قوعام بەلسەندىسى مۇحتار تايجان فەيسبۋك پاراقشاسىندا مارعۇلان سەيسەمبايدى سوتقا بەرگەنىن جاريالادى. ول زاڭ الدىندا ءبارىمىز تەڭ بولۋىمىز كەرەك دەيدى.
قۇرمەتتى دوستار!
مىنە، قاسيەتتى رامازان ايى دا اياقتالدى. رامازاننان كەيىن اشارشىلىق جانە قۋعىن-سۇرگىن قۇرباندارىن ەسكە الدىق، بالالارىمىزدى ولاردىڭ قۇقىن قورعاۋ كۇنىمەن قۇتتىقتادىق. كارانتين شەكتەۋلەرى دە اياقتالىپ، ادەتتەگى ومىرگە ورالىپ جاتىرمىز.
الدىندا ايتقانىمداي، مارعۇلان سەيسەمبايدىڭ ورازانىڭ العاشقى كۇنىندە وزدەرىڭىز كورگەن ماعان جانە مەنىڭ وتباسىما قاراتا ايتقان جالاسى مەن جالعان اقپاراتىن نازاردان تىس قالدىرمايمىن. سوندىقتان قازىر مەن مارعۇلاندى ماعان قاتىستى جۇمسارتىپ ايتقاندا جالعان سوزدەرى ءۇشىن جاۋاپقا تارتۋدى باستادىم.
وزدەرىڭىز بىلەتىندەي، ونى دەباتقا شاقىردىم. دەباتقا شىعىپ ماعان جانە بارلىعىڭىزعا مەن تۋرالى اقپاراتىن نەگىزدەپ بەرۋىنە بولاتىن ەدى. مەندە دە وعان قاتىستى ءوز ارگۋمەنتتەرىمدى ايتاتىن مۇمكىندىك تۋشى ەدى. بىراق، ول دەباتقا شىقپادى، سوندىقتان ادۆوكاتتارىما ونى سوتقا شاقىرۋدى تاپسىردىم. ەندى ول سوتقا كەلىپ، مەن تۋرالى ايتقاندارىنا جاۋاپ بەرۋگە مىندەتتى بولادى.
سوتتا ەكى تاراپتىڭ دا ءوز پىكىرلەرىن دالەلدەۋىنە مۇمكىندىك بولادى، كىمنىڭ اق، كىمنىڭ قارا ەكەنىن سوت شەشسىن. مەن اركىم ءوز ءىسى مەن سوزىنە جاۋاپ بەرۋى كەرەك دەپ سانايمىن. پوست جازۋ، بوتفەرمالاردى جالداپ لايك پەن رەپوست جيناۋ وڭاي، بىراق شىندىق لايك سانىمەن ولشەنبەيدى. سوندىقتان دا مەن جۋرناليستەردىڭ قاتىسۋىمەن وتەتىن اشىق سوتقا دايىنمىن.
مارعۇلان ماعان جاريا تۇردە جالا جاپقان ەكەن، ونىڭ ايتقاندارىنىڭ ءوزىم سوتتا جوققا شىعاراتىن نەگىزگى بولىكتەرىنە توقتالا كەتەيىن:
1. «...سەن كەزىندە ءوز اناڭ مەن اپاڭدى سوتتاتتىڭ».
مەن ەشقاشان تۋىستارىمدى سوتتاتپادىم، ەشكىمدى، انام مەن اپامدى دا سوتقا بەرمەدىم. بىرەۋدىڭ وتباسىنا قاتىستى وسەك تاراتۋشى جازالانۋى كەرەك.
2. «مەن سەنى قولداعىم كەلىپ، پياز ساتىپ الۋىڭا، كەيىن تۇسكەن پايدانى 50/50 ەتىپ ءبولىسۋ ءۇشىن $95 000 ينۆەستيتسيا جاسادىم».
مەنى ەشقانداي دا ونداي قولداۋ بولعان ەمەس، بولعانى – الدىن الا كەلىسىم بويىنشا بىرلەسكەن ينۆەستيتسيالار عانا. بۇل جەردە پايدانى 50/50 جولىمەن ءبولۋ تۋرالى كەلىسىم بولعانى راس. ول كەزدە سەرىكتەستەرىممەن ءبىز ەكىنشى جىل قاتارىنان پياز بيزنەسىنە 1,3 ملن اقش دوللارىن ينۆەستيتسيالادىق. ال، 95 مىڭ دوللار ونىڭ جانىندا ەشتەڭە شەشپەيدى.
