ق.توقاەۆ: مەملەكەت مەديتسينا قىزمەتكەرلەرىنە جان-جاقتى كومەك بەرەدى

3287
Adyrna.kz Telegram

پرەزيدەنت قاسىم-جومارت توقاەۆ مەديتسينا قىزمەتكەرلەرىن كاسىبي مەرەكەسىمەن قۇتتىقتاپ، ولارعا مەملەكەتتىڭ جان-جاقتى قولداۋ كورسەتىپ جاتقانىن اتاپ ءوتتى.

"ەلىمىزدەگى بارشا مەديتسينا قىزمەتكەرلەرىن كاسىبي مەرەكەلەرىمەن قۇتتىقتايمىن! اۋىرعان جاندى ەمدەۋ، ءومىرىن ساقتاۋ – سىزدەردىڭ قاستەرلى ەڭبەكتەرىڭىز. بۇگىندە كوپشىلىگىڭىز پاندەميامەن كۇرەستىڭ الدىڭعى شەبىندە جۇرسىزدەر. قاجىرلى ەڭبەكتەرىڭىز ءۇشىن العىس ايتامىن. امان بولىڭىزدار! مەملەكەت سىزدەرگە جان-جاقتى كومەك بەرەدى", - دەدى تۆيتتەر پاراقشاسىندا.

 

قازاقستاندا ماۋسىم ايىنىڭ ءۇشىنشى جەكسەنبىسىندە مەديتسينا قىزمەتكەرلەرى كۇنى بولىپ بەكىتىلگەن. اق حالاتتىلاردى باس دارىگەر ەلجان ءبىرتانوۆ تا قۇتتىقتادى.

«قازاقستاندىق دارىگەرلەردىڭ وسىنداي قيىن ۋاقىتتا باسىمىزعا تۇسكەن اۋىرتپالىقتى جەڭە الاتىنىنا سەنىمدىمىن. مەن بۇعان قازىر ارىپتەستەرىمنىڭ قولىندا ەمدەلىپ جاتىپ تاعى كوز جەتكىزدىم - ولار ءوز ءىسىنىڭ كاسىبي شەبەرى. بارشاڭىزعا مىڭ العىس!»، - دەدى ە. ءبىرتانوۆ.

ەسكە سالا كەتسەك، بۇگىنگە دەيىن  ەلىمىزدە 17 225 ادام كوروناۆيرۋسپەن اۋىرعان. ولاردىڭ 10 719-ى جازىلىپ شىقتى. وكىنىشكە قاراي 118 ادام وسى دەرتتەن قايتىس بولدى.

ال COVID-19 ۆيرۋسىن جۇقتىرعان دارىگەرلەر سانى – 1 904. دەنساۋلىق ساقتاۋ مينيسترلىگىنىڭ وكىلى ءلاززات اقتاەۆانىڭ  اقپاراتى بويىنشا،  ولاردىڭ 30 پايىزى عانا ۆيرۋستى جۇمىس بارىسىندا جۇقتىرعان.

"ادىرنا" ۇلتتىق پورتالى

 

پىكىرلەر