گونكونگ سوڭعى كەزگە دەيىن Covid-19 پاندەمياسىنا قارسى كۇرەستە ەڭ ۇلگىلى ەل بولىپ سانالىپ كەلدى.
العاشقى اۋرۋ قىتاي مەن گونكونگ شەكاراسىنان شىققانىنا قاراماستان، گونكونگتا ينفەكتسيالىق اۋرۋ سانى از بولدى. قىتاي، ەۋروپا جانە اقش-تاعىداي ەنگىزىلگەن قاتاڭ شەكتەۋ شارالارىنان اۋلاق بولدى.
بىراق قازىر گونكونگ ەكىنشى ەمەس، ءۇشىنشى ينفەكتسيا تولقىنىنا تاپ بولدى. ۇكىمەت اۋرۋحانالار وتە قيىن جاعدايعا دۋشار بولۋى مۇمكىن ەكەنىن ەسكەرتتى جانە ءبىر كۇندە جاڭا ينفەكتسيالار سانى رەكوردتىق كورسەتكىشكە جەتتى.
نەگە بۇلاي بولدى؟ پاندەميادان، وقشاۋلانۋدان تۋىنداعان ەكونوميكالىق اۋىرتپالىققا شىرمالعان ەلدەرگە ساباق بولار جايت بار ما؟
كارانتيننەن شىعۋ جانە كەتكەن كەمشىلىكتەر
گونكونگتا ءبىرىنشى Covid-19 جۇقتىرۋ وقيعاسى قاڭتاردىڭ اياعىندا تىركەلدى. مۇنى العاشقى تولقىن دەپ ەسەپتەگەن ەلدە قاتتى الاڭداۋشىلىق بولدى، بىراق ينفەكتسيانىڭ سانى سالىستىرمالى تۇردە تومەن بولىپ، ونىڭ تارالۋى تەز باقىلاۋعا الىندى.
«ەكىنشى تولقىنى» ناۋرىز ايىندا شەتەلدىك ستۋدەنتتەر مەن تۇرعىنداردىڭ ەلىنە ورالا باستاعاننان كەيىن بولدى. وسى ورالۋلار ينفەكتسيانىڭ وسۋىنە الىپ كەلدى.
ناتيجەسىندە، گونكونگ بارلىق رەزيدەنت ەمەستەرگە جانە شەكاراسىنا شەتەلدەن كىرۋگە تىيىم سالاتىن قاتاڭ باقىلاۋدى ەنگىزدى، قايتىپ كەلگەن ادامداردىڭ بارلىعىنا Covid-19 سىناعىنان ءوتىپ، 14 كۇندىك كارانتيننەن ءوتۋ كەرەك بولدى.
ءتىپتى جاڭا كەلگەندەردى باقىلاۋعا الۋعا جانە ولاردىڭ ۇيدە بولعانىنا كوز جەتكىزۋ ماقساتىندا ەلەكتروندىق بىلەزىكتەردى دە قولداندى.
سونداي-اق، ماسكالاردىڭ كەڭىنەن قولدانىلۋى جانە ادامداردىڭ قاشىقتىقتى ساقتاۋ شارالاردى ورىنداۋىنىڭ ارقاسىندا گونكونگتاعى ءومىر قالىپتى كۇيگە ورالعانداي بولدى.
سونىمەن، توعىز كۇن قاتارىنان 100-دەن استام ادامنىڭ كوروناۆيرۋسپەن اۋىرعانى، «ءۇشىنشى تولقىنى» قالاي پايدا بولدى؟
گونكونگ «اۋقىمدى» ءورشۋ قارساڭىندا
گونكونگ ۋنيۆەرسيتەتىنىڭ ۆيرۋسولوگيا كافەدراسىنىڭ مەڭگەرۋشىسى ماليك پەيريس:
-بۇل كۇتپەگەن جانە اشۋعا تيەرلىك جاعداي. بار جاعدايدى باقىلاۋدا ۇستاعان جۇيەدە ەكى كەمشىلىك بولدى. بىرىنشىدەن، ورالمانداردىڭ كوپشىلىگى ۇيدەگى 14 كۇندىك كارانتيندە جاتقانىمەن، كارانتين لاگەرلەرىندە تۇرمادى. ۇلىبريتانيا مەن باسقا ەلدەردەگىدەي كەڭىنەن تارالعان ۇيلەردە تۇردى. ۇيدەگى ادامدار ەشقانداي شەكتەۋگە ىلىكپەدى، قايدا بارسا دا ءوز ەركىمەن ءجۇردى.
ەكىنشىدەن، گونكونگ 200 000-عا جۋىق ادامدى، ونىڭ ىشىندە تەڭىزشىلەردى، اۆياتسيالىق ەكيپاجداردى جانە بيرجادا تىركەلگەن كومپانيالاردىڭ باسشىلارىن كارانتيننەن بوساتتى.
ۇكىمەت بۇل بوساتۋدى گونكونگتا كۇندەلىكتى جۇمىستىڭ قالىپتى ءجۇرۋىن قامتاماسىز ەتۋ ءۇشىن ولاردىڭ كەلۋى قالانىڭ ەكونوميكالىق دامۋىنا قاجەت بولدى دەپ ءتۇسىندىردى.
گونكونگ حالىقارالىق قالا جانە ساۋدا پورتى بولعاندىقتان، بۇل جەردە اۋە، كەمە قاتىناسى كوپ. سوندىقتان، كوپتەگەن كەمەلەر مەن ۇشاقتاردا ەكيپاجداردى اۋىستىرادى. بۇعان قوسا بۇل ايماق قىتايدان جانە باسقا جەرلەردەن ازىق-تۇلىك جانە قاجەتتى تاۋارلار يمپورتىنا تاۋەلدى.
جۇقپالى اۋرۋلار جونىندەگى مامان جانە دارىگەر دجوزەف تسانگ تا «جوعارىدا اتاعان تەكسەرىستەن بوساتۋدى» ينفەكتسيانىڭ تارالۋ قاۋپىن ارتتىردى دەپ سيپاتتايدى. «اسىرەسە، تەڭىزشىلەر مەن اۋە ەكيپاجدارى تۋريستىك ورىندارعا بارىپ، قوعامدىق كولىكتى پايدالانعان».
العاشىندا ۇكىمەت كارانتيندىك بوساڭسىتۋعا كىنالى ەمەسپىز دەگەن. كەيىنىرەك، اۋرۋدىڭ ءورشۋى تەكسەرۋدەن بوساتۋعا قاتىستى بولعانى دالەلدەنگەن سوڭ كىناسىن مويىندادى. قازىر ۇكىمەت اۋە جانە تەڭىز ەكيپاجدارىنداعى ەرەجەلەردى كۇشەيتتى، بىراق ونى ورىنداۋ قيىن بولۋى مۇمكىن.
وسى اپتانىڭ باسىندا ءبىر شەتەلدىك ۇشقىشتىڭ Covid-19 سىناعىنىڭ ناتيجەلەرىن كۇتىپ ءجۇرىپ، كورىكتى جەرلەرگە بارعانى تۋرالى ايتىلدى.
ۆۆس اقپارات اگەنتتىگىنەن اۋدارعان: ناعيما بازارقىزى،
"ادىرنا" ۇلتتىق پورتالى
