مەملەكەت باسشىسى قاسىم-جومارت توقاەۆ شەتەلدىكتەرگە اۋىل شارۋاشىلىعى جەرلەرىن ساتۋعا جانە جالعا بەرۋگە زاڭ جۇزىندە ءبىرجولا تىيىم سالۋدى تاپسىردى، دەپ حابارلايدى "ادىرنا" ۇلتتىق پورتالى Sputnik قازاقستان سايتىنا سىلتەمە جاساپ.
حالقىمىز ءۇشىن جەر ماسەلەسى قاشاندا اسا ماڭىزدى ەكەنىن اتاپ وتكەن مەملەكەت باسشىسى جەر – مەملەكەتتىگىمىزدىڭ بەرىك نەگىزى ءارى قاسيەتتى سيمۆولى ەكەنىن اتاپ ءوتتى.
«قازاقتىڭ جەرى شەتەلدىكتەرگە ساتىلمايدى دەپ بىرنەشە رەت ايتتىم. بۇل ماسەلەگە قاتىستى قاۋەسەتتەردى توقتاتۋ قاجەت. سوندىقتان، مەن مىناداي ناقتى شەشىمدەر قابىلدادىم. بىرىنشىدەن، شەتەلدىكتەرگە جانە شەتەلدىك زاڭدى تۇلعالارعا اۋىل شارۋاشىلىعى جەرلەرىن ساتۋعا، جالعا بەرۋگە زاڭ جۇزىندە ءبىرجولا تىيىم سالۋدى تاپسىرامىن. بۇل شەتەلدىكتەردىڭ ۇلەسى بار زاڭدى تۇلعالارعا دا قاتىستى»، – دەدى توقاەۆ ۇلتتىق قوعامدىق سەنىم كەڭەسىنىڭ بەسىنشى وتىرىسىندا.
ول مۇنى پرەزيدەنتتىڭ زاڭ شىعارۋ باستاماسى ارقىلى جەدەل تۇردە جۇزەگە اسىرۋ قاجەت ەكەنىن ايتتى. پرەزيدەنت اكىمشىلىگى ءدال وسى ماسەلەگە بايلانىستى ءتيىستى زاڭ جوباسىن ازىرلەۋى كەرەك.
سونىمەن قاتار، توقاەۆ ءبىر اي ىشىندە جەر رەفورماسى جونىندەگى كوميسسيانى قۇرىپ، 25 ناۋرىزدا جۇمىسقا كىرىسۋدى تاپسىردى. ول كوميسسيا قۇرامىنا اگرارلىق سەكتوردىڭ بەدەلدى وكىلدەرى مەن جەر ماسەلەسىن جەتىك بىلەتىن ساراپشىلاردى قوسۋ كەرەك، دەپ سانايتىنىن جەتكىزدى.
بۇدان بولەك، ۇكىمەتكە بيىل تامىز ايىنىڭ سوڭىنا دەيىن جەر رەفورماسىنىڭ نەگىزگى ماسەلەلەرى بويىنشا ورتاق مامىلە ارقىلى تۇبەگەيلى بايلام جاساۋدى جۇكتەدى.
پرەزيدەنتتىڭ ايتۋىنشا، كوميسسيا جۇمىسىنىڭ ءاربىر كەزەڭى مەن وندا ۇسىنىلعان شارالار تۋرالى حالىقتى ۇنەمى حاباردار ەتىپ وتىرۋ قاجەت.
«باستى مىندەتتىڭ ءبىرى – كوميسسيا جۇمىسى مەن شەشىم قابىلداۋىنىڭ مەيلىنشە اشىقتىعىن كورسەتۋ. ءبىز جەرگە قاتىستى قوعام تاراپىنان كوتەرىلگەن بارلىق ماسەلەنى دۇرىس جانە ءتيىمدى شەشە الامىز دەپ سەنەمىن. بۇل شەشىمدەر، ەڭ الدىمەن، ەل ەكونوميكاسىن دامىتۋعا جانە ازاماتتاردىڭ جۇمىس ساپاسىن ارتتىرۋعا ارنالعان. ەڭ باستىسى، جەر شەتەلدىكتەرگە ساتىلمايتىنى تۋرالى تۇبەگەيلى شەشىم قابىلداندى»، – دەدى توقاەۆ.