ودان بولەك، سول 2014-2016 جىلدارى مەن ازاماتتىق بەلسەندىلىكپەن اينالىسپادىم، تولىقتاي بيزنەسكە بەت بۇردىم. ول تۋرالى 2014 جىلدىڭ باسىندا ءباسپاسوز ءماسليحاتىن وتكىزىپ، ساياساتتان كەتەتىنىمدى رەسمي مالىمدەدىم. سونداي-اق، ول ۋاقىتتا جەر داۋى دا بولماعانى بەلگىلى. سوندىقتان ول جىلدارى مەنى جەر بەلسەندىسى رەتىندە قولدايتىنداي سەبەپتەر بولعان جوق. مەن ساياساتقا تەك 2016 جىلدىڭ كوكتەمىندە، جەرگە قاتىستى داعدارىس تۋعاندا ورالدىم. سوندىقتان، بۇل جەردە ەشقانداي قايىرىمدىلىق ەمەس، ادەتتەگى بىرلەسكەن بيزنەس قانا بولدى.
3. «سەن مەنەن اقشا الدىڭ، بىراق كەيىن مەن شەڭگەلدى اۋىلىنىڭ فەرمەرلەرى سەن ولارمەن ەسەپتەسپەگەنىڭدى ايتىپ جۇرگەنىن ءبىلدىم. كەيىن سەن ماعان ول فەرمەرلەرمەن سوتتاسىپ، جەڭگەنىڭدى جازدىڭ. سول سوزىڭە سەندىم دە قارىم-قاتىناسىمىزدى جالعاستىردىق. بۇل مەنىڭ كەزەكتى جانە ۇلكەن قاتەلىگىم بولدى!».
بۇل جەردە مەن شەڭگەلدى شارۋالارىمەن پياز ءۇشىن ەسەپتەسپەپتى-ءمىس دەگەن ەمەۋرىن بايقالادى. ءيا، ماعان قارسى الەۋمەتتىك جەلىدە جانە بيلىكشىل باق-تا سول كەزدە، ءدال جەر كوميسسياسىنىڭ جۇمىسى كەزىندە وسىنداي اقپاراتتىق كومپانيا بولدى. بىراق، ناقتى فاكت جوق. ونىڭ ۇستىنە بيىل اقپاندا فەرمەرلەر ماعان جالا جاپقان سوزدەرى ءۇشىن جاريا تۇردە كەشىرىم سۇرادى. مۇمكىن ولاردى بىرەۋلەر ماعان قارسى پايدالانعىسى كەلگەن شىعار.
https://www.facebook.com/mukhtar.taizhan/posts/2767109376707209
https://www.facebook.com/mukhtar.taizhan/posts/2914668988617913
4. «2016 جىلدىڭ ساۋىرىندە بۇكىل ەل بويىنشا جەر ميتينگىلەرى ءوتتى. حالىق شەتەلدىكتەرگە جەر ساتىلماۋىن تالاپ ەتتى. سەن بۇعان بەلسەندى تۇردە قوسىلىپ، مەنەن كومەك سۇرادىڭ. سول كەزدە سەن ماعان پياز بيزنەسىندە بار اقشاڭدى جوعالتقانىڭدى، ۇلىڭنىڭ امەريكاداعى وقۋىن تولەۋگە جانە وتباسىڭدى اسىراۋعا اقشاڭ جوعىن ايتتىڭ. مەن ساعان جەر ماسەلەسىمەن اينالىسۋىڭ ءۇشىن كومەكتەسەتىنىمدى ايتتىم».
بىرىنشىدەن، مەن تەك ۇلىمدى، عانا ەمەس، قىزىمدى دا الەمنىڭ ۇزدىك ۋنيۆەرسيتەتتەرىنە مارعۇلانمەن تانىسقانعا دەيىن، 2015 جىلدىڭ قىركۇيەگىندە جىبەردىم. ولاردىڭ وقۋى 5 جىلعا سوزىلدى، ياعني مەندە مارعۇلانمەن قارجىلىق قارىم-قاتىناستار بولعان مەرزىمنەن الدەقايدا ۇزاق. مەندە بالالارىمدى وقىتۋعا زاڭدى قاراجات، زاڭدى قاراجات كوزدەرى بولدى، ونى مەن سوتتا دالەلدەپ بەرە الامىن. وسى جەردە مەن 2003 جىلدان باستاپ بيزنەسپەن ءساتتى اينالىسقانىمدى، 2008 جىلى ءبىرىنشى ميلليون دوللارىمدى، دالىرەك ايتسام ەكى ميلليون دوللارىمدى جيناعانىمدى باسا ايتقىم كەلەدى. جانە بۇل قاراجاتتى مەن مەملەكەت مەنشىگىن جىمقىرۋ جولىمەن ەمەس، مەملەكەتتىك سۋبسيديالاردىڭ، تەندەرلەر مەن مەملەكەتتىك باعدارلامالاردىڭ كومەگىمەن ەمەس، كرەديت الىپ، سول ارقىلى كاسىپكەرلىك تاۋەكەلگە بارىپ جينادىم.
