Esterińizde bolsa, osydan 2 aı buryn Túrkistan oblysy, Saıram aýdany, Qarabulaq eldi mekeninde «Total bet» býkmekerlik keńsesiniń qarqyndy túrde jumys jasap jatqanyn habarlaǵan edik.«Adyrna» ulttyq portalynyń aralasýymen «Ásııa» saýda ortalyǵynda ornalasqan keńse birneshe kúnnen soń óz jumysyn toqtatty.
Alaıda aýyl turǵyndarynyń qýanyshtary kópke sozylmaǵan. Olardyń aıtýynsha, «Total bet» óz ornyn aýystyryp, jumysyn qaıta jandandyrǵan.
«Osy býkmekerlik keńse talaı shańyraqty shaıqaltty. Belsheden qaryzǵa battyq. Jabyldy dep tóbemiz kókke jetkende ákimdikke qarama-qarsy kafeniń janynan qaıta ashylǵan. Qalaı ákimdik bul soraqylyqty baıqamaıdy?»,-dedi atyn jasyrýdy ótingen Qarabulaq turǵyny.
Aýyldasynyń pikirin tórt balanyń anasy Aıgúl Maratqyzy da (aty- jóni ózgertildi – red.) qoldady.
– Aýyl jigitteri sol jerden shyqpaıdy. Úıimizde aqsha da qalmady. Joldasymnyń bar tapqany sol jaqqa ketedi. Shyny kerek, janaıqaıymyzdy ashyq aıtýǵa qorqamyz. Ózimniń besinshi balama aıaǵym aýyr, eshqaıda shyǵa almaımyn. Biz oıynhananyń jabylǵanyn qalaımyz. Qarapaıym halyqtyń tilegi joǵary jaqqa jetse eken.
Biz máseleniń anyq-qanyǵyna jetý maqsatynda Qarabulaq aýyldyq okrýgi ákiminiń orynbasary Bahtııar Abdýkarımulyna habarlastyq.
«Aýyl turǵyndarynyń tarapynan eshqandaı shaǵym kelip túspedi. Aldaǵy ýaqytta Saıram aýdandyq polıııa jáne memlekettik kirister basqarmasyna hat joldap, býkmekerlik keńse jumysynyń zańdy ne zańsyz ekenin anyqtaýǵa yqpal etýlerin suraımyz»,-dep sendirdi ol.
Dıana ASAN,
«Adyrna» ulttyq portaly
