ەلباسى بايبەككە 100 مىڭ وتباسىعا كومەك بەرۋدى تاپسىردى

592

"نۇر وتان" پارتياسىنىڭ توراعاسى نۇرسۇلتان نازارباەۆ باۋىرجان بايبەكتى قابىلدادى، دەپ حابارلايدى "ادىرنا" ءتىلشىسى. قابىلداۋ كەزىندە جۋىردا وتكەن پرايمەريزدىڭ ناتيجەلەرى تالقىلاندى.

پارتيا توراعاسى ءبىرىنشى ورىنباسارىنىڭ اقپاراتىنا سايكەس، پارتيا مۇشەلەرىنىڭ 84,2 پايىزى داۋىس بەرۋگە قاتىستى. ونىڭ 88 پايىزى ونلاين رەجيمىندە داۋىس بەردى. تىركەلگەن 10073 كانديداتتىڭ 36 پايىزدان استامى ايەلدەر، ال 29 پايىزى 35 جاسقا دەيىنگى جاستار. ىشكى پارتيالىق ىرىكتەۋ ناتيجەسىندە 20 مىڭنان استام ۇسىنىس جينالدى. ونىڭ ىشىندە تۇرعىن ءۇي قاتىناستارى مەن تۇرعىن ءۇي-كوممۋنالدىق شارۋاشىلىعى، ينفراقۇرىلىم مەن كولىك، ءبىلىم بەرۋ مەن دەنساۋلىق ساقتاۋ سالالارىنا قاتىستى ۇسىنىستار بار.

نۇرسۇلتان نازارباەۆ پرايمەريز ساباقتاستىقتى ساقتاي وتىرىپ، پارتيا قاتارىن جاڭارتۋعا مۇمكىندىك بەرگەن ناعىز الەۋمەتتىك ليفتكە اينالعانىن اتاپ ءوتتى.

– بۇل ءبىراز ادام قاتىسقان پارتيانىڭ اۋقىمدى ءىس-شاراسىنا اينالدى. ءبىز ونى العاش رەت وتكىزىپ وتىرمىز. پارتيا نازار اۋدارۋعا ءتيىس كوپتەگەن ۇسىنىس پەن ماسەلە كوتەرىلدى. «Nur Otan» – ناقتى ىستەر پارتياسى. ءبىز قابىلداعان باعدارلامالار مىندەتتى تۇردە ورىندالۋى كەرەك، – دەدى ەلباسى.

سونىمەن قاتار قازاقستاننىڭ تۇڭعىش پرەزيدەنتى پارتيانىڭ سايلاۋالدى باعدارلاماسىنىڭ جوباسىنا جەكە توقتالدى.

– ساياسي كەڭەستىڭ بيۋروسىندا رەسپۋبليكالىق سايلاۋالدى باعدارلامانىڭ جوباسىن تالقىلاعان ەدىك. قازىرگى كۇردەلى احۋال ەسكەرىلە وتىرىپ، باعدارلامادا ءبىزدىڭ ماقساتتار بەن اۋقىمدى مىندەتتەر بەكىتىلدى. بۇل جۇمىسقا پارتيانىڭ بارلىق مۇشەلەرى جۇمىلدىرىلادى. سەبەبى، مۇنىڭ ءبارى حالىقتىڭ ءال-اۋقاتىن جاقسارتۋعا باعىتتالىپ وتىر. ءبىزدىڭ سايلاۋ الدىنداعى ۋادەلەرىمىزدىڭ ءبارىن ورىنداۋ ءۇشىن جان-جاقتى قامدانۋ كەرەك، – دەدى پارتيا توراعاسى.

كەزدەسۋ بارىسىندا ەلباسى پارتياعا «Birgemiz» قورىمەن بىرلەسىپ، بۇكىل ەل بويىنشا تاعى 100 مىڭ الەۋمەتتىك از قامتىلعان وتباسىعا 50 مىڭ تەڭگە كولەمىندە قوسىمشا تولەمدەر ۇيىمداستىرۋدى تاپسىردى.

– پارتيانىڭ ورتالىق اپپاراتى مەن ءبىزدىڭ اكتيۆ اۋقىمدى جۇمىس ىستەدى. مەن ولارعا قاجىرلى ەڭبەگى ءۇشىن العىسىمدى بىلدىرەمىن. الدا ءالى اتقاراتىن شارۋا كوپ. ەل يگىلىگىنە باعىتتالعان جۇمىستى جالعاستىرۋىمىز كەرەك، – دەدى قازاقستاننىڭ تۇڭعىش پرەزيدەنتى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى