فرانتسيا قۇراماسى فۋتبولدان الەم چەمپيوناتىنىڭ جارتىلاي فينالىندا جەڭىلگەننەن كەيىن ەلدىڭ بىرقاتار قالاسىندا تارتىپسىزدىكتەر بولدى، دەپ حابارلايدى «ادىرنا» ءتىلشىسى.
وۆەرن — رونا — ءالپى ايماعى اكىمشىلىگىنىڭ مالىمەتىنشە، فرانتسيا – يسپانيا ماتچى اياقتالعاننان كەيىن ليون قالاسىنداعى بەلكۋر الاڭىنا نەگىزىنەن جاستاردان قۇرالعان توپ جينالعان.
بيلىك تاراتقان مالىمدەمەدە توپ مۇشەلەرىنىڭ قۇقىق قورعاۋ ورگاندارى قىزمەتكەرلەرىنە ءتۇرلى زاتتار لاقتىرعانى ايتىلعان. وقيعا ورنىنا كەلگەن پوليتسيا قىزمەتكەرلەرى تارتىپسىزدىككە قاتىسۋشىلاردى ۇستاعان.
جەرگىلىكتى بۇقارالىق اقپارات قۇرالدارىنىڭ دەرەگىنشە، ليونداعى قاقتىعىستار كەزىندە 20 ادام ۇستالعان. سونىمەن قاتار گيوتەر اۋدانىندا ءبىر ادامنىڭ وق جاراقاتىن الۋ فاكتىسى بويىنشا جۇرگىزىلىپ جاتقان تەرگەۋ اياسىندا تاعى ءبىر كۇدىكتى قولعا تۇسكەن. پاريج پوليتسياسىنداعى دەرەككوزدەردىڭ حابارلاۋىنشا، استانا مەن ونىڭ ماڭىنداعى اۋدانداردا 141 ادام ۇستالعان.
ەسكە سالايىق، كەشە اقش-تىڭ داللاس قالاسىندا 2026 جىلعى فۋتبولدان الەم چەمپيوناتىنىڭ جارتىلاي فينالى وتكەن بولاتىن. وندا يسپانيا قۇراماسى فرانتسيانى 2:0 ەسەبىمەن جەڭىپ، ءتۋرنيردىڭ فينالىنا جولداما العان ەدى.