5. «مەن بەلسەندىنىڭ وتباسىن اسىراپ، ۇلىن امەريكادا وقىتۋىنا، ءوزى الاڭسىز جەر كوميسسياسىنىڭ جۇمىسىنا قاتىسىپ، ميتينگ كەزىندە قابىلدانعان شەشىمدەردى جۇزەگە اسىرۋىنا كومەكتەستىم».
«ال ەندى ماعان جاۋاپ بەرشى، سوڭعى 2 جىلدا سەنى، سەنىڭ وتباسىڭدى مەن اسىراپ، ۇلىڭنىڭ وقۋىن مەن تولەدىم ەمەس پە؟».
سوتتا مەن وسى جەردە ءسوز بولىپ وتىرعان 2015 جىلدان 2019 جىلدى قوسا العانعا دەيىنگى ارالىقتاعى مەنىڭ جەكە شوتتارىمداعى اقشا اينالىمىن اشىپ كورسەتەمىن. سول جەردە مەنىڭ جىل سايىنعى اقشا اينالىمىم بالالارىمدى وقىتۋعا جەتكىلىكتى بولعانى ايقىندالادى. ناعىز كومەك، سول كەزدە دە، قازىر دە مەنەن باسقا جەر جاناشىرلارىنا، باسقا دا ازاماتتىق بەلسەندىلەرگە الدەقايدا قاجەت ەكەنىنە سەنىمدىمىن. ال، مارعۇلان ەكەۋمىزدە قاشان دا بيزنەس جانە ىسكەرلىك كەلىسىمدەر عانا بولدى.
6. «سەن مەنەن مىنا سومالاردى العانىڭدى جوققا شىعاراسىڭ با:
24.06.2016 مۇحتاردىڭ كەلىنشەگى ايگۇلگە 43500 اقش دوللارى بەرىلدى. تاپسىرۋ ورنى ماركوۆ-پاپوۆ قيىلىسى.
11.07.2016 مۇحتاردىڭ كەلىنشەگى ايگۇلگە 43600 اقش دوللارى بەرىلدى. تاپسىرۋ ورنى ماروۆ-پاپوۆ قيىلىسى.
24.02.2017 مۇحتاردىڭ كەلىنشەگى ايگۇلگە 50000 اقش دوللارى بەرىلدى.
29.05.2017 مۇحتاردىڭ كەلىنشەگى ايگۇلگە 50000 اقش دوللارى بەرىلدى.
27.07.2017 مۇحتاردىڭ كەلىنشەگى ايگۇلگە 50000 اقش دوللارى بەرىلدى.
سەن وسى ەكى جىلدا ساعان 237 100 اقش دوللارىن بەرگەنىمدى جوققا شىعاراسىڭ با؟».
مەنىڭ ەلەكتروندى پوشتامدا «الەل اگرو» ماماندارىمەن سالىق كودەكسىنىڭ 448-بابى بويىنشا حات الماسۋلار (پرەزەنتاتسيالار، ولاردىڭ نەگىزدەمەلەرى) ساقتالىپ قالىپتى. ءدال وسى باپ مارعۇلانعا باسقا فيرمالارىنان اۋىلشارۋاشىلىعىنا ينۆەستيتسيا قۇيۋعا اففەليرلىگىنە بايلانىستى كەدەرگى كەلتىرگەن بولاتىن. بۇل تۋرالى مارعۇلان ءوزى دە فب پاراقشاسىندا جازدى.
https://www.facebook.com/seimargulan/posts/10208469550890775
ونىڭ پوستىنان كورىپ وتىرعانىمىزداي، ونىڭ كومپانيالارى 2016 جىلدىڭ باسىندا اۋىلشارۋاشىلىعى سەكتورىنا جۇزدەگەن ميلليون دوللار ينۆەستيتسيا قۇيعىلارى كەلگەن. بىراق، «اففەليرلىك» دەپ اتالاتىن ۇعىم ونىڭ كومپانيالارىن ارنايى سالىق رەجيمىنەن ايىردى، سالىق كودەكسىنىڭ 448-بابىندا سول تۋرالى ايتىلعان. ءبىزدىڭ ءبىر جىل بويعى جۇمىسىمىز ناتيجەلى بولىپ، ول باپ وزگەرتىلدى. بۇل ايتىپ وتىرعاندارىمدى تەكسەرۋ دە، دالەلدەۋ دە وڭاي.
مەن بۇل جۇمىسپەن اينالىسۋعا كەلىسىم بەردىم، ويتكەنى وسى باپ شىنىمەن دە ءبىزدىڭ اۋىلشارۋاشىلىعىنا ينۆەستيتسيا قۇيۋعا كەدەرگى كەلتىرىپ كەلدى جانە كوررۋپتسيالىق سيپاتقا يە بولدى. مەن ول تۋرالى جازعان بولاتىنمىن.
https://www.facebook.com/mukhtar.taizhan/posts/1183393085078854
https://www.facebook.com/mukhtar.taizhan/posts/1533438110074348
ءبىز وسى كۇردەلى ماسەلەنى 1,5 جىل ىشىندە شەشتىك. ءبىز 2018 جىلعى 1 قاڭتاردان باستاپ مارعۇلاننىڭ نەمەسە ونىڭ فيرمالارىنىڭ ۇلەسى بار باسقا كومپانيالار ارنايى سالىق رەجيمىن پايدالانا باستاعانىن، سودان بەرى ول كومپانيالار قانشا قارجى ۇنەمدەگەنىن تەكسەرە الامىز. سوت بۇل اقپاراتتى سۇراتادى دەپ ۇمىتتەنەمىن.
جالپى، ءبىزدىڭ ارامىزدا وسى ۋاقىتقا دەيىن ەشقانداي اقشاعا بايلانىستى داۋ بولماعانىن ايتۋ كەرەك. 2018 جىلى مەن نوماد ەكسپلورەر ەكسپەديتسياسىنا قۇرمەتتى قوناق رەتىندە قاتىستىم. ماعان ەشقانداي شاعىم بولعان جوق. ودان بولەك 2019 جىلى ءبىز مارعۇلان ەكەۋمىز ىسكەرلىك قاتىناستاردى جالعاستىرىپ، جاڭا ءىس – ەل بويىنشا تۋالەتيزاتسيا جانە قوقىس جيناۋ جوباسىن باستاۋعا تالپىندىق، ءتىپتى بىرلەسكەن جشس تىركەتۋدى دە باستادىق.
مۇنىڭ بارلىعى ءبىزدىڭ قارىم-قاتىناسىمىزدىڭ ىسكەرلىك سيپاتىن ايعاقتايدى. بۇل جەردە قايىرىمدىلىق كومەك تۋرالى ەش اڭگىمە جوق. تاعى قاداپ ايتامىن، ءبىزدىڭ بيزنەس قارىم-قاتىناسىمىزدا نەمەسە جەكە قارىم-قاتىناسىمىزدا ەشقانداي تۇسىنبەۋشىلىك بولمادى.
وندا بۇل شيەلەنىس نە نارسەگە بايلانىستى؟
مەن ونى 2019 جىلدىڭ جازىندا الەۋمەتتىك جەلىدە دوستىقتان شىعارىپ تاستادىم. ءيا، ول ودان كەيىن بىرنەشە رەت مەنىمەن كەزدەسۋگە سۇرانىپ، ءتىپتى الماتى قالاسى بويىنشا جاڭا بيزنەس جوبا دا ۇسىندى. بىراق، مەنىڭ ونىمەن ورتاق شارۋامەن اينالىسۋعا دەگەن نيەتىم جوعالدى. مەن ونىڭ جازعاندارىنان مىنا قوعامدى دامىتۋعا سانالى تۇردە قارسىلىق، كەسىر تيگىزۋ بەلگىلەرىن بايقادىم. ول ءبىر قاراعاندا دۇرىس نارسە جازىپ جۇرگەندەي كورىنەدى، بىراق شىن مانىندە ونىڭ پوستتارى بىزدە باستالىپ جاتقان جۇيەنى رەفورمالاۋعا باعىتتالعان كۇردەلى پروتسەستەرگە حايپتىڭ كومەگىمەن كەدەرگى كەلتىرىپ، وسى پروتسەستى توقتاتۋعا باعىتتالدى.
