«مەنى سايلاعان سەندەر ەمەس!» دەگەن دەپۋتات بوجكو "قۇدايىن ۇمىتقان با" ؟

5593
Adyrna.kz Telegram

الەۋمەتتىك جەلى دەگەن قىزىق قوي، جالپى. اقپاراتتىڭ، ايعاي-شۋدىڭ قايناعان ورتاسى. سول الەۋمەتتىك جەلىدە ءبىزدىڭ شەندى-شەكپەندىلەردىڭ دە ءبىرازى "وتىرادى". راسىمەن وزدەرى وتىر ما، جوق الدەكىمدى «وتىرعىزعان با»، ونى ءبىلۋ قيىنداۋ. دەسەك تە، كىمنىڭ كىم ەكەنىن جازباسىنان تانىتاتىن وسى الەۋمەتتىك جەلىدە دەپۋتات ۆلاديمير بوجكو وتە بەلسەندى «وتىرادى». ءاربىر پىكىرگە جاۋاپ بەرىپ، ەسەسىن ەشكىمگە جىبەرمەۋگە جانتالاسىپ تا وتىراتىنىن انىق بايقاۋعا بولادى.

مىنە، وسى دەپۋتاتىڭىز تاياۋدا فەيسبۋك جەلىسىندە قوعام بەلسەندىلەرىمەن قىزۋ ايتىستى. ايتىسقاندا دا، بوجكو ءتىپتى، اشىنا ايتىستى. «كانيكۋلدا نە ءبىتىرىپ جاتسىڭدار؟» دەگەن قوعام بەلسەندىسى باحىتجان تورەعوجينانىڭ سۇراعىنا بۇرقىراي جونەلگەن بوجكو: «سەندەرگە ەسەپ بەرۋگە مىندەتتى ەمەسپىن! مەنى سايلاعان سەندەر ەمەس!» دەپ سالدى. مۇنى از كورسەڭىز، ۆاكەڭ: «ءسىز قۇرمەتتىم ءبىر نارسەنى شاتاستىرىپ وتىرعان سياقتىسىز. ماعان داۋىس بەرگەن جوقسىز، سايلاۋشىم ەمەسسىز. جۇمىس بەرۋشىم دە ءسىز ەمەس» دەپ شورت كەسىپتى. بوجكونىڭ بۇلاي كۇركىرەۋى كىمنىڭ ارقاسىندا؟دەپۋتات حالىق قالاۋلىسى دەپ جالاۋلاتامىز. قالاپ العان دەپۋتاتىمىزدىڭ سيقى وسى ما؟

مىنا ءبىر جازباسىنا نازار اۋدارىپ كورىڭىز. بوجكو سىناعىش ازاماتتار تۋرالى جازادى دا، ونىڭ سول  پوستىنا ساكە ازامات دەگەن كىسى بار بولعانى «دارداي شەنەۋنىكسىز. نەگە سونشا قاتە، قيسىنسىز جازاسىز؟ بالكىم، سىزگە ساۋاتتى جازاتىن كومەكشى العان ءجون بولار» دەگەن سىڭايدا پىكىر قالدىرادى.  بۇل پىكىرگە بوجكوڭىز اتىلىپ شىعىپ «سىزدەرگە ەشتەڭە جاقپايدى. رەسەيلىكتەردىڭ قازاقستاندىقتارعا كومەك بەرگەنى دە جاقپايدى. ءسىز سياقتىلارعا ۋكراينانىڭ قوقىسقا تولعان كورىنىسى ۇنايدى» دەپ باستاپ، ۇزاققا دەيىن توقتاي المايدى. رەسەيلىك، رەسەي تۋرالى ازاماتتىڭ جازباسىنان ەشتەڭە بايقاماساق تا، بوجكونىڭ مىناۋ جازباسى ونىڭ بۇيرەگىنىڭ قايدا بۇراتىنىن كورسەتپەي مە؟ ۋكراينانىڭ بۇل جەردە قاتىسى قانشا؟ ءسوزىنىڭ سوڭىن ۆاكەڭ «ءسىز سياقتىلار ەل باسقارۋعا كەلسە، ەلدى قۇردىمعا كەتىرەدى» دەگەن سىڭايدا قورىتادى. اۋ، سوندا قالاي؟ ەلدى قۇردىمعا جىبەرمەي وتىرعان بوجكو ما، «بوجكو تەكتەستەر» مە؟ ءوز انا تىلىمدە قاتەسىز جازامىن دەگەن ازاماتتىڭ ءسوزى مە، ءوزى مە بوجكونىڭ شامىنا تيگەن؟ الدە تۇپكى ماقساتى بيلىك باسىنا قازاق تىلىندە ساۋاتتى جازا بىلەتىندەر جولاماسىن دەگەنى مە؟

 

 

 

 

 

 

 

 

 

 

بۇعان دەيىن قىزمەت ەتكەن  ءنان مەكەمەلەردە دە بوجكونىڭ بەتىنەن قايتارار پارمەن شىقپاعان. قازىر دە ءدال سولاي ەكەن. كانيكۋلىندا نە ىستەيدى، نەمەن اينالىسادى حالىقتىڭ شارۋاسى بولماۋعا ءتيىس. ەسەسىنە سول قارا حالىقتىڭ ەسەبىنەن اي سايىن ميلليون تەڭگەگە جۋىق جالاقى الىپ ءجۇر. ءسىز بەن ءبىزدىڭ سالىققا تولەگەن اقشامىز بوجكولاردىڭ جالاقىسىن قۇرايتىنىن بىلسەك تە، ءاربىر تيىنعا سۇراۋ سالۋعا حاقىمىز جوق. بوجكو نە ايتقىسى كەلەدى، ايتا سالادى. نە ىستەگىسى كەلسە دە، ودان ەسەپ سۇراۋعا ەشكىمنىڭ قۇقىعى جوق.

بىراق بوجكونىڭ جالاقىسى تۇتاس ساقتالىپ، قاجەت بولسا، ەسەلەپ وسە بەرۋى كەرەك.  كارانتين دەپ ۇيدە قامالىپ، جۇمىسسىز، اقشاسىز، ەندىگى اشىعا باستاعان حالىقپەن بوجكونىڭ دا ءىسى جوق، حالىقتىڭ دا بوجكودا شارۋاسى بولماۋى كەرەك. بوجكو تەك شەنەۋنىك كرەسلوسىن اداسپاي، ءدال تاۋىپ بارىپ، جايعاسسا كۋانىپ، شۇكىر ايتىپ وتىرا بەرۋىمىز كەرەك-اۋ؟ ءدارى تاپپاي ساندالساق تا، كورشىنىڭ سۋىنا تۇنشىعىپ جاتساق تا، اۋرۋدان ءار بۇرىشتا ءولىپ جاتساق تا، بوجكولارعا ءۇن قاتۋعا حاقىمىز جوق ەكەن. ولاي بولسا، بىزگە مۇنداي دەپۋتاتتار نە ءۇشىن قاجەت؟ ايىنا ميلليونداپ جالاقىسىن تولەپ، كرەسلوعا قونجيتىپ وتىرعىزىپ قويۋ ءۇشىن بە؟ حالىقپەن ءىسى جوق، حالقىنا ەسەپ بەرمەيتىن دەپۋتاتتار سوندا كىمگە كەرەك؟

مەرۋەرت حۋساينوۆا،

"ادىرنا" ۇلتتىق پورتالى

پىكىرلەر