23 ماۋسىم كۇنى وزبەكستان رەسپۋبليكاسى، سىرداريا وبلىسى، گۇلىستان قالاسىندا ءبىر ايلىق نارەستەنى 18 مىڭ اقش دوللارىنا ساتپاق بولعان ەكى ايەل ۇستالدى. بۇل تۋرالى Centralasian حابارلادى
سىرداريا وبلىسى ىشكى ىستەر باسقارماسىنىڭ اقپاراتى بويىنشا، ۇستالعان ەكى ايەلدىڭ ءبىرى - ءسابيدىڭ اناسى، ەكىنشىسى - بالا ساتۋدا دەلدال بولىپ جۇرگەن ايەل.
دالەل رەتىندە اقشاسى تاركىلەنگەن. قازىر وسى وقيعا بويىنشا تەرگەۋ ءجۇرىپ جاتىر.
1 مامىردا ءدال وسى ايماقتا ساردوبا سۋ قويماسى جارىلىپ، ەلدى-مەكەندى سۋ باسقان. 70 مىڭ ادام كوشىرىلگەن. اپاتتان 4,5 مىڭ وتباسى باسپاناسىز قالدى.
بۇل اپاتتىڭ كەسىرى تۇركىستان وبلىسىنىڭ ماقتاارال اۋدانىنا دا تيگەن. «تۇركىستان» الەۋمەتتىك دامۋ كورپوراتيۆتىك قورىنىڭ دەرەگىنشە 200-دەن اسا ۇيگە قاتتى زاقىم كەلگەن. بۇلىنگەن ۇيلەردىڭ جالپى سانى 800-دەن اساتىن كورىنەدى. تاعى دا ايتا كەتەتىن ءجايت، 7 مىڭ گەكتاردان اسا ەگىستىك جەردى سۋ الىپ، 300 دەي مال قىرىلىپ قالعان.
قازىر ارنايى كومميسيا زارداپ شەككەن تۇرعىندارعا وتەماقى بەرۋدى باستاپ كەتكەن.
"ادىرنا" ۇلتتىق پورتالى
