Būl jönınde Şymkent qalasynyŋ äkımı Mūrat Äitenov azamattardy jeke mäselelerı boiynşa onlain qabyldau kezınde aitty.
Qala basşysynyŋ onlain qabyldauynda bolǧan Aqpan Jūmadıllä - Aqtas-2 şaǧyn audanyndaǧy infraqūrylym jäne internet mäselesın söz qyldy.
«Aqtas-2 şaǧyn audanyna auyz su, tabiǧi gaz berıluı boiynşa audan äkımdıgıne ötınış berılgen. Alaida älı künge deiın mäselemız şeşılmei keledı jäne jaŋa oqu jylyna qarai internet jaiy da şeşılse eken», - dedı ol.
Mūrat Äitenov atalǧan şaǧyn audanǧa auyz su jürgızu üşın jobalyq smetalyq qūjattary daiyndalyp jatqanyn jetkızdı.
«Tabiǧi gaz jelısı qūrylysynyŋ jobasy äzırlenıp, mausym aiynda jūmystar bastalǧan. Saraptama qorytyndysy şyqsa, biudjetten qarjy qaralyp, gaz qūbyrlaryn tartu jūmystary jürgızıledı. Al internetke keler bolsaq, qalada 43 nüktege bailanys stansiiasyn ornatu jūmystary jürgızılude. Sonyŋ ışınde Aqtas-2 şaǧyn audanyna da ornatylatyn bolady» - deidı äkım.
Sondai-aq, onlain qabyldauy barysynda jer uchaskesın zaŋsyz basqa azamattarǧa berılgenın aitqan Ūlbolǧan Meldebaevanyŋ mäselesın qala äkımı jeke baqylauyna aldy. Mūrat Düisenbekūly tūrǧynnyŋ aryzy boiynşa QR auylşaruaşylyǧy ministrlıgınıŋ jer resurstaryn baqylau komitetıne tiıstı tekseru jürgızu üşın hat joldanǧanyn, tekseru nätijesı boiynşa zaŋǧa säikes jūmys jürgızıletının aitty.
Qala äkımınıŋ azamattardy onlain qabyldauy barysynda jol qūrylysy, tūrǧyn üi kezegıne qatysty tūrǧyndardyŋ aryz-şaǧymy tyŋdaldy. Mūrat Äitenov basqarma basşylaryna zaŋ aiasynda tiıstı şara qoldanyp, azamattardyŋ saualyna oŋtaily jauap berıluın tapsyrdy.
Şymkent qalasy äkımınıŋ baspasöz qyzmetı
