25 قازان كۇنى رەسەيدىڭ ساراتوۆ وبلىسىنىڭ دەرگاچي قالاسىندا قازاق جانە كۇرد دياسپورالارى وكىلدەرى اراسىندا قاقتىعىس ءورشي تۇسكەن. بۇل جايىندا "ادىرنا" ۇلتتىق پورتالى "سارينفورم" سايتىنا سىلتەمە جاساپ حابارلايدى.
«سارينفورم»-نىڭ حابارلاۋىنشا، قاقتىعىس 21 قازان كۇنى بولعان. ماسەلە جاس قازاق بالاسىن اسكەرگە اتتاندىرار ساتتە تۋعان. اقپارات كوزى ايتىپ وتكەندەي، «ماس كۇيدەگى» ءارتۇرلى ۇلتتار اراسىندا توبەلەس شىعىپ، كەيىننەن جانجالعا ولاردىڭ جاقتاۋشىلارى دا قوسىلعان. جانجال تۋعان كەزدە دەرگاچيدە تۇراتىن كۇردتەر «وزدەرىنىڭ اعايىندارىنان» كومەك سۇراعان.
«ەكى جاقتان «اقساقالدار» كەلگەننەن كەيىن عانا جينالعان كۇردتەر مەن قازاقتاردى تىنىشتاندىرۋ مۇمكىن بولدى. اتاپ ايتقاندا، قازاق قاۋىمداستىعىنان قوعامداستىق جەتەكشىلەرىنىڭ ءبىرى بولدى. وقيعا ورنىنا پوليتسيا دا كەلدى.
كەلەسى كۇنى پوليتسيا بولىمىندە قوعامداستىق جەتەكشىسى قاقتىعىستى قوزدىرۋشى كۇردتىڭ اكەسىمەن كەزدەستى. تاراپتار جانجالدى شەشۋگە كومەكتەسەتىن بولىپ جانە ولار ءبىر-بىرىنە ەشقانداي تالاپ قويمايتىنداي كەلىسىم جاسادى»، - دەگەن دەرەككوزدە.
اقپاراتتا 25 قازان كۇنى تاعى دا جانجالدىڭ قايتا تۋعاندىعى تۋرالى ايتىلعان.
سونداي-اق: «بۇگىن باسقا ايماقتاردان كۇردتەر دەرگاچيعا جەرگىلىكتى قازاقتارمەن كەزدەسۋ ءۇشىن كەلدى. ولار بۇل ايماقتا قازاقتار ۇلتتىق ارازدىقتى قوزدىرادى، ال كۇردتەردىڭ مىندەتى – بىر-بىرىنە كومەكتەسۋ جانە ولاردى رەنجىتكىزبەۋ ەكەندىگىن ايتتى»، - دەپ كورسەتىلگەن.
«سارينفورم» حابارلاۋىنشا، بۇگىن تاعى دا ۇلتارالىق شيەلەنىس ءورشي تۇسكەن. كەشكە ساراتوۆ وبلىسىنىڭ ۆيتسە-گۋبەرناتورى يگور پيۆوۆاروۆ قۇقىق قورعاۋ ورگاندارى باسشىلارىمەن بىرگە دەرگاچيگە بارعان.
ۆيتسە-گۋبەرناتور: «ولار (جانجالداسقاندار - رەد.) بىردەڭە جاساۋعا تىرىسقان، بىراق پوليتسيا ۋاقىتىندا جۇمىس ىستەدى، ءبىز كەتىپ قالدىق، قازىر كەزەكشى بار – بارى تىنىش»، - دەپ جاعدايدى مالىمدەگەن.
رف ىشكى ىستەر مينيسترلىگىنىڭ ساراتوۆ وبلىسى بويىنشا باس باسقارماسى: «24 قازاندا پوليتسيا قىزمەتكەرلەرى ساراتوۆ وبلىسىنىڭ دەرگاچي اۋدانىنىڭ تۇرعىندارى اراسىنداعى جانجالدى توقتاتتى. جەدەل ارەكەت ەتۋ جانە قابىلدانعان شارالار ناتيجەسىندە قوعامدىق ءتارتىپتى بۇزۋعا جول بەرىلمەدى، قاقتىعىسقا قاتىسۋشىلار اراسىندا زارداپ شەككەندەر بولعان جوق. قازىرگى ۋاقىتتا بۇل فاكتى بويىنشا تەكسەرۋ ءجۇرىپ جاتىر»، - دەپ حابارلاعان.
فوتو اشىق دەرەككوزدەن الىندى
«ادىرنا» ۇلتتىق پورتالى
