اقمولا وبلىسىنىڭ تۇرعىنى، 70 جاستاعى اجەي پوليتسيا قىزمەتكەرلەرىنە ۇلىن تاۋىپ بەرگەنى ءۇشىن العىسىن ءبىلدىردى. ىزدەۋ جۇمىستارىنا ۋچاسكەلىك ينسپەكتورلاردىڭ الەۋمەتتىك جەلىلەردە تاراتقان حابارلاماسى ۇلكەن كومەك بولىپتى.
استراحان اۋدانىنىڭ ورتالىعى استراحانكا اۋىلىندا 7 مىڭعا جۋىق ادام تۇرادى. سول سەبەپتى مۇندا ءۇش بىردەي ۋچاسكەلىك پوليتسيا ينسپەكتورى قىزمەت كورسەتەدى. ادام جوعالدى دەگەن حابار تۇسكەندە ولاردان بولەك اۋداندىق پوليتسيا ءبولىمىنىڭ كەزەكشىلىكتەگى جەكە قۇرامى دا جۇمىلدىرىلدى.
«قاراشانىڭ 25-ءى كۇنى كەزەكشى بولىمگە زويا اباسوۆا ەسىمدى 70 جاستاعى ايەل تەلەفون شالدى. «كەشە كەشكە ساعات 21.00-دە ۇلىم سەرگەي ۇيدەن شىعىپ كەتىپ ەدى، سودان حابار جوق. بالىققا كەتتى دەپ ەستىدىم. مۇز ءالى بەكىمەگەن، سۋعا باتىپ كەتەدى عوي. بۇرىن مۇنداي ايتپاي كەتەتىنى جوق ەدى. ۇيگە دە تەز ورالاتىن» دەپ قاتتى الاڭداۋلى انا ۋايىمىن ايتتى. وسىنىڭ الدىندا عانا ءبىزدىڭ اۋداندا 3 بالىقشى جوعالىپ، ءبىرى باتىپ كەتكەن بولاتىن. ول تۋرالى رەسپۋبليكالىق اقپارات قۇرالدارىنا دەيىن جازدى»، – دەيدى اقمولا وبلىسى استراحان اۋداندىق پب استراحانكا اۋىلدىق ۋچاسكەلىك پوليتسيا ينسپەكتورى، پوليتسيا كاپيتانى ءسالىمجان ەرجانوۆ.
سودان ىزدەۋ جۇمىستارىنا كىرىسىپ كەتكەن توپ اۋىل تۇرعىندارىنا سۇراۋ سالىپ، ونىڭ دوستارىنان، مولودەجنىي كوشەسىندەگى كورشىلەردەن جاۋاپ العان. الەۋمەتتىك جەلىلەردە اۋدان حالقىمەن بايلانىسىپ وتىراتىن توپتارعا دا شۇعىل حابارلاما جىبەرگەن. وزەندى جاعالاپ، بالىقشىلار وتىرادى-اۋ دەگەن جەرلەردى شولىپ شىققان. كەزدەسكەن بالىقشىلاردان سۇراعان. بىراق ەكى كۇن بويى حابار شىقپايدى.
«سودان ءۇشىنشى كۇن دەگەندە الەۋمەتتىك جەلىدەگى توپقا ول كىسىنىڭ قايدا جۇرگەنى تۋرالى حابار كەلىپ ءتۇستى. جەدەل ەكيپاجبەن سول مەكەنجايعا قاراي جونەلدىك. كەلسەك، سەرگەيدىڭ ءوزى حاباردى ەستىپ، ۇيىنە بارعالى ماشيناعا وتىرىپ جاتىر ەكەن. سودان اناسىنا حابارلاپ، وزىنەن جاۋاپ الىپ، قانداي دا ءبىر قۇقىقبۇزۋشىلىققا نەمەسە قىلمىسقا قاتىسى جوعىن تەكسەردىك. ءوزى جاساماسا دا، ۇشىراپ قالۋى مۇمكىن دەگەن نۇسقالارىن دا قارادىق. ايتسە دە، 41 جاستاعى بويداق جىگىت قوي، كوڭىل كوتەرگىسى كەلگەن بولار. ءوزى دە اناسىن ۋايىمداتىپ قويعانىنا وكىنىشىن ءبىلدىردى. تەكسەرۋدەن كەيىن ونى امان-ەسەن وتباسىنا تابىستادىق»، – دەيدى ۋچاسكەلىك پوليتسيا ينسپەكتورى الماس كۋپەشەۆ.
