ازەربايجان ساربازىنىڭ سوڭعى ءسوزى (ۆيدەو)

2393

ارمەنيانىڭ ارانداتۋ سوعىسىنىڭ 27 قىركۇيەكتەن 5 قاراشاعا دەيىنگى شابۋىلىنان ازەربايجاننىڭ  92 بەيبىت تۇرعىن قازا تاۋىپ، 404 ادامى جارالاندى. ال مايداندا قانشا ءازەربايجان جاۋىنگەرىنىڭ قازا تاپقانى ازىرگە جاريالانعان جوق. الايدا ولاردىڭ ارقايسىسى ازاتتىق ءۇشىن، ءوز جەرىن باسقىنشىلاردان بوساتۋ ءۇشىن شايقاسىپ جاتىر.

ازەربايجان ازاماتتارى سوڭعى 30 جىلدا ءوز ۇيلەرىنە ورالىپ، اتا-بابالارى جەرلەنگەن جەردە دۇعا وقۋدى ويلادى. بىراق بۇل كوپشىلىك ءۇشىن قازىردىڭ وزىندە ارمان بولىپ وتىر. سەبەبى ۇيلەر مەن زيراتتاردى ارميان باسقىنشىلارى قيراتىپ تاستاعان.

بۇگىندە جاس جاۋىنگەرلەر ۇياتتى قانمەن جۋىپ، 30 جىل بۇرىن ءوز جەرىنەن كەتۋگە ءماجبۇر بولعانداردىڭ ابىرويى ءۇشىن شايقاسقا بارادى. سولاردىڭ ءبىرى شەشۋشى شايقاس الدىندا وتباسىمەن قوشتاسقان 28 جاستاعى شاحين دەگەن ازامات.

«جاقىندا شەشۋشى شايقاس بولادى. ەگەر مەن ەلگە امان-ەسەن ورالسام، قازىر ايتقاندارىمدى تىڭداۋدىڭ قاجەتى جوق.

مەن بارىنەن، اسىرەسە ايەلىم كامالادان، ماعان بىردەڭە بولا قالسا، جىلاماۋدى سۇرايمىن. مەن ءۇشىن جىلاما!

كامالا، ەگەر ءبىزدىڭ ۇلىمىز بولسا، ونىڭ اتىن مەنىڭ قۇرمەتىمە شاحين دەپ قوي. بالالارعا اكەسىنىڭ ولاردى قاتتى جاقسى كورەتىنىن ايت. سونداي-اق بالالاردى قاتتى جاقسى كورگەندىكتەن، ولار ءۇشىن جانىن بەرۋگە ءازىر ەكەنىن ەسكەرت.

بالكىم مۇنىڭ ءبارىن جاساۋدىڭ قاجەتى جوق شىعار دەپ ۇمىتتەنەمىن. ويتكەنى مەن ءوز مىندەتىمدى ورىنداپ، ۇيگە ورالامىن. ەگەر ەلگە امان-ەسەن ورالماسام، وندا مەن ءوزىمنىڭ دۇنيەگە كەلەتىن ۇلىم مەن اعا-اپكەلەرىمنىڭ بالالارى ءۇشىن ءوز ءومىرىمدى قيدى دەپ ويلاڭىزدار. بالالار جارقىن ءومىر ءسۇرىپ، باستارىن تىك ۇستاپ ءجۇرۋى كەرەك.

مىنە سول ءۇشىن مەن وسى شەشۋشى شايقاسقا بارا جاتىرمىن.

...ءبىز قازىردىڭ وزىندە شابۋىلعا دايىنبىز. ەندى ءبىز تەلەفونداردى تاپسىرامىز...

اناشىم، اكە، مەن سىزدەردى قاتتى جاقسى كورەمىن! مەن ءاردايىم سىزدەردىڭ مەن ءۇشىن ماقتاناعاندارىڭىزدى ارماندايتىنمىن!

مەن بۇكىل وتباسىمنان، بارلىق تۋىستارىمنان، جاقىندارىمنان «ارقاشان باسىڭدى جوعارى ۇستا، ەشقاشان ەڭكەيمە» دەپ سۇرايمىن. مەن بۇل ءۇشىن ولۋگە دايىنمىن.

سىزدەردىڭ بەرگەن تاربيە ماعان قاشۋعا نەمەسە جاسىرىنۋعا جول بەرمەيدى.

ءشاحيننىڭ شىندىق پەن ادىلدىك ءۇشىن شايقاسقا بارا جاتقانىن بىلگەندەرىڭىزدى قالايمىن. مەن جەرىمىزدى ازات ەتەمىن! ءسۇيدىم سىزدەردى.

اتا-انام مەن وتباسىم مەنى قالاي جاقسى كورسە، مەنىڭ ايەلىم مەن بالالارىمدى دا سولاي جاقسى كورگەنىن قالايمىن. شاحين ءاردايىم سىزدەردىڭ ەسىڭىزدە قالادى. سىزدەر ماعان قالاي تىرەك بولدىڭىزدار، ءدال سولاي مەنىڭ ايەلىم مەن بالالارىما تىرەك بولىڭىزدار، سوندا بالالارىم اكەسىز ءوسۋدىڭ نە ەكەنىن بىلمەيتىن بولادى. مۇنى سىزدەردەن ءوتىنىپ سۇرايمىن.

ءسۇيدىم.

قۇدىرەتى شەكسىز جاراتۋشى سەندەردى قورعاسىن!

مەن سەندەردى وتە قاتتى جاقسى كورەمىن.

مەن كەتتىم…»

ورىس تىلىنەن اۋدارىپ،

دايىنداعان سەرىك جولداسباي.

«ادىرنا» ۇلتتىق پورتالى.

 

 

پىكىرلەر
رەداكتسيا تاڭداۋى