رەسەي فەدەراتسياسىنىڭ كەڭەسى (پارلامەنتتىڭ جوعارعى پالاتاسى) رەسەي مەن قازاقستان اراسىنداعى 5ن86 "دنەپر" ("ۋزەل بالحاش") راديولوكاتسيالىق ستانتسياسىن رەسەيدىڭ زىمىراندىق ەسكەرتۋ جۇيەسىندە پايدالانۋ تۋرالى كەلىسىمدى جوققا شىعاراتىن زاڭدى ماقۇلدادى.
رەسەي فەدەراتسياسىنىڭ قورعانىس مينيسترلىگى راداردان باس تارتۋدى سوڭعى ءتورت جىلدا ءتورت زاماناۋي ستانتسيا - ارماۆير، ورسك، بارناۋل جانە يركۋتسك قالالارىندا سالىنعاندىعىمەن، بالقاش تورابىنىڭ ارتىق بولىپ قالعاندىعىمەن ءتۇسىندىردى. كەلىسىم 2014 جىلى جاسالىپ، ءبىر جىلدان كەيىن راتيفيكاتسيالاندى. ونىڭ مەرزىمى 2020 جىلدىڭ 15 جەلتوقسانىندا اياقتالادى.
رەسەيدىڭ عارىش كۇشتەرىنىڭ قولباسشىسى الەكساندر گولوۆكو بۇعان دەيىن "بالقاش تورابىنىڭ" رەسەيلىك تاراپتىڭ مەنشىگىندە بولعاندىقتان كەلىسىم مەرزىمىنىڭ سوڭىنا دەيىن رەسەي فەدەراتسياسىنىڭ اۋماعىنا اكەتەتىنىن مالىمدەدى. سونىمەن بىرگە، ول رەسەيدىڭ قازاقستاندىق راديولوكاتسيالىق ستانتسيانى پايدالانۋدان باس تارتقاننان كەيىن رەسەي زىمىراندىق شابۋىل تۋرالى ەسكەرتۋ جۇيەسىنەن دەرەكتەردى قازاقستانعا جىبەرۋدى جالعاستىراتىنىن ايتتى.
«ءبىزدىڭ مىندەتتەرىمىزدىڭ ىشىندە قزاقستانعا زىمىراندىق شابۋىل تۋرالى اقپارات بەرۋ مىندەتى بار، ءبىز ونى وسى جىلى ورىندايمىز. ەسكەرتۋگە ارنالعان «كروكۋس» دەگەن مىقتى جۇيە بار، ال قازاقستان ءۇشىن مۇنداي جۇيە بيىل ورناتىلادى.
وڭعار قابدەن،
"ادىرنا" ۇلتتىق پورتالى
