ەستەرىڭىزدە بولسا، وسىدان 2 اي بۇرىن تۇركىستان وبلىسى، سايرام اۋدانى، قارابۇلاق ەلدى مەكەنىندە «Total bet» بۋكمەكەرلىك كەڭسەسىنىڭ قارقىندى تۇردە جۇمىس جاساپ جاتقانىن حابارلاعان ەدىك.«ادىرنا» ۇلتتىق پورتالىنىڭ ارالاسۋىمەن «ءاسيا» ساۋدا ورتالىعىندا ورنالاسقان كەڭسە بىرنەشە كۇننەن سوڭ ءوز جۇمىسىن توقتاتتى.
الايدا اۋىل تۇرعىندارىنىڭ قۋانىشتارى كوپكە سوزىلماعان. ولاردىڭ ايتۋىنشا، «Total bet» ءوز ورنىن اۋىستىرىپ، جۇمىسىن قايتا جانداندىرعان.
«وسى بۋكمەكەرلىك كەڭسە تالاي شاڭىراقتى شايقالتتى. بەلشەدەن قارىزعا باتتىق. جابىلدى دەپ توبەمىز كوككە جەتكەندە اكىمدىككە قاراما-قارسى كافەنىڭ جانىنان قايتا اشىلعان. قالاي اكىمدىك بۇل سوراقىلىقتى بايقامايدى؟»،-دەدى اتىن جاسىرۋدى وتىنگەن قارابۇلاق تۇرعىنى.
اۋىلداسىنىڭ پىكىرىن ءتورت بالانىڭ اناسى ايگۇل ماراتقىزى دا (اتى- ءجونى وزگەرتىلدى – رەد.) قولدادى.
– اۋىل جىگىتتەرى سول جەردەن شىقپايدى. ۇيىمىزدە اقشا دا قالمادى. جولداسىمنىڭ بار تاپقانى سول جاققا كەتەدى. شىنى كەرەك، جانايقايىمىزدى اشىق ايتۋعا قورقامىز. ءوزىمنىڭ بەسىنشى بالاما اياعىم اۋىر، ەشقايدا شىعا المايمىن. ءبىز ويىنحانانىڭ جابىلعانىن قالايمىز. قاراپايىم حالىقتىڭ تىلەگى جوعارى جاققا جەتسە ەكەن.
ءبىز ماسەلەنىڭ انىق-قانىعىنا جەتۋ ماقساتىندا قارابۇلاق اۋىلدىق وكرۋگى اكىمىنىڭ ورىنباسارى باحتيار ابدۋكاريمۇلىنا حابارلاستىق.
«اۋىل تۇرعىندارىنىڭ تاراپىنان ەشقانداي شاعىم كەلىپ تۇسپەدى. الداعى ۋاقىتتا سايرام اۋداندىق پوليتسيا جانە مەملەكەتتىك كىرىستەر باسقارماسىنا حات جولداپ، بۋكمەكەرلىك كەڭسە جۇمىسىنىڭ زاڭدى نە زاڭسىز ەكەنىن انىقتاۋعا ىقپال ەتۋلەرىن سۇرايمىز»،-دەپ سەندىردى ول.
ديانا اسان،
«ادىرنا» ۇلتتىق پورتالى