مەن وعان بۇل جۇيەنىڭ اۋىسقانى ءتيىمسىز ەكەنىن ءتۇسىندىم. ويتكەنى ول بۇگىنگى جاعدايىن وسى جۇيەنىڭ ارقاسىندا جاسادى. ەگەر جۇيە اۋىسسا ونىڭ بارلىق شارۋاسى، ونىڭ ىشىندە 90-جىلدارى الەل اگرو قۇس فابريكالارىن جەكەشەلەندىرۋ بويىنشا، جىل سايىنعى ميللياردتاعان مەملەكەتتىك سۋبسيديالار (127 ملن دوللار ەكەنى بەلگىلى بولىپ وتىر), اليانس بانكتىڭ ەكى ەسەلەنگەن پايىزدارى، باسقا دا شارۋالارى بويىنشا ءىس قوزعالار ەدى. مەن مارعۇلان ەكەۋمىزدىڭ كەمەمىز ءبىر ەمەسىن، ماعان ناعىز رەفورما كەرەك ەكەنىن، وعان بۇرىنعى جۇيەنىڭ ساقتالعانى كەرەك ەكەنىن ءتۇسىندىم. ادامنىڭ كوزقاراسى ونىڭ داۋلەتى مەن سول داۋلەتتى قانداي جولمەن جيناعانىنا بايلانىستى قالىپتاسادى عوي.
مىسالى، ول جەردى تەك قازاقستان ازاماتتارىنا عانا بەرۋدى قولداعانداي بولىپ سويلەپ جۇرەدى دە، كوپ ادام، قوعام بەلسەندىلەرى قاتىسپايتىن دوڭگەلەك ۇستەلدەردە جەردى ءتىپتى 49 پايىزعا دەيىن شەتەلدىكتەردىڭ ۇلەسى بار فيرمالارعا بەرۋگە شاقىرادى.
https://www.facebook.com/uais.rakhmetov/posts/1990241404455003
مەن ونىڭ ءسوزى ءبىر باسقا، ءىسى ءبىر باسقا ەكەنىن ءتۇسىندىم. جۇيەنىڭ جەمقورلىعىن ايتىپ وتىرادى، بىراق سوعان قاراماستان ونىڭ بيزنەسى وسى جۇيەدەن قولداۋ كورەدى جانە وتە ءىرى كولەمدە. بۇل جەردە ەشقانداي كورەالماۋشىلىق جوق. مەن فب-نىڭ، الەۋمەتتىك جەلىنىڭ باسقا جۇلدىزدارىن كورە الماي جاتقان جەرىم جوق. قانداي دا ءبىر تاپسىرىس تا جوق. ەگەر تاپسىرىس الاتىن بولسام، مەن رەجيمدى وتە راديكالدى تۇردە سىناپ جۇرگەن، ناعىز رەجيم قارسىلاستارىنا «شابۋىل» جاسايتىن ەدىم عوي. بار بولعانى مەن قوعامدىق-ساياسي الاڭدى قاۋىپتى پايداكۇنەمدەردەن، ساياساتتاعى شاريك-ماليكتەردەن تازارتۋعا مىندەتتىمىن. مەن بۇرىن دا سولاي جاساعام، الدا دا جالعاستىرامىن.
قاشان دا مەن ونداي قاۋىپتى ەلەمەنتتەر تۋرالى دەر كەزىندە ەسكەرتىپ ءجۇرمىن. 2012 جىلى مامبەتالين تۋرالى، 2018 جىلى «جاڭا قازاقستان» تۋرالى، بىلتىرعى سايلاۋدا ولاردىڭ ليدەرى قوسانوۆ تۋرالى دا العاش بولىپ ايتتىم. مەن ءۇشىن بيزنەستىڭ ساياساتقا قاتىسى بولماۋى كەرەك. ارينە، كۇنكورىس ءۇشىن بيزنەسپەن اينالىسۋ كەرەك. بىراق بۇل ەگەر مەن بىرەۋمەن بىرلەسىپ بيزنەس باستاسام، ول ءوز بيزنەس سەرىكتەرىمنىڭ حالىقتى الداۋىنا كوز جۇمۋىم كەرەك، ونى جاسىرۋىم كەرەك دەگەندى بىلدىرمەيدى. ەگەر ونداي شارۋالار بوپ جاتسا، مەن ولارمەن بىرگە بيزەستى جالعاستىرۋدان باس تارتامىن، مىنا جاعدايدا دا سونداي قادامعا بارىپ وتىرمىن.