پوليتسيا قىزمەتكەرلەرىنىڭ حالىقپەن بارلىق مۇمكىندىكتى پايدالانىپ، ەتەنە جاقىن بولا تۇسكەنى قۇپتارلىق ءىس. اسىرەسە، ۋچاسكەلىك پوليتسيا ينسپەكتورلارىنىڭ WhatsApp مەسسەندجەرىندە اۋىلداستار توبىنا قوسىلىپ، ولارمەن ەمەن-جارقىن سۇحباتتا بولۋى اۋىلدا بۇرىننان قالىپتاسقان ادەت ەكەن. ءتىپتى، وسى سوڭعى وقيعا سياقتى الەۋمەتتىك جەلىنىڭ ارقاسىندا كەيبىر قىلمىستاردىڭ ءىزى سۋىماي اشىلعان ۋاقىتى دا بولىپتى.
«اۋىلىمىزدا كوپ قىلمىس بولا بەرمەيدى. مال باعىپ، ەگىن ەككەن شارۋا جاندار بولعاندىقتان، ولاردىڭ ارتىق قاق-سوقپەن ءىسى جوق. كوبىنە تۇرمىستىق-وتباسىلىق جانجالدار جانە مال ۇرلىعى ءجيى كەزدەسەدى. وندايدا مەسسەندجەرلەردىڭ كومەگى كوپ. مال جوعالىپ كەتتى دەپ حابار جىبەرەمىز. كورگەن ادام بولسا، جاۋاپ جازادى. كەيدە ىزدەگەن ادامىمىزدىڭ تەلەفونىن WhatsApp-تاعى توپتاردان تاۋىپ الىپ جاتامىز. بۇل وتە ءتيىمدى جانە ىڭعايلى بايلانىس تەتىگى بولىپ تۇر. ءتىپتى، WhatsApp-تا ءبىزدىڭ بار ەكەنىمىزدى بىلەتىن اۋىلداستار جەلىدە سويلەسكەندە وزدەرىن سىپايى ۇستايدى. بۇل دا ءبىر پروفيلاكتيكانىڭ نىشانى دەۋگە بولادى»، – دەيدى اۋداندىق پب جەدەل ۋاكىلى، پوليتسيا كاپيتانى ايازبەك تايشىبەكوۆ.
استراحانكا اۋىلى حالىقارالىق كۇرەجولدىڭ بويىندا ورنالاسقان. حالقى نەگىزىنەن اۋىل شارۋاشىلىعىمەن، تاسىمالمەن كۇنەلتەدى. اۋدان ورتالىعى سانالاتىن اۋىلدا جەدەل احۋال تۇراقتى.
«كارانتين باستالعالى اۋىلداعى اۋرۋحانالار دا، ءبىزدىڭ ىشكى ىستەر ورگاندارى دا تاۋلىك بويعى كەزەكشىلىك رەجيمىنە اۋىسقان بولاتىنبىز. سوندىقتان حالىقارالىق تاسجول دا، اۋىلداعى احۋال دا ءبىزدىڭ ۇدايى قاداعالاۋىمىزدا. مال ۇرلىعىنا قارسى كۇندەگىسىن كەشكى رەيدتەرگە شىعىپ تۇرامىز. وندا بىزگە شارۋا قوجالىقتارى وكىلدەرى مەن قازىر «ۆولونتەر» اتاپ جۇرگەن بۇرىننان بار قوعامدىق كومەكشىلەرىمىز كومەكتەسىپ تۇرادى. سەرگەيدى ىزدەگەن كەزدە دە وسى اۋىلداستاردىڭ ۇلكەن كومەگى بولدى. ايتسە دە، ءبىز ونىڭ جوعالماعانىنا سەنىمدى ەدىك. ويتكەنى ونىڭ اۋىلدان كەتكەنىن ەشكىم كورگەن جوق. ول – جۇمىسسىز ادام. باسقا جاققا جۇمىس ىزدەپ كەتۋى مۇمكىن. بىراق اكە-شەشەسى جاقسى تۇرادى. تابىس تابۋعا كەتتى دەيتىندەي مۇقتاجدىعى جوق. سوندىقتان دا قاريانىڭ كوڭىلى ءۇشىن ىزدەۋ جۇمىستارىنا بىردەن كىرىستىك»، – دەيدى ءسالىمجان قايراتۇلى.
ال باۋىر ەتى بالاسىمەن قايتا تابىسقان انانىڭ قۋانىشىندا شەك جوق. العىسىن ءبىلدىرۋ ءۇشىن ول ىشكى ىستەر ورگانى باسشىلىعى اتىنا حات جازىپ، وعان قوسا ۆيدەوسىن دا جولداپتى. بۇل ماتەريالدار اقمولا وبلىستىق پد رەسمي اككاۋنتىندا جارىق كوردى.
نۇرلان ورازعاليەۆ
Басқалармен бөлісе отырыңыз