شىمكەنت قالاسىنىڭ كاسىپكەرلەرى كوروناۆيرۋسپەن كۇرەس شارالارىنا ءوز ۇلەستەرىن قوسىپ وتىر. جومارت جاندار «شىمكەنت – قايىرىمدى قالا» الەۋمەتتىك-قايىرىمدىق قورىنا بۇگىنگە دەيىن 100 ملن تەڭگەدەن استام قارجى بولگەن. بۇل تۋرالى قور ديرەكتورى داۋرەنبەك قۇربانيازوۆ مالىمدەدى.
ونىڭ ايتۋىنشا، بۇل قارجىعا 5 دانا وكپەنى جاساندى جەلدەتۋ (يۆل) اپپاراتى الىنعان. قۇرالداردىڭ تورتەۋى جاڭا جۇقپالى اۋرۋحاناعا، بىرەۋى كارديولوگيالىق ورتالىققا ورناتىلعان. بۇگىندە وسى ماقساتقا جۇمسالعان قارجى كولەمى 90 ملن تەڭگەنى قۇرايدى. سونىمەن قاتار، قىزمەتتىك بورىشىن وتەۋ بارىسىندا قازا بولعان دارىگەرلەردىڭ وتباسىنا دا «شىمكەنت قايىرىمدى قالا» قورى تاراپىنان قارجىلاي قولداۋ كورسەتىلدى. كۇنى بۇگىنگە دەيىن قوردىڭ كومەگىمەن قوسىمشا اشىلعان پروۆيزورلىق ورتالىقتارداعى توسەك-ورىنعا ارنالعان 30 كەرەۋەت پەن 2400 ليتر مينەرالدى سۋ الىنعان. الداعى اپتادا 10 مىڭ بەتپەردە مەن 1000 دانا مەديتسينالىق كيىم تاراتۋ جوسپارلانىپ وتىر.
ايتا كەتسەك، «شىمكەنت – قايىرىمدى قالا» قورىنىڭ نەگىزگى ماقساتى – الەۋمەتتىك، مادەني، عىلىمي، سپورتتىق، ءبىلىم بەرۋ ماقساتتارىنا قول جەتكىزۋ، ازاماتتاردىڭ دەنساۋلىعىن ساقتاۋ، قورشاعان ورتانى قورعاۋ، سونىمەن قاتار باسقا دا الەۋمەتتىك پايدالى ماسەلەلەر. بۇل قور كوروناۆيرۋستىق ينفەكتسيامەن كۇرەستە ۇلكەن الەۋمەتتىك كومەك كورسەتىپ كەلەدى.
شىمكەنت
