قازاقستاندا كوروناۆيرۋس ينفەكتسياسى تارالعالى بەرى 8518 مەديتسينا قىزمەتكەرى وسى ىندەتتى جۇقتىرسا، 51 قىزمەتكەر قايتىس بولدى.
ناۋرىز ايىندا اقپارات جانە قوعامدىق دامۋ ءمينيسترى داۋرەن اباەۆ دارىگەرلەرگە مەملەكەت تاراپىنان جان-جاقتى كومەك كورسەتىلەتىنىن ايتتى.
«مەديتسينا قىزمەتكەرلەرىنىڭ دەنساۋلىعى مەن ءومىرىن ساقتاندىرۋ ماسەلەسى دە پىسىقتالدى. ولار اۋىرىپ قالعان جاعدايدا 2 ملن تەڭگە مولشەرىندە ساقتاندىرۋ تولەمى بەرىلەدى. قۇداي ساقتاسىن، ەگەر ولار قايتىس بولعان جاعدايدا 10 ملن تەڭگە كولەمىندە تولەماقى بەرىلەدى»، - دەدى مينستر.
ارادا 4 اي وتكەندە مەملەكەتتىك الەۋمەتتىك ساقتاندىرۋ قورى ( ماسق) ءبىر جولعى تولەم الۋعا 123 مەديتسينا قىزمەتكەرىنىڭ ءوتىنىش بەرگەنىن، ولاردىڭ 113-نە ءبىر جولعى تولەم تولەنگەنىن حابارلادى.
ايتا كەتەر ءبىر جايت، اۋرۋ جۇقتىرعان دارىگەر كوروناۆيرۋستى ناۋقاستى ەمدەۋ بارىسىندا جۇقتىرعانىن دالەلدەۋ كەرەك. ولىمگە اكەلگەن جاعدايى دا سولاي دالەلدەنۋ كەرەك. سول سەبەپتى جەرگىلىكتى دەنساۋلىق ساقتاۋ باسقارمالارىنىڭ ارنايى كوميسسيالارى تولەماقى ءوتىنىشىن قاناعاتتاندىرۋى دا، قاناعاتتاندىرماۋى دا مۇمكىن. كەيبىر دارىگەرلەر ءوتىنىش جازعان ادامدى تەرگەپ-تەكسەرەتىنىن، اقشا بەرمەۋدىڭ امالىن جاسايتىنىن ايتادى.
كۇنى كەشە ورتالىق كوممۋنيكاتسيالار قىزمەتىندە وتكەن ءباسپاسوز كونفەرەنتسياسىندا تسوي مىرزا وسى تولەماقى جونىندە ماندىتىپ ەشتەڭە دەي المادى. بۇل سۇراققا جالعىز تسوي ەمەس، بىرنەشە شەندىنىڭ جاۋاپ بەرە الماي قينالىپ كەتكەنىن بىلەمىز. مەملەكەت ۋادە ەتكەن نارسەنى تولىقتاي بەرۋگە مىندەتتى ەمەس پە؟ ەندەشە ونى نەگە ساعىزشا سوزىپ ءجۇر؟ قايتىس بولعاندارعا وتەماقى سول كۇيى بەرىلمەي كەتە مە؟ جوعارىدا اتالعان 8515 قىزمەتكەردىڭ 113-ءى عانا قىزمەت بارىسىندا كوروناۆيرۋس جۇقتىرعان با؟ سوندا 8402 دارىگەر ۆيرۋستى قالاي جۇقتىرعان؟... كوكەيدە وسى سەكىلدى سان ساۋالدار تۇر. ازىرگە وعان جاۋاپ بەرەر ادام تابىلماي تۇر.
ال قايتىس بولعان دارىگەرلەرگە ماراپاتتار عانا تابىستالىپ ءجۇر. ازىرگە شىمكەنت اكىمى مۇرات ايتەنوۆ ءوز وبلىسىندا قايتىس بولعان دارىگەرلەردىڭ وتباسىنا 1 ملن تەڭگەدەن كومەك بەردى. اكىمنىڭ سوزىنشە، بۇل قاراجات مەملەكەت تاراپىنان بەرىلەتىن 10 ملن وتەماقىدان تىس جاسالىپ جاتقان كومەك.
ەل اراسىندا جەرگىلىكتى اۋرۋحانا باسشىلارى بەرىلۋى ءتيىس 2 ملن تەڭگەنىڭ ءبىراز بولىگىن ءوز قالتاسىنا سالىپ الۋى مۇمكىن ەكەنىن ايتۋدا. تولەنەتىن تولەماقى ءۇشىن دارىگەرلەر باسشىلىقتىڭ قىسىمىنا ۇشىراماۋ كەرەك. سول سەبەپتى، تولەماقى مەن وتەماقى الاتىن دارىگەرلەردىڭ اتى-ءجونى ءباسپاسوز بەتىندە جاريالانۋى ءتيىس دەپ ەسەپتەيمىز. جەمقورلىقتىڭ الدىن الۋعا بۇدان وزگە جول جوق.
جانبولات سارىقاسقا
