«قايرات» فۋتبول كلۋبى ۋەفا چەمپيوندار ليگاسىنىڭ جالپى كەزەڭىندەگى ءوز الاڭىنداعى ويىندارعا بيلەت ساتۋ ءتارتىبىن جاريالادى، دەپ حابارلايدى "ادىرنا" ۇلتتىق پورتالى.
كلۋبتىڭ مالىمەتىنشە، «قايرات» – «رەال مادريد» كەزدەسۋى ءۇشىن بيلەتتەر 23 قىركۇيەكتە، الماتى ۋاقىتىمەن 17:00-دە ساتىلىمعا شىقپاق. ولاردى كلۋبتىڭ رەسمي سايتى، Ticketon سەرۆيسى جانە Qairat SuperApp ءموبيلدى قوسىمشاسى ارقىلى ساتىپ الۋعا بولادى.
ءار جانكۇيەر ءبىر جسن بويىنشا ەكى بيلەتتەن ارتىق الا المايدى. دەرەكتەر ساتىپ الۋ كەزىندە دە، ستاديونعا كىرەردە دە تەكسەرىلەدى.
بيلەتتەردىڭ باعاسى ۋەفا تالاپتارىنا ساي 30 000 تەڭگەدەن 250 000 تەڭگەگە دەيىن بەلگىلەنگەن. سونداي-اق الەۋمەتتىك جانە كلۋبتىق كۆوتا بويىنشا بيلەتتەردىڭ ءبىر بولىگى «قايرات» اكادەمياسىنىڭ ويىنشىلارى مەن جاتتىقتىرۋشىلارىنا، پاراليمپيادالىق سپورت وكىلدەرىنە، كلۋب ارداگەرلەرى مەن قىزمەتكەرلەرىنە ۇلەستىرىلەدى. قولدانىستاعى سەرىكتەستىك كەلىسىمدەر اياسىندا دەمەۋشىلەرگە دە بەلگىلى ءبىر كۆوتا قاراستىرىلعان.
فك «قايرات» جانكۇيەرلەردى ساق بولۋعا شاقىرىپ، الەۋمەتتىك جەلىلەردە بيلەتتەردىڭ الدىن الا ساتىلىمى تۋرالى جالعان اقپارات تاراپ جاتقانىن ەسكەرتتى. بيلەتتەردى تەك رەسمي ارنالار ارقىلى ساتىپ الۋ عانا ولاردىڭ تۇپنۇسقالىعىن جانە ستاديونعا كىرۋ قۇقىعىن قامتاماسىز ەتەدى.
