تۋعان جىلىڭىزعا قاراپ مىنەزىڭىزدى ءبىلىڭىز

15671
Adyrna.kz Telegram

جۇلدىزشىلار ادام قاي جىلى تۋىلسا، مىنەز-قۇلقى سول جىلدىڭ ەگەسى سانالاتىن جانۋاردىكىنە ۇقساس كەلەدى دەيدى. ونىڭ قانشالىقتى شىندىققا جاناساتىنىن جەلىلەردە جارىق كورگەن تومەندەگى جورامالعا قاراپ، ءوزىڭىز پايىمداپ كورىڭىز دەپ جازادى «ادىرنا» ۇلتتىق پورتالى حالىQ ەمى تسەليتەلستۆو پاراقشاسىنا سىلتەمە جاساپ.

تىشقان. ءادىل، كەڭ پەيىلدى، جومارت جۇرەكتى جانە ءوز-ءوزىن باسقارا بىلەدى. اركىممەن ءتىل تابىسا بىلەتىن قاسيەتىنىڭ ارقاسىندا تانىستارى جەتەرلىك. بىراق ناعىز دوسقا مۇقتاج. اقىل-وي جاعىنان الىپ بارا جاتقان ەرەكشەلىگى بولماعانىمەن، العا قويعان ماقساتىنا جەتپەي تىنبايتىنىنا كوپشىلىك ءتانتى. ولاردان جاقسى ساۋداگەر، جازۋشى، سىنشى جانە پۋبليتسيست شىعۋى مۇمكىن.

سيىر. العان بەتىنەن قايتپايتىن قىڭىر، بىراق ءوز-وزىنە وتە سەنىمدى. بەينەتكەش، ۇنەمى كوش باسىنان كورىنگىسى كەلەدى. سىرتتاي قاراعان ادامعا سابىرلى بوپ كورىنۋى مۇمكىن. بىراق اشۋلانعاندا جان-جاعىن جايپاپ جىبەرۋدەن تايىنبايدى. ونداي كەزدە ءوز-وزىنە ەسەپ تە بەرە المايدى. مۇمكىندىگى كەلسە، سيىر بەلگىسىندەگىلەردى سەبەپسىز مازالاماي-اق قويعان دۇرىس.

بارىس. مەيىرىمدىلىگىندە شەك جوق. قۇدايدان باسقا ەشكىمنەن قورىقپايتىنداردىڭ قاتارىنان. تەرەڭنەن ويلاي بىلەدى، سەزىمتال جانە كوڭىل-كۇيدىڭ ادامى. وعان سەنۋ قاۋىپتى، بىراق بارىس جىلعىلاردىڭ ءوزى ەشكىمگە سەنبەيدى. جاسى ۇلكەندەرمەن جانە وزىنەن ءبىر ساتى تومەن ادامدارمەن ءجيى كيكىلجىڭگە كەلىپ قالا بەرەدى.

قويان. جاقسى سويلەي بىلەدى، تالانتتى، ۇستامدى، تىنىش، تالعامى بيىك. اينالاسىنداعىلارعا ۇنەمى ءوز-ءوزىن كورسەتكىسى كەپ تۇرادى. شەشىم قابىلداۋعا كەلگەندە اسىعىپ-اپتىقپايدى. قويان جىلى تۋىلعاندار – كوبىنە بيزنەسمەن، زاڭگەر، ديپلومات ماماندىقتارىنىڭ شەبەرى. اكتەرلىك شەبەرلىگى دە ءبىر توبە. سودان دا ولاردان تەاتر مەن كينو سالاسىنىڭ مايتالمانى شىعۋى مۇمكىن.

ۇلۋ. وزگەلەردەن ومىرلىك كۇش-قۋاتىمەن، دەنساۋلىعىنىڭ مىقتىلىعىمەن ەرەكشەلەنەدى. بىراق بىربەتكەي، كەز كەلگەن نارسەنى بىردەن كوڭىلىنە الىپ قالادى، قىزبا مىنەزدى. قوعامداعى ىقپالى كۇشتى بولعاندىقتان دا ونى كوبى سىيلايدى. ادەتتە ۇلۋ جىلعىلار كارەرالىق تابالدىرىقتىڭ بيىگىنە ۇمتىلعىش جانە كوزدەگەنىنە جەتپەي قويمايدى. ەكىجۇزدىلىك ولارعا ءتان ەمەس. بەتىڭ بار، ءجۇزىڭ بار دەمەي، ويىنداعىنى ايتا سالادى.

جىلان. ءوزىنىڭ تاجىريبەسىنە، اقىلىنا عانا سۇيەنىپ، كوزىمەن كورگەنىنە عانا سەنەتىن ادامدار. ال وزگەنىڭ قاتەسىنەن ساباق الا بىلەدى. ادام تاني الادى. جولى بولعىشتىعى سونداي، قانشا كەرەك، سونشا اقشا تابۋعا قاۋقارى جەتەدى. ءبىر جامانى، قۇمار ويىنداردىڭ قىزىعىنا ءتۇسىپ، بارىنان ءجيى ايىرىلىپ قالىپ جاتادى. جاراتىلىسىنان ادام بالاسىنا سەنبەيدى. ءوزىنىڭ ەموتسياسىن جاسىرىپ، ۇنەمى تەك كۇلىپ جۇرەدى.

