جاڭا قاۋلى: استانالىقتارعا كارانتيندە نە ىستەۋگە رۇقسات ەتىلدى، ال نەگە تىيىم سالىندى

نۇر-سۇلتان، 24 مامىر — Sputnik. ەلوردانىڭ باس مەملەكەتتىك سانيتار دارىگەرى جاننا پىراليەۆا حالىق اراسىندا كوروناۆيرۋس ينفەكتسياسى تارالۋىنىڭ الدىن الۋ جونىندەگى قوسىمشا شارالار تۋرالى جاڭا قاۋلى قابىلدادى.

كارانتين كەزىندە استانالىقتارعا نە ىستەۋگە رۇقسات ەتىلدى

• 2 جانە ودان دا كوپ ادامنىڭ بىرلەسىپ سەرۋەندەۋى كەزىندە مىندەتتى تۇردە ماسكا كيىپ، 2 مەتردەن كەم ەمەس الەۋمەتتىك قاشىقتىقتى ساقتاي وتىرىپ، تۇراتىن جەرىنەن ەركىن شىعۋعا رۇقسات ەتىلەدى;
• اۋلالارعا شىعۋعا جانە ساياباقتارعا، الاڭدارعا، سكۆەرلەرگە، جاعالاۋعا مىندەتتى تۇردە ماسكا كيىپ، 3 ادامنان اسپايتىن توپقا نەمەسە ءبىر وتباسى مۇشەلەرىنە 2 مەتردەن كەم ەمەس الەۋمەتتىك قاشىقتىقتى ساقتاي وتىرىپ بارۋعا رۇقسات ەتىلەدى;
• 1.3. ساياجاي ۋچاسكەلەرىنە (قالا سىرتىنداعى ۇيلەرگە) بارۋ ءۇشىن ەلدى مەكەننەن كىرۋگە/شىعۋعا رۇقسات ەتىلەدى;
• قوعامدىق ورىندارعا، سونىڭ ىشىندە قالالىق قوعامدىق كولىكتەرگە جانە قىزمەتى رۇقسات ەتىلگەن وبەكتىلەرگە بارعان كەزدە ماسكا، قولعاپ كيىپ ءجۇرۋ جانە انتيسەپتيك پايدالانۋ بويىنشا تالاپتاردى قاتاڭ ساقتاۋ كەرەك;
• جەكە، قىزمەتتىك اۆتوكولىكتى جانە تاكسيدى شەكتەۋسىز پايدالانۋعا رۇقسات ەتىلەدى، تەك تاكسي جانە قىزمەتتىك كولىك جۇرگىزۋشىلەرى مىندەتتى تۇردە ماسكا، قولعاپ كيىپ، تەرى انتيسەپتيكتەرىن پايدالانۋى قاجەت;
• 50 ادامدىق ورنى بار ءدامحانا مەن مەيرامحانالاردىڭ جۇمىسىنا رۇقسات ەتىلەدى، كورشى ۇستەلدەردىڭ شەتكى ورىندارى اراسىنداعى الەۋمەتتىك قاشىقتىق 2 مەتردەن كەم بولماۋى كەرەك;
• سانيتارلىق-ەپيدەميولوگيالىق تالاپتار مەن كارانتيندىك رەجيمدى ساقتاي وتىرىپ، ءبىلىم بەرۋ ورتالىقتارىنىڭ، ءارتۇرلى سالا ماماندارىن دايارلاۋ جانە قايتا دايارلاۋ كۋرستارىنىڭ، سەمينارلىق ساباقتاردىڭ، ەرەسەكتەرگە ارنالعان ۇيىرمەلەردىڭ (جەكە ساباقتار نەمەسە 5 ادامنان اسپايتىن توپتار) قىزمەتىنە رۇقسات ەتىلەدى;
• ءدىني نىسانداردىڭ (مەشىتتەر، سوبورلار، شىركەۋلەر، سيناگوگالار) قىزمەتىنە رۇقسات ەتىلەدى، بىراق ءبىر ساتتە كىرەتىن ادامنىڭ سانى 50-دەن اسپاۋى ءتيىس جانە 2 مەتر الەۋمەتتىك اراقاشىقتىق ساقتالۋى شارت. كەلۋشىلەر ءار ءتۇرلى ەسىكتەن كىرىپ، شىعۋى كەرەك.

نۇر-سۇلتاندا كارانتيندە نە ىستەۋگە تىيىم سالىندى

• ۇجىمدىق ءىس-شارالار وتكىزۋگە جانە بانكەت پەن سالتانات زالدارىنىڭ جۇمىسىنا تىيىم سالىنادى;
• وتباسىلىق ەسكە الۋ، ادەت-عۇرىپ جانە وزگە دە ءىس-شارالار وتكىزۋگە، كەيتەرينگتىك قىزمەتتەر كورسەتۋگە جانە مەرەكەلەردى ۇيىمداستىرۋ جونىندە قىزمەتتەر كورسەتۋگە تىيىم سالىنادى;
• COVID-19 ىندەتى تارالۋىنىڭ تولىق تومەندەۋىنە دەيىن تۇنگى كلۋبتار، فيتنەس-كلۋبتار مەن زالدار، ترەناجەر زالدارى (ورتالىقتارى), سپا-سالوندار، ماسساج كابينەتتەرى، كوسمەتولوگيالىق كابينەتتەر، كلينيكالار مەن ورتالىقتار، مەكتەپتەن تىس قوسىمشا ءبىلىم بەرۋ ۇيىمدارى (دامىتۋ ورتالىقتارى، ءبىلىم بەرۋ ورتالىقتارى، ۇيىرمەلەر جانە ت. ب.), كومپيۋتەرلىك كلۋبتار، سپورت كەشەندەرىنىڭ (ۇيىرمەلەر، سەكتسيالار جانە ت. ب.) قىزمەتىنە تىيىم سالىنادى. تەك ۇلتتىق وليمپيادا كوميتەتىندە اككرەديتتەلگەن سپورت بازالارىن ۇلتتىق قۇراما كوماندالاردى وليمپيادالىق جانە پاراليمپيالىق ويىندارعا دايارلاۋ ءۇشىن عانا پايدالانۋعا بولادى;
• نۇر-سۇلتان قالاسىنىڭ اۋماعىندا جۇزەتىن سەرۋەندەۋ كەمە قۇرالداردىڭ جۇمىسىنا تىيىم سالىنادى;
• كوشە ساۋداسىنىڭ كەز كەلگەن تۇرىنە تىيىم سالىنادى;
• ادامداردىڭ قاتىسۋىنا بايلانىستى مەكتەپ جانە باسقا دا ءبىلىم بەرۋ مەكەمەلەرىنىڭ تۇلەكتەرى ءۇشىن بالدار، كەشتەر، سوڭعى قوڭىراۋلاردى وتكىزۋگە تىيىم سالىنادى;
• كەزەكشى توپتاردىڭ جۇمىسىن قوسپاعاندا، مەنشىك نىسانىنا قاراماستان مەكتەپكە دەيىنگى بالالار مەكەمەلەرىنىڭ قىزمەتىنە تىيىم سالىنادى.

سوڭعى دەرەكتەرگە سۇيەنسەك، رەسپۋبليكا بويىنشا كوروناۆيرۋس ينفەكتسياسى انىقتالعاندار سانى 8 322 ادامعا جەتتى، ونىڭ 4 214-ءى ەمدەلىپ شىقتى.

نۇر-سۇلتان قالاسىندا سوڭعى تاۋلىكتە 58 ادامنان كوروناۆيرۋس تابىلدى.