قايىرىمدىلىق - قايىرلى ءىس. ەلىمىزدە 4 مىڭعا جۋىق اتا-اناسىنىڭ قامقورلىعىنسىز قالعان بالا، 367 مىڭ از قامتىلعان وتباسى، 698 مىڭ مۇمكىندىگى شەكتەۋلى جان بار. ولاردىڭ بارلىعى دا كومەككە ءزارۋ. ءبىر قۋانتارلىعى، سوڭعى جىلدارى قايىرىمدىلىق قورلارىنىڭ سانى جىل ساناپ ءوسىپ كەلەدى. مۇقتاج جاندارعا كومەكتەسىپ، يگى ىستەردى اتقارىپ جۇرگەن سونداي قورلاردىڭ ءبىرى - «ىزەتتى ءىس». نەگىزگى ماقساتى - مۇمكىندىگىنشە مۇقتاج جاندارعا جاردەمدەسۋ، بالالارعا شاتتىق سىيلاۋ.
ستۋدەنتتەردىڭ باستاماسىمەن قۇرىلعان «ىزەتتى ءىس» قايىرىمدىلىق قورى بۇگىندە ءبىراز جانعا كومەك قولىن سوزىپ ۇلگەردى. «ادىرنا» ۇلتتىق پورتالى قور ۇيىمداستىرۋشىسى مۇقاسان بەردىحانمەن اڭگىمەلەستى.
- ءبىز ەرىكتى تۇردە نيەتتەس قىز-جىگىتتەر بولىپ، مۇقتاج ادامدارعا كومەكتەسەيىك دەگەن نيەتپەن بىرىككەن ەدىك. باستاپقىدا قور اشامىز دەگەن ماقسات بولمادى. كەيىننەن قاتارىمىز كوبەيىپ،جوبالارىمىز مەن ماقساتتارىمىز اۋقىمدىراق بولا باستاعاننان سوڭ قور رەتىندە قۇرىلۋدى ءجون سانادىق. 2019 جىلدىڭ 9 جەلتوقسانىندا رەسمي مەملەكەتتىك تىركەۋدەن وتتىك.
قازىرگى تاڭدا «ىزەتتى ءىستىڭ» كوپبالالى وتباسىلار مەن مۇمكىندىگى شەكتەۋلى جاندارعا كومەكتەسەتىن «باقىتتى وتباسى»، بالالارىنىڭ ءۇيىنىڭ تاربيەلەنۋشىلەرىمەن جۇمىستاناتىن «ءسابي» جانە ءارتۇرلى قايىرىمدىلىق اكتسيالارىن ۇيىمداستىراتىن «مەيىرىمدى قالا» اتتى ۇلكەن جوبالارى بار.
سۇحبات بارىسىندا مۇقاسان مىرزا قايىرىمدىلىق جاساۋ ءۇشىن شىنايى نيەتتىڭ جەتكىلىكتى ەكەنىن اتاپ ءوتتى.
- قايىرىمدىلىق شارالارىن ۇيىمداستىرۋدىڭ ەشقانداي دا قيىندىعى جوق. كەيدە كىشكەنتاي عانا ماسەلەلەر شىعىپ قالىپ جاتادى. بۇل ىسپەن ەرىكتى تۇردە، شىن نيەتپەن اينالىسىپ جۇرگەندىكتەن ولاردى توسقاۋىل رەتىندە سانامايمىز.
قايىرىمدىلىق ءبىر-بىرىنە ۇقسامايتىن، بىراق الەمدى بىرگە جاقسارتۋدى ماقسات ەتكەن جانداردى بىرىكتىرەدى.
- كوماندامىزدا 50-دەن استام ەرىكتى بار. ولار الماتى، تاراز، جەتىساي قالالارىندا كوپ شوعىرلانعان. ءبىز ەرىكتىلەرگە ناقتى ءبىر تالاپ قويمايمىز. مورالدىق، ماتەريالدىق كومەگىم تيسە بولدى دەگەن ءاربىر جان قاتارىمىزعا قوسىلا الادى.
«ىزەتتى ءىستىڭ» قۇرىلعانىنا 1 جىل بولدى.
- وسى ۋاقىت ارالىعىندا مۇقتاج جاندارعا مۇمكىندىگىمىزشە سەپتىگىمىزدى تيگىزۋگە تىرىستىق. ءبىز ەڭ الدىمەن كومەككە ءزارۋ ادامداردىڭ جاعدايىمەن تانىسامىز، ولاردان ستاتۋسىن راستايتىن قۇجاتتارىن ۇسىنۋىن وتىنەمىز.
قور ماقتارال اۋدانىنداعى سۋ تاسقىنىنان زارداپ شەگىپ، ءۇي قۇجاتتارى دۇرىس بولماي، مەملەكەت نازارىنان تىس قالعان 10 وتباسىعا ءۇي قۇرلىسىنا كەرەك دەگەن زاتتارىن، ال 20 وتباسىعا تۇرمىسقا قاجەتتى زاتتاردى الىپ بەردى جانە "موللا يسمايل" مەشىتىنىڭ قۇرلىسىنا كومەكتەستى. سونداي-اق، رامازان ايىندا الەۋمەتتىك جاعدايى تومەن 50 وتباسىعا ازىق-تۇلىك پەن اۋىزاشار ءمازىرىن تاراتتىق.
بۇل «ىزەتتى ءىس» جاساعان يگى ىستەردىڭ ءبىر پاراسى عانا.
- قورعا كومەكتەسىپ جۇرگەن مەتسەناتتار جوق، بىراق ءبىرشاما تۇراقتى سالىمشىلارىمىز بار.
«ىزەتتى ءىس» قايىرىمدىلىق قورى ءاربىر قايىرىمدىلىق شاراسىنان سوڭ مىندەتتە تۇردە ەسەپ بەرىپ وتىرادى. ەرىكتى بولامىن، قايىرىمدىلىق جاسايمىن دەسەڭىزدەر، مارحابات. جاقسىلىق جاساپ جارىسايىق!
ديانا اسان،
«ادىرنا» ۇلتتىق پورتالى
