكەت باسشىلارىنىڭ جەكە كەزدەسۋلەرى جانە قازاقستان مەن وزبەكستاننىڭ جوعارعى مەملەكەتارالىق كەڭەسىنىڭ وتىرىسىنا قاتىسۋى كىرەدى.
پرەزيدەنت توقاەۆ وزبەكستان باسشىسى شاۆكات ميرزيوەۆتىڭ شاقىرۋىمەن مەملەكەتتىك ساپارمەن كەلگەننەن كەيىن، تاشكەنت-حۋمو حالىقارالىق اۋەجايىندا ەكى مەملەكەت جەتەكشىلەرىنىڭ كەزدەسۋى ءوتتى.
كوشباسشىلار قازاق-وزبەك ستراتەگيالىق سەرىكتەستىگى مەن وداقتاستىقتى ودان ءارى تەرەڭدەتۋ بويىنشا پىكىر الماسقان.
ساپار باعدارلاماسىنا سايكەس، ەرتەڭ، 15 قاراشادا جوعارى دەڭگەيدەگى كەلىسسوزدەر جانە جوعارى مەملەكەتارالىق كەڭەستىڭ ەكىنشى وتىرىسى وتەدى.
كەزدەسۋلەر بارىسىندا بىرلەسكەن اۋقىمدى جوبالاردى ىسكە قوسۋ جانە ەكىجاقتى قۇجاتتاردىڭ ماڭىزدى پاكەتىنە قول قويۋ كۇتىلۋدە.
قازاقستان پرەزيدەنتى بۇدان الدىن مەملەكەتتىك ساپارمەن ماسكەۋگە بارعان. ونىڭ الدىندا ەكى ەل پرەزيدەنتى دە جۇمىس ساپارىمەن اقش-تا بولىپ، امەريكا باسشىسىمەن كەزدەسكەن.
