بۇل جونىندە شىمكەنت قالاسىنىڭ اكىمى مۇرات ايتەنوۆ ازاماتتاردى جەكە ماسەلەلەرى بويىنشا ونلاين قابىلداۋ كەزىندە ايتتى.
قالا باسشىسىنىڭ ونلاين قابىلداۋىندا بولعان اقپان ءجۇمادىللا - اقتاس-2 شاعىن اۋدانىنداعى ينفراقۇرىلىم جانە ينتەرنەت ماسەلەسىن ءسوز قىلدى.
«اقتاس-2 شاعىن اۋدانىنا اۋىز سۋ، تابيعي گاز بەرىلۋى بويىنشا اۋدان اكىمدىگىنە ءوتىنىش بەرىلگەن. الايدا ءالى كۇنگە دەيىن ماسەلەمىز شەشىلمەي كەلەدى جانە جاڭا وقۋ جىلىنا قاراي ينتەرنەت جايى دا شەشىلسە ەكەن»، - دەدى ول.
مۇرات ايتەنوۆ اتالعان شاعىن اۋدانعا اۋىز سۋ جۇرگىزۋ ءۇشىن جوبالىق سمەتالىق قۇجاتتارى دايىندالىپ جاتقانىن جەتكىزدى.
«تابيعي گاز جەلىسى قۇرىلىسىنىڭ جوباسى ازىرلەنىپ، ماۋسىم ايىندا جۇمىستار باستالعان. ساراپتاما قورىتىندىسى شىقسا، بيۋدجەتتەن قارجى قارالىپ، گاز قۇبىرلارىن تارتۋ جۇمىستارى جۇرگىزىلەدى. ال ينتەرنەتكە كەلەر بولساق، قالادا 43 نۇكتەگە بايلانىس ستانتسياسىن ورناتۋ جۇمىستارى جۇرگىزىلۋدە. سونىڭ ىشىندە اقتاس-2 شاعىن اۋدانىنا دا ورناتىلاتىن بولادى» - دەيدى اكىم.
سونداي-اق، ونلاين قابىلداۋى بارىسىندا جەر ۋچاسكەسىن زاڭسىز باسقا ازاماتتارعا بەرىلگەنىن ايتقان ۇلبولعان مەلدەباەۆانىڭ ماسەلەسىن قالا اكىمى جەكە باقىلاۋىنا الدى. مۇرات دۇيسەنبەكۇلى تۇرعىننىڭ ارىزى بويىنشا قر اۋىلشارۋاشىلىعى مينيسترلىگىنىڭ جەر رەسۋرستارىن باقىلاۋ كوميتەتىنە ءتيىستى تەكسەرۋ جۇرگىزۋ ءۇشىن حات جولدانعانىن، تەكسەرۋ ناتيجەسى بويىنشا زاڭعا سايكەس جۇمىس جۇرگىزىلەتىنىن ايتتى.
قالا اكىمىنىڭ ازاماتتاردى ونلاين قابىلداۋى بارىسىندا جول قۇرىلىسى، تۇرعىن ءۇي كەزەگىنە قاتىستى تۇرعىنداردىڭ ارىز-شاعىمى تىڭدالدى. مۇرات ايتەنوۆ باسقارما باسشىلارىنا زاڭ اياسىندا ءتيىستى شارا قولدانىپ، ازاماتتاردىڭ ساۋالىنا وڭتايلى جاۋاپ بەرىلۋىن تاپسىردى.
شىمكەنت قالاسى اكىمىنىڭ ءباسپاسوز قىزمەتى
