فورۋمعا ەلىمىزدىڭ اتىراۋ، قاراعاندى، پاۆلودار وبلىستارى مەن نۇر-سۇلتان، الماتى قالالارىنان ءباسپاسوز حاتشىلارى،جۋرناليستەر قاتىستى. ولاردىڭ جەتىسۋ جەرىنە كەلۋدەگى ماقساتى تاجىريبە الماسۋ،سونداي-اق، الماتى وبلىسىنداعى تاريحي-مادەني نىساندارمەن تانىسۋ. باسقوسۋ جامبىل، قاراساي، تالعار، ۇيعىر اۋداندارىندا ءوتتى. باق وكىلدەرى ىسكەرلىك بايلانىستى،قالىپتاستىرۋ، اۋديتوريامەن جۇمىس تاقىرىپتارىن تالقىلادى. جەتىسۋ جەرىنە كەلگەن مەيمانداردى وبلىس اكىمىنىڭ ورىنباسارى رۋستام الي قارسى الدى.
ءوز سوزىندە «بۇل سامميت ىشكى ءتۋريزمدى تانىستىرۋ عانا ەمەس، ارىپتەستىك بايلانىستى نىعايتۋ. اقپارات الماسۋدا جاڭا مەحانيزمدەر، الگوريتمدەردى ءبولىسۋ. مۇنىمەن قوسا، وڭىردە ەلباسى، مەملەكەت باسشىسى باستامالارىنىڭ جۇزەگە اسۋ بارىسىن تانىستىرۋ» دەپ قوستى ول.
Press Summit كەزىندە مەيماندار شامالعان اۋىلىنداعى «اتامەكەن» مۋزەيى، رايىمبەك اۋىلدىق وكرۋگىندەگى «باتىر بابالار»، ۇشقوڭىر سپورت كەشەنى مەن جامبىل جاباەۆتىڭ ادەبي-مەموريالدىق مۇراجايىنا باردى. مۇنىمەن قوسا، "وي-قاراعاي" دەمالىس كەشەنى مەن تەكسان زاۋىتىن، شونجىداعى ىستىق سۋ نىسانىن كوردى. باعدارلامادا ەركىن پىكىر الماسۋ قاراستىرىلعان. بۇل رەتتە باق وكىلدەرى ءوز ءبىلىم،بىلىكتەرىمەن ءبولىسىپ ارىپتەستىك بايلانىس ورناتتى. ءسوز العاندار پرەزەنتاتسيا ارقىلى ءوز جۇمىستارىن بايانداپ، اقپارات تاراتۋداعى تاسىلدەرىمەن ءبولىستى.
- «بۇل باسقوسۋ ءبىز ءۇشىن تاپتىرماس تاجىربيە الاڭى بولدى. ءۇش كۇن ىشىندە ءبىز تاسىن تۇرتسەڭ تاريحى كورىنەتىن جەتىسۋ جەرىنىڭ كيەلى ورىندارىمەن تانىستىق. جامبىل بابامىزدىڭ ەلىنە، جەرىنە باردىق. تاماشا ءبارى ۇنادى. وسىنداي Press Summit كەرەك—اق. وڭىرلەردەن كەلگەن ارىپتەستەرىمنەن كوپ نارسە ۇيرەندىم»، دەپ اسەرىمەن ءبولىستى اتىراۋ وبلىسى اكىمىنىڭ ءباسپاسوز حاتشىسى ەرجان قالىمبايۇلى.
ايتا كەتەيىك، "Jetisý media" كمم جانىنداعى اۋداندارمەن جۇمىس جونىندەگى ءبولىم اشىلعاننان كەيىن حالىقتى دۇرىس جاڭالىقتارمەن ۋاقتىلى اقپاراتتاندىرۋ سالاسىندا ۇلكەن جۇمىس جۇرگىزىلدى. وبلىس اۋدان مەن قالا اكىمدەرىنىڭ ءباسپاسوز حاتشىلارى ءبىر جىل ىشىندە 20 000-نان استام تىكەلەي ەفير وتكىزدى، سونداي-اق الەۋمەتتىك جەلىلەردە 25 000 جاريالانىم جاريالاندى. حالىقپەن جۇمىس تا شەتتە قالمايدى، سوندىقتان تۇرعىندار تاراپىنان 40 000 - نان استام سۇراق قويىلدى، وسىنىڭ بارلىعىنا ءباسپاسوز حاتشىلارى ۋاقىتىلى جاۋاپ بەرىپ وتىردى.
«بىزدە وزدەرىڭىزگە بەلگىلى، وسىدان ءۇش جىل بۇرىن اۋدان-قالا اكىمدەرىندە ءباسپاسوز حاتشىلارى جۇمىسىن باستاعان بولاتىن. قازىرگى تاڭدا ولار بيلىك پەن بۇقارا اراسىنا التىن كوپىر ورناتتى. جەرگىلىكتى جەرلەردەگى قاندايدا ءبىر ماسەلە، جاڭالىقتار بولسا العاشقى بولىپ جاريالاپ نەمەسە اكىمدىككە جەتكىزىپ شەشۋ جولدارىن قاراستىرىپ جاتادى. بۇل شارانىڭ دا نەگىزگى ماقساتى سