قازاقستاندىق بيزنەسمەندەر كرەديتىن تولەي الماي وتىر. 2,5 مىڭ جەكە كاسىپكەر تج رەجيمى مەن كارانتينگە بايلانىستى تولەم ۋاقىتىن كەشىكتىرگەن، - دەپ حابارلايدى كتك تەلەارناسى.
ءبىرىنشى كرەديتتىك بيۋرو مالىمەتىنشە، سۇلۋلىق سالون يەلەرى، قىزمەت كورسەتۋ سالاسىنداعى جۇمىسشىلار، سونداي-اق، ساۋنالار مەن ماسساج سالوندارى قارىزعا بەلشەدەن باتقان. جالپى قارىز 147 ميلليون تەڭگەگە جەتكەن.
جاڭا باپ، ساراپشىلاردىڭ پىكىرىنشە، جۇمىستان بوساتۋ تولقىنىن تۋدىرۋى مۇمكىن دەيدى.
"16 ناۋرىزدان باستاپ الماتىدا قوعامدىق تاماقتانۋ سالاسى جۇمىس ىستەمەيدى. بۇگىندە كاسىپكەرلەرىمىز ساتىلىم جوعالىپ، تابىس تۇسپەي، 12 مامىردان باستاپ جۇمىسشىلارىنا ەڭ تومەنگى جالاقى تولەۋگە ءماجبۇر. بۇل، ارينە، كەلىسىمشارتتاردى بۇزۋعا اكەپ سوعادى. جەرگىلىكتى دەڭگەيدەگى وڭىرلىك پالاتا رەسپۋبليكالىق دەڭگەيدە بۇل ماسەلەنى قايتا قاراۋعا شاقىرادى", - دەدى الماتى كاسىپكەرلەر پالاتاسىنىڭ ديرەكتورى ناريمان ابىلشايىقوۆ.
ساراپشىلار كوروناۆيرۋس كۇزدە ورالسا، ءاربىر قازاقستاندىق تۇراقتى تابىسىنان ايىرىلۋى مۇمكىن دەگەن بولجام ايتىپ وتىر. الىپ تاستالعان تج كوپتىڭ كۇتكەنىندەي بولمادى. كارانتين شارالارى ساقتالىپ وتىر. ال بۇل دەگەنىمىز كوپتەگەن قازاقستاندىق جۇمىسسىز وتىر دەگەن ءسوز. ساراپشىلاردىڭ بولجامى كوڭىل كونشىتەرلىكتەي ەمەس. كارانتينگە دەيىن جۇمىسسىزدىق دەڭگەيى 4,8 پايىزعا تەڭ بولسا، ەندى بۇل كورسەتكىش 15 نەمەسە ودان دا كوپ پايىزعا ءوسۋى ىقتيمال.
"پەسسيميستىك كوزقاراستى ايتار بولسا... ءبىز كۇز جانە قىس مەزگىلدەرىندە قاتاڭ كارانتينگە جابىلىپ، جۇمىسسىزدىق 50 پايىزعا جەتۋى مۇمكىن", - دەيدى قازاقستاندىق قوعام پىكىرى مەن نارىقتى كاسىبي زەرتتەۋ قاۋىمداستىعىنىڭ پرەزيدەنتى ناتاليا وسپانوۆا.
كارانتين ۋاقىتىندا الماتىلىق جۇمىسپەن قامتۋ ورتالىعىنا 5 مىڭعا جۋىق ادام كەلگەن. ونىڭ 1200-ءى عانا جۇمىس تاپقان. شەنەۋنىكتەر قازىر ۆاكانسيادا تاڭداۋ از دەيدى.
"150 مىڭ نەمەسە ودان دا كوپ جالاقى العىسى كەلەدى. ماماندىعى نەمەسە تاجىريبەسى بويىنشا جۇمىس ىستەگىسى كەلەدى. الايدا، وكىنىشكە قاراي، قازىرگى ۋاقىتتا قىزمەت كورسەتۋ، ساۋدا، كلينينگ قىزمەتى، دەزينفەكتورلار قاجەت. جالاقى دەڭگەيى 85-120 مىڭ ارالىعىنلا. سوندىقتان بەرىپ تۇرعان جۇمىستى الۋعا كەڭەس بەرىپ جاتىر", - دەيدى الماتى اكىمدىگى حالىقتى جۇمىسەن قامتۋ ورتالىعى ديرەكتورىنىڭ ورىنباسارى نۇرجان اۋتاليف.
ول ەندى كومپانيالار كەڭسەلەردە ۇنەمدەپ، الىستاعى جۇمىس فورماتىن تاجىريبەدە قولداناتىن بولادى دەپ سانايدى. ال جۇمىس كاسىپتەرى مەن قىزمەت كورسەتۋ سالاسى امان قالادى.
ساراپشىلاردىڭ پىكىرىنشە: ەلدى جاپپاي جۇمىسسىزدىقتان قورعاۋ ءۇشىن شاعىن جانە ورتا بيزنەستى جەدەل قۇتقارۋ كەرەك. ول ءۇشىن سالىق تولەۋدەن كەم دەگەندە ءبىر جىلعا بوساتىلۋى ءتيىس كاسىپورىنداردىڭ ءتىزىمىن كەڭەيتۋدى ۇسىنىلادى.
ەسكە سالايىق، 15 ناۋرىزدا توقاەۆ كوروناۆيرۋس پاندەمياسىنا بايلانىستى تج رەجيمىن ەنگىزگەن بولاتىن. ال 11 مامىردا 00 ساعات 00 مينۋتتا تج رەجيمى اياقتالدى.