كىممەن، قانداي اداممەن بايلانىسقانىمدى مەن 2019 جىلدىڭ جەلتوقسانىندا سەيسەمبايدان "اليانس بانك تۋرالى جازۋىڭدى توقتاتپاساڭ الاياقتىق جاسادى دەپ قىلمىستىق جاۋاپقا تارتقىزامىن" دەگەن قوقان-لوققى باستالعاندا ناقتى ءتۇسىندىم. ءبىزدىڭ ارامىزدا بيزنەسكە بايلانىستى جۇرگەن بارلىق قاراجاتتى ول ماعان قارىز رەتىندە ءىلىپ، كەرى سۇراتامىن دەپ قورقىتپاق بولدى. كۋالارىمەن، حات الماسۋلارمەن، زاڭگەرلەرمەن، تاعى باسقالارمەن قورقىتتى. سوندا مەن كەلىسىمدەردى وڭاي ۇمىتا سالاتىن ناعىز كلاسسيكالىق بانكير-وسىمقورمەن بايلانىسقانىمدى تولىق ءتۇسىندىم.
ياعني بىلتىر جەلتوقساندا دورەكى تۇردە مەنىڭ اۋزىمدى جاپپاق بولدى. بىرلەسكەن بيزنەسپەن ساتىپ الۋ مۇمكىن بولماعان سوڭ، اۋزىمدى قورقىتىپ جابۋعا تالپىندى. بىراق، مارعۇلان بۇل مۇلدەم باسقاشا جاعداي ەكەنىن تۇسىنبەدى. مەن وليگارحتاردان، لاتيفۋنديستەردەن، ت.ب.قورىقپايمىن. ويتكەنى ولار وتە تاۋەلدى ادامدار. ولاردىڭ ارتى تازا ەمەس، كەز كەلگەن ۋاقىتتا قولىنان جەتەكتەپ پروكۋراتۋراعا الىپ بارۋعا بولادى. ونى بۇلار جاقسى بىلەدى. ودان بولەك ولاردىڭ ارقايسىنىڭ ناقتى قوجايىندارى بار، ال مەندە قوجايىن جوق.
پوست ۇزاقتاۋ، بىراق تولىق شىقتى دەپ ويلايمىن. مەن بۇل جەردە داۋ شىعارۋدى ماقسات ەتپەيمىن. ماعان سوڭعى جىلدارى ارنايى الىنعان بوتوفەرمالاردىڭ، مارعۇلاننىڭ تانىمال تانىستارىنىڭ، جاي عانا اقشاعا ساتىپ العان جۋرناليستەرى مەن سايتتارىنىڭ شابۋىلدارى دا قىزىقسىز. قۋانىشتىسى، اقيقات لايك، رەپوست سانىمەن ولشەنبەيدى. تانىمال ادام رەتىندە قاراپايىم ازاماتتاردىڭ مەنىڭ تۇلعاما قىزىعۋشىلىق تانىتىپ، تالقىلاعانىنا تۇسىنىستىكپەن قارايمىن. بۇل – قالىپتى جاعداي. بىراق، مىنا جاعدايدا جاي ادام ەمەس، فوربس تىزىمىندەگى ادام ايىپ تاعىپ وتىر. مۇنى مەن بەي-جاي قالدىرا المايمىن.
جوعارىدا مەنىڭ جانە وتباسىمنىڭ اتىنا ايتىلعان بارلىق ايىپتار بويىنشا اشىق پروتسەسكە قول جەتكىزەتىن بولامىن. ءوز ار-نامىسىن وتباسىن قورعاۋ – ءار ەر ازاماتتىڭ، شاڭىراق يەسىنىڭ مىندەتى. ەگەر ءبىز ءوز وشاعىمىزدى قورعاي الماساق، وندا ءبىز حالىقتىڭ جەرىن قالاي قورعاعالى ءجۇرمىز؟ سوندىقتان دا بۇل – ءبىزدىڭ مىندەتىمىز. سول سەبەپتى مەن قاينداي ادامنىڭ بولسىن مارتەبەسىنە قاراماستان ادىلدىك سالتانات قۇرۋىن قامتاماسىز ەتەتىن بولامىن. زاڭنىڭ الدىندا ءبارىمىز تەڭ بولۋىمىز كەرەك.
