بالقاشتا پوليتسيا قىزمەتكەرى كامەلەتكە تولماعان قىزدى زورلادى دەگەن كۇدىكپەن ۇستالدى. بۇل تۋرالى Facebook-تەگى پاراقشاسىندا قر ىشكى ىستەر ءمينيسترىنىڭ ءباسپاسوز حاتشىسى ايگەرىم ۋرازاليەۆا مالىمدەدى.
بەلگىلى قۇقىق قورعاۋشى جانە NeMolchi.kz قوعامدىق قورىنىڭ نەگىزىن قالاۋشى دينا سمايلوۆا ۇيىمنىڭ Facebook-تەگى پاراقشاسىندا حابارلاما جاريالادى، وندا ول قاراعاندى وبلىسىنىڭ پوليتسيا دەپارتامەنتىنىڭ باسشىسىنا جەكە باقىلاۋعا الۋ جانە پوليتسيانى كۇدىكتى رەتىندە جاۋاپقا تارتۋ تۋرالى وتىنىشپەن جۇگىندى. دينا سمايلوۆا سونىمەن بىرگە تەرگەۋ ناتيجەلەرىن كوپشىلىككە جاريالاۋدى تالاپ ەتتى.
سمايلوۆانىڭ ايتۋىنشا، وقيعا شىلدە ايىنىڭ باسىندا بولعان. قىلمىسقا كۇدىكتى پوليتسيا قىزمەتكەرى ءوزىنىڭ قىزمەتتىك جاعدايىن پايدالانىپ، كامەلەتكە تولماعان سيااجايداعى كورشىسىن قورقىتىپ، جىنىستىق قاتىناسقا تۇسۋگە ماجبۇرلەگەن. پوليتسيا قىزمەتكەرى جابىرلەنۋشىنى ماريحۋانا شەككەنى ءۇشىن قىلمىستىق ايىپتاۋلارمەن قورقىتقان.
«NeMolchi.kz» قوعامدىق قورى، سمايلوۆانىڭ مالىمدەۋىنشە، جابىرلەنۋشىنىڭ كۇدىكتى پوليتسيا قىزمەتكەرىمەن WatsApp مەسسەندجەرىندە حات الماسقانى، داۋىستىق جازبالارى، وقيعا بولعان كۇنى پودەزد كامەرالارىنان الىنعان بەينە جازبالار بار ەكەنىن مالىمدەدى. وقيعادان ءبىر اپتا وتكەننەن كەيىن قىز ءوزىنىڭ اناسىنا بالقاش پوليتسياسىنا ارىز جازباقشى بولعانىن، باسىنان وتكەن وقيعا تۋرالى ايتتى.
پوليتسيا قىزدىڭ اناسىنا ءوز قىزمەتكەرىنە قارسى ءىس قوزعاي المايتىندىقتارىن ايتىپ، قۇجاتتاردى قاراعاندى وبلىسى پوليتسيا دەپارتامەنتىنىڭ ىشكى قاۋىپسىزدىك باسقارماسىنا جولدادى. ءبىر كۇن وتكەن سوڭ، زورلاۋعا كۇدىكتى پوليتسيا قىزمەتكەرى قۇقىق قورعاۋ ورگاندارىنان شىعارىلدى.
وڭعار قابدەن،
"ادىرنا" ۇلتتىق پورتالى
