تامىزدىڭ 20 سىنان كەيىن ەلىمىزدە ارنايى «ءبىلىم» تاريفى قوسىلادى. بايلانىس سالاسىنداعى مەملەكەتتىك ساياسات جانە ينفراقۇرىلىم دەپارتامەنتىنىڭ ديرەكتورى گۇلنار بوكەەۆا ءتيىمدى ءتاريفتى ەلىمىزدىڭ بارلىق ۇيالى بايلانىس وپەراتورى ەنگىزەتىنىن ءمالىم ەتتى.
"مۇعالىم" نەمەسە "وقۋشىنىڭ" قوسىلۋ شارتتارىن ءبىلىم جانە عىلىم مينيسترلىگى انىقتايدى. بۇل ماسەلە ءالى پىسىقتالۋدا. وقىتۋشىلار مەن وقۋشىلاردىڭ شاكىرتتەردىڭ ءتىزىمى بەرىلۋى مۇمكىن", - دەيدى گۇلنار بوكەەۆا.
«ءبىلىم» تايفتىك جوسپارى 380 وتاندىق ءبىلىم بەرۋ رەسۋرستارىنا ءليميتسىز جۇيەدە جالعانباق. ياعني، وسى تاريفكە قوسىلۋ ارقىلى الداعى جاڭا وقۋ جىلىندا قاشىقتان وقىتۋ ماسەلەسى شەشىلەدى.
«ءبىلىم» ءتاريفىنىڭ ابونەنتتىك تولەمى ايىنا 990 تەڭگە. دەمەك، قاشىقتان ءبىلىم الۋدىڭ قۇنى 990 تەڭگە بولماق. 2,6 ملن وقۋشى قاشىقتان ءبىلىم السا، كەزەكشى سىنىپتار بويىنشا 530 مىڭ، شتاتتى رەجيمدە157 مىڭنان استام بالا ءبىلىم الادى.
ەندى ەسەپتەپ قارايىق، 990 تەڭگەنى 2,6 ملن وقۋشىعا كوبەيتىڭىز. ايىنا 2,5 ميلليارد (!) تەڭگە شىعادى.تۆ ارقىلى ءبىلىم الۋ دا تەگىن بولمايتىنىن ەسكەرسەك، بۇل دەگەنىڭىز قر «ءبىلىم تۋرالى» زاڭىنىڭ 8 بابى، 2 تارماعىن بەلدەن باسۋ ەمەس پە؟
«مەملەكەت قازاقستان رەسپۋبليكاسى ازاماتتارىنىڭ تەگىن مەكتەپالدى، باستاۋىش، نەگىزگى ورتا، جالپى ورتا ءبىلىم الۋىن، تۇلەكتەرگە ءبىر ماماندىق شەڭبەرىندە جۇمىسشى بىلىكتىلىگىن نەمەسە جۇمىسشى بىلىكتىلىكتەرىن بەرە وتىرىپ، تەحنيكالىق جانە كاسىپتىك ءبىلىم الۋىن، سونداي-اق، اسكەري، ارناۋلى وقۋ ورىندارىندا الىناتىن ءبىلىمدى قوسپاعاندا، ەگەر قازاقستان رەسپۋبليكاسىنىڭ ازاماتى وسى دەڭگەيلەردىڭ ارقايسىسىندا ءبىرىنشى رەت ءبىلىم الاتىن بولسا، مەملەكەتتىك ءبىلىم بەرۋ تاپسىرىسىنا سايكەس كونكۋرستىق نەگىزدە تەگىن تەحنيكالىق جانە كاسىپتىك، ورتا بىلىمنەن كەيىنگى، جوعارى جانە جوعارى وقۋ ورنىنان كەيىنگى ءبىلىم الۋىن قامتاماسىز ەتەدى» دەپ كورسەتىلگەن اتالعان زاڭدا.
ايىنا ءار وقۋشى 990 تەڭگەدەن تولەپ ءبىلىم السا، تەگىن ءبىلىم دەگەنى قايسىسى بولماق؟
سونىمەن قاتار، بۇل رەتتە مۇعالىمدەردىڭ دە «ءبىلىم» تاريفىنە قوسىلاتىنىن ەستەن شىعارمايىق. سوندا وقۋشى مەن مۇعالىم اي سايىن قانشا ميلليارد تەڭگەگە ءبىلىم الادى؟
مەرۋەرت حۋساينوۆا،
«ادىرنا» ۇلتتىق پورتالى.
