فۋتبولدان قازاقستان قۇراماسى ۇلتتار ليگاسىندا ليتۆادان جەڭىلدى. الماتىنىڭ ورتالىق ستاديونىندا وتكەن ويىن 1:2 ەسەبىمەن اياقتالدى، - دەپ حابارلايدى "ادىرنا" ۇلتتىق پورتالى Vesti.kz-گە سىلتەمە جاساپ.
بۇل ويىندا ەسەپتى ءبىزدىڭ قۇرامانىڭ ويىنشىلارى اشقان بولاتىن. 38-مينۋتتا ابات ايىمبەتوۆ ناتيجەلى سوققىمەن كوزگەن ءتۇستى. بىراق قازاقستان قۇراماسى باسىمدىقتى كوپ ۇستاپ تۇرا المادى. ارادا ەكى مينۋت وتكەن سوڭ قوناقتار ستاس پوكاتيلوۆتىڭ قاقپاسىنا گول سوعىپ، ەسەپتى تەڭەستىردى. كوزگە تۇسكەن - مودەستاس ۆوروبيوۆاس. ال ەكىنشى تايمنىڭ اياقتالار تۇسىندا ليتۆا قۇراماسى جەڭىس گولىن سوقتى. بۇل جولى ارۆيداس نوۆيكوۆاس كوزگە ءتۇستى.
ەكىنشى تايمدا قازاقستان قۇراماسى ءبىر ويىنشىعا كەم وينادى. ماتچتىڭ 50-مينۋتىندا يسلامبەك قۋات ەكىنشى سارى قاعازىن الىپ، الاڭنان قۋىلدى.
بۇل جەڭىلىستەن كەيىن قازاقستان قۇراماسى س ليگاسىنىڭ 4-توبىندا سوڭعى ورىندا قالدى. ەندى تومەنگى ديۆيزيونعا ءتۇسىپ كەتپەۋ ءۇشىن ءبىزدىڭ قۇراما تاعى ءبىر كەزدەسۋ وتكىزەدى. بيىل ۇلتتار ليگاسىندا ميحال بيلەك جاتتىقتىراتىن قۇرامامىز ءتورت ۇپايعا قول جەتكىزە الدى.
ايتا كەتەيىك، بۇل باس باپكەر ميحال بيلەك ءۇشىن ۇلتتىق قۇراماداعى سوڭعى ويىنى بولۋى مۇمكىن. سەبەبى كەيبىر باق وكىلدەرى چەح مامانىن جۋىردا قىزمەتىنەن كەتەتىنىن جازىپ جاتىر.
سۋرەت قفف
