پارلامەنت ءماجىلىسىنىڭ جالپى وتىرىسىندا «اق جول» فراكتسياسىنىڭ دەپۋتاتتارى قالا ماڭىنداعى ءىرى ەلدى مەكەندەردىڭ دامۋ كونتسەپتسياسىن قايتا قاراۋدى ۇسىندى، دەپ حابارلايدى قازاقپارات ءتىلشىسى. «ەلىمىزدە سوڭعى جيىرما جىلدا تۇرعىلىقتى مەكەنجايىن اۋىستىرىپ، كوشكەندەردىڭ سانى كۇرت ءوستى. ستاتيستيكا كوميتەتىتىنىڭ ەسەبىنە جۇگىنسەك، وتكەن جىلدىڭ ءبىرىنشى جارتىسىندا 500 مىڭنان استام قازاقستان ازاماتى ەل ىشىندە قونىس اۋدارعان. وسىنىڭ ناتيجەسىندە قازاقستان قالالارىندا حالىق كوپ شوعىرلانعان اگلومەراتسيالار مەن جاڭا اۋىلدار پايدا بولدى. مىسالى، سوڭعى 10 جىلدا شىمكەنت قالاسىنىڭ ماڭىنا 500 مىڭنان اسا حالىق تابان تىرەسە، شىعىستا وسكەمەن قالاسىنىڭ بۇرىنعى ساياجايلارى قازىر 100 مىڭنان اساتىن تۇرعىنى بار قالا ماڭىنداعى اۋىلعا اينالدى. بۇل ۋربانيزاتسيا پروتسەسى ەلىمىزدىڭ بارلىق وبلىسىنا ءتان. ساراپشىلاردىڭ پىكىرىنشە، ىشكى ميگراتسيا ارى قاراي وسەتىن بولادى»، - دەدى دەپۋتات بەرىك دۇيسەنبينوۆ ۇكىمەت باسشىسى اسقار ءماميننىڭ اتىنا جولداعان ساۋالىندا. وسى ورايدا ىشكى ميگراتسيا كوپتەگەن الەۋمەتتىك ماسەلەنى تۋعىزىپ وتىر. «استانامىزدىڭ اينالاسىنداعى تۇرعىندارىنىڭ سانى 25 مىڭنان 50 مىڭعا دەيىن جەتەتىن جاڭا اۋىلداردا ءالى كۇنگە دەيىن جاستار بوس ۋاقىتىندا باسقوسۋ وتكىزەتىن، سپورتپەن شۇعىلداناتىن بىردە-ءبىر سپورتزال نەمەسە مادەنيەت وشاعى سالىنباعان. جەڭىس پەن جەڭىلىستىڭ ءدامىن تاتپاعان، سپورتپەن شىنىقپاعان، تاربيەسى كەم بولعان ءجاسوسپىرىم رۋحاني دا، فيزيكالىق تۇرعىدان دا ناشار، وزىنە سەنىمسىز، وسال بولادى. ءوزى سياقتىلاردان توپ قۇرىپ، قالتاسىنا پىشاق سالىپ، قىلمىسقا بارۋىنىڭ ءبىر سەبەبى دە وسى. قاراڭعىدا توپتالىپ كوشە كەزبەي، قۇرداستارىمەن بىرگە كوكپار تارتىپ، بوز كىلەمدە كۇرەسىپ، الاڭدا فۋتبول ويناپ، سپورتتىڭ اششى تەرىن تاتقان بوزبالا قىلمىسكەر بولماس ەدى. ويتكەنى سپورت دەگەن – قارسىلاسىن قۇرمەتتەي ءبىلۋدى ۇيرەتەتىن تاربيە كوزى... وسى ورايدا، بۇل پروبلەمامەن تەك قۇقىق قورعاۋ ورگاندارى عانا اينالىسىپ، ونىڭ شىن سەبەپتەرى كولەنكەدە قالا بەرە مە؟»، - دەدى دەپۋتات. بۇل تۇرعىدا «اق جول» دەپۋتاتتارى ىشكى ميگراتسيا ماسەلەسىنە بايلانىستى جەرگىلىكتى اكىمدىكتەر مەن ۇكىمەتتى ءتيىستى قادامدار جاساۋعا شاقىردى. «ءبىزدىڭ ويىمىزشا، قالا ماڭىنداعى، اۋىلداردان كەلگەن جاستارعا قىمبات، قۇنى ميللياردتان اساتىن سالتاناتتى سپورت سارايلارى ەمەس، قولجەتىمدى، تەگىن ىستەيتىن سپورتزالدار، مەكتەپتەردىڭ مۇمكىندىگىن پايدالانۋعا جول اشۋىمىز كەرەك»، - دەدى بەرىك دۇيسەنبينوۆ. وسى ايتىلعانداردى ەسكەرە وتىرىپ، نۇر-سۇلتان، الماتى، شىمكەنت اگلومەراتسيالارىنىڭ جانە وبلىس ورتالىقتارىن قورشاعان ءىرى ەلدى مەكەندەردىڭ دامۋ كونتسەپتسياسىن قايتا قاراۋ ۇسىنىلدى. «ۇلتتىق مۇددەنى ەسكەرىپ جانە جەرگىلىكتى تۇرعىندارمەن اقىلداسا وتىرىپ، قالا ماڭىنا ورنالاسقان حالىق سانى كوبەيىپ كەلە جاتقان اۋىلداردى قولجەتىمدى، پايدالانۋعا ىڭعايلى، قاراپايىم مادەني جانە سپورت وبەكتىلەرىمەن قامتاماسىز ەتۋدىڭ جاڭا باعدارلاماسىن قابىلداۋدى سۇرايمىز»، - دەدى دەپۋتات.
«اق جول» دەپۋتاتتارى قالا ماڭىنداعى ءىرى ەلدى مەكەندەردىڭ دامۋ كونتسەپتسياسىن قايتا قاراۋدى ۇسىندى
24.11.2020
1736
باسقا ماتەريالدار
Adyrna.kz ұлттық порталының маңызды ақпараттарына жазылу
Соңғы жаңалықтар туралы хабардар болыңыз