بۇگىن اقپاراتتىق-كوممۋنيكاتسيالىق ورتالىعىندا كارانتينگە بايلانىستى 1 ماۋسىمنان باستاپ قالامىزدا ىسكە قوسىلاتىن نىساندار بويىنشا بريفينگ ءوتتى.
بريفينگتە ەڭ العاش ءسوز العان قالا اكىمىنىڭ ورىنباسارى ماقسۇت يساحوۆ ەرتەڭنەن باستاپ ىسكە قوسىلاتىن نىساندار مەن شەكتەۋلەردىڭ الىنۋى بويىنشا باياندادى.
– شىمكەنتتە بيىلعى جىلدىڭ 1, 4 جانە 11 مامىر كۇندەرى 3 كەزەڭ بويىنشا 6 912 نىسان ىسكە قوسىلىپ، 166 مىڭنان استام ادام جۇمىسىنا قايتا كىرىسكەن بولاتىن. ال ءتورتىنشى كەزەڭ بويىنشا 1 ماۋسىمنان باستاپ 2 095 ورتا جانە شاعىن بيزنەس نىساندارى قايتا ىسكە قوسىلادى. ياعني، 33 مىڭنان استام جۇمىسشى ءوز ىسىنە كىرىسەدى دەگەن ءسوز – دەدى قالا اكىمىنىڭ ورىنباسارى.
وسى رەتتە 1 ماۋسىمنان باستاپ رۇقسات ەتىلگەن نىسانداردى اتاپ وتسەك:
1. ازىق-تۇلىك پەن قاجەتتى تاۋارلاردى ساتاتىن سۋپەرماركەتتەر، گيپەرماركەتتەر جانە ساۋدا جەلىلەرى جۇمىس رەجيمى ساعات 21:00-گە دەيىن ۇزارتۋىمەن;
2. قوعامدىق تاماقتانۋ ورىندارى جانە جازعى الاڭدار 50 ادامعا دەيىن ساعات 06:00-دەن 21:00 ارالىعىندا (قۇدالىق، تۋعان كۇن، مەرەي تويلار جانە ت.ب. مەرەكەلىك شارالاردى اتقارۋسىز) 1 320 نىسان (15 مىڭ ادام);
3. جاتتىعۋ زالى، فيتنەس-ورتالىقتار، ساۋنالار، SPA-سالوندار، جەكە كابينالارى بار مونشالار. جۇمىس رەجيمى – ساعات 21:00-گە دەيىن، 95 نىسان (600 ادام);
4. اۆتوكولىك جانە مال ساتاتىن بازارلار، 4 نىسان (50 ادام);
5. كورەرمەندەردىڭ قاتىسۋىنسىز سپورتتىق جانە مادەني نىساندار، 88 نىسان (1,7 مىڭ ادام);
6. ءبىلىم بەرۋ ورتالىقتارى، ۇيىرمەلەر، دايىندىق توپتارى (15 ادامعا دەيىن عانا قابىلداۋ ارقىلى), 59 نىسان (2 مىڭ ادام);
7. حالىققا قىزمەت كورسەتۋ جانە جۇمىسپەن قامتۋ ورتالىقتارى قالىپتى جۇمىس رەجيمىندە;
8. جانار-جاعارماي ستانتسيالارى جانىنداعى دۇكەندەر;
9. مەكتەپكە دەيىنگى ۇيىمدارداعى كەزەكشى توپتار (20 بالادان اسپايتىن) جانە تەمىرجول قاتىناستارى قالپىنا كەلتىرىلىپ، قالاارالىق بلوكپوستىلار الىنادى.
سونداي-اق، 2 ماۋسىمنان باستاپ اۆتوۆوكزالدار مەن اۆتوبەكەتتەر جۇمىسىن قايتا باستايدى. ال كينوتەاترلار 15 ماۋسىمنان باستاپ جۇمىستارىنا كىرىسەدى.
بۇدان بولەك، بريفينگتە قالا اۋماعىنداعى بارلىق توپتاعى نىساندار جۇمىسىن تاڭەرتەڭگى ساعات 6:00-21:00 ارالىعىنداعى رەجيمدە جالعاستىرا الاتىنى بەلگىلى بولدى. ساياباقتار مەن سكۆەرلەر، الاڭدار مەن جاعالاۋلاردا بەتپەردەلىك رەجيم ساقتالا وتىرىپ، شەكتەۋسىز رەجيمگە كوشەدى. وسى رەتتە بارلىق ىسكە قوسىلاتىن كاسىپكەرلىك نىساندار كۇشەيتىلگەن سانيتاريالىق-دەزينفەكتسيالىق تارتىپپەن جۇمىس ىستەيتىنىن ايتا كەتكەن ءجون.
ءباسپاسوز ماجىلىسىندە بالاباقشا جايى دا ءسوز بولدى. بۇل ماسەلەگە م.يساحوۆ رۇقسات بەرىلگەنىن جەتكىزىپ، بىراق بالانىڭ اتا-اناسى تاراپىنان جۇمىس ىستەيتىنى تۋرالى انىقتاما كەرەك ەكەنىن ايتتى.
بريفينگ بارىسىندا شىمكەنت قالاسى تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسىنىڭ ورىنباسارى المات قوساليەۆ سانيتارلىق نورمالار قاتاڭ ساقتالۋى كەرەك ەكەنىن تىلگە تيەك ەتسە، «ازاماتتارعا ارنالعان ۇكىمەت» مەملەكەتتىك كوورپوراتسياسى» شىمكەنت قالاسى بويىنشا فيليالىنىڭ ديرەكتورى دانابەك يسابەكوۆ قالا تۇرعىندارى حقكو-دان قىزمەت الۋ بارىسىندا ونلاين برونداۋ جۇيەسىن قولدانۋعا شاقىردى. بۇل رەتتە حالىق، ەڭ الدىمەن، ءوز ۋاقىتىن ۇنەمدەيتىنىن جەتكىزدى.
بريفينگ سوڭىندا وزگە دە سۇراقتار قويىلىپ، سپيكەرلەر تاراپىنان جان-جاقتى جاۋاپ بەرىلدى.
شىمكەنت
