داڭقتى قازاق بوكسشىسى قانات يسلام (27-0, 21 كو) - رۋحتى سپورتشى رەتىندە جانكۇيەرلەرى اراسىندا وتە تانىمال. الايدا، " قانات يسلام الەمدەگى ەڭ مىقتى بوكسشىلار قاتارىنا كىرە المايدى", - دەيدى امەريكالىق WorldBoxingNews سايتىنىڭ رەداكتورى فيل دجەي.
2012 جىلى وتكەن لوندون وليمپياداسىنا بارۋدى ماقسات تۇتقان ونىڭ جولىن قىتايلار كەسكەن ەدى. سەبەپ: قازاقستانداعى قاعازباستىلىق كەسىرىنەن ەل ازاماتتىعىن الا الماي ءبىراز ۋاقىت جوعالتىپ العاندىقتان قىتايلىق وليمپيادا كوميتەتى ونىڭ قازاقستان اتىنان لوندونعا جولداما بەرۋگە تاباندى قارسى شىققان ەدى.
جوعارىدا اتاپ وتكەن فيل دجەي Vesti.kz تىلشىسىنە بەرگەن سۇحباتىندا: "قانات يسلام قازىر 36 جاستا. ءبىر جىل بويى جۇدىرىقتاسپادى، ال ۋولتەرمەن كەيىنگى جەكپە-جەگىندە ونشا جاقسى كورىنبەدى. ودان نە كۇتەسىزدەر؟ مەنىڭشە، ونىڭ بولاشاعى وتە زور ەدى، بىراق، ەليتاعا شىعۋ مۇمكىندىگىن جىبەرىپ الدى. وعان جاراقاتتار نەمەسە باسقا جاعدايلار بوگەت بولدى ما، ول جاعىن بىلمەيمىن. ايتايىن دەگەنىم، ول ۋاقىتىن ەركىن جۇمسايتىنداي جاس ەمەس.
بىرنەشە تاماشا جەكپە-جەك كورسەتەرىنە كۇمانىم جوق، الايدا، ۇلى اتانا الماس. ول مىقتى جانە بولاشاعى زور بولعان بوكسشى رەتىندە ەستە قالادى", - دەيدى.
اۋەسقوي بوكستا بەيجىڭ وليمپياداسىندا 69 كەلى سالماق بويىنشا قولا القا تاققان ول، 2012 جىلعى لوندون وليمپياداسىنا بارۋ مۇمكىندىگىنەن اريىرىلعان سوڭ، ەلىمىزدەگى "استانا ارلانس" كلۋبىندا بىرەر جىل تاماشا ونەر كورسەتتى. الاڭ تورىنەن جارقىراي كورىندى. سودان كوپ وتپەن كاسىپقوي بوكسقا ءبىرجولا اۋىستى، امەريكا تورىندە شارشى الاڭنىڭ شاڭىن قاقتى، قارسىلاس شاق كەلتىرمەدى. تەك سوڭعى بىرەر جىلدىقتا نە سەبەپ بولعانى بەلگىسىز، جەكپە-جەك الاڭدارىنان كورىنبەي كەتكەنى جانكۇيەرلەرىنە تۇسىنىكسىز بولىپ تۇر..
ۇلاربەك دالەيۇلى،
"ادىرنا" ۇلتتىق پورتالى