جىلقى. بويىندا كۇش-قۋاتى تاسىپ تۇرعان ولار قاي كەزدە دە كوڭىلدى. ادامداردى تەز باۋراپ الاتىن قاسيەتى بار. سول سەبەپتەن دە جان-جاعىنا شۋاق سىيلاپ جۇرەدى. اقشاعا وتە ىقتياتتى. ماحاباتتىڭ جولىندا ەش ايانىپ قالمايدى. تەز اشۋلانىپ، تەز باسىلادى. ەشكىمگە تاۋەلدى بولعىسى جوق. بىرەۋدىڭ اقىلىنا مۇقتاج ەمەس. تەك ءوزىنىڭ عانا تۇيسىگىنە سەنەدى.

قوي. شىنايى، جايدارى مىنەزدى، وتە تالانتتى. ونىڭ ۇستىنە، تۇيىق ءارى كەرىتارتپالىعى تاعى بار. جوعارى تالعام يەسى، ونەردىڭ ءار تۇرىنە يكەمدى. ءوزىنىڭ ماتەريالدىق بايلىعى اسىپ-تاسىپ جاتپاسا دا، جوق-جىتىكتەردى جارىلقاپ، جاقسى سوزبەن بولسا دا، جانىنا دەمەۋ بولۋعا تىرىسادى. ءومىرى قانداي بولسا، سولاي قابىلدايدى.

مەشىن. بۇگىن ءبىر نارسە ايتسا، ەرتەڭ-اق ول ويىنان اينىپ شىعا كەلەدى. ولارعا سەنۋ قيىن. بىراق اقىلدىلىعى جاعىنان اسىپ تۇسەدى. جولى بولعىش، جوقتان باردى قۇراستىرىپ شىعارۋعا بەيىم. ءوز ەركى وزىندە بولىپ ۇيرەنگەن. قىزبا مىنەزدى. كەز كەلگەن ماسەلەدەن سىتىلىپ كەتە سالادى. بىراق مەشىن جىلعىلاردى ىڭعايعا بۇرىپ، ايتقانعا كوندىرۋ وپ-وڭاي. جولىندا ەش كەدەرگى جوق بولسا، بيىكتەردەن كورىنۋگە بارىن سالادى.

تاۋىق. اۋزىن اشسا، ارعى جاعىنان جۇرەگى كورىنىپ تۇراتىن اقكوڭىل ادامدار. ەڭبەكسۇيگىش، باتىل. انانى دا، مىنانى دا بىلگىسى كەپ جۇرگەنى. جۇرتتىڭ نازارىندا بولعاندى، ءوزىن ماقتاعاندى جاقسى كورەدى. ەشكىمگە سەنبەيدى، تەك ءوز دەگەنىمەن جۇرەدى. تاپقان-تايانعانىن بەيبەرەكەت جۇمساپ، اقىر سوڭىندا اقشاسىنىڭ قايدا كەتكەنىن بىلمەي قالادى.

يت. ادىلدىكتى جانى سۇيەدى، ءوزىنىڭ قۇقىعى ءۇشىن كۇرەسۋگە بار كۇشىن سارپ ەتەدى. ونى ماتەريالدىق بايلىق قىزىقتىرا بەرمەيدى. قاتتى قاجەت بولىپ بارا جاتسا، جەردەن قازسا دا، قاراجات تابادى. باسقالارعا ءمىن تاعىپ، سىن ايتۋعا بەيىم. جاسىنا جاس قوسىلا كەلە ول مىنەزى بىرتىندەپ باسىلادى. بۇل جىلى دۇنيەگە كەلگەندەردىڭ اراسىندا مۇعالىمدەر مەن بيزنەسمەندەر كوپتەپ كەزدەسەدى.

دوڭىز. ولارعا اركەز ارقا سۇيەۋگە بولادى. جاقسى سەرىكتەس. ۇلكەن اقىل يەسى. ءبىلىم الۋعا تالپىنىسى جوعارى بولعانىمەن، ۇياڭ مىنەزىنىڭ كەسىرىنەن كوپ نارسەدەن قۇر قالۋى مۇمكىن. از سويلەپ، كەز كەلگەن ماسەلەنى اقىلمەن شەشىپ ۇيرەنگەن. ۇرىس-كەرىس دەگەندى ۇناتپايدى. دوستارى ساۋساقپەن سانارلىقتاي. بىراق ولار ءومىر بويى شىنايى دوس بولىپ قالادى. جان-جاعىنىڭ شاشىلىپ جاتقانى وعان تاڭسىق ەمەس. دوڭىز جىلعىلاردىڭ دەنساۋلىعىنا بۇدان زيان كەلۋى مۇمكىن

پىكىرلەر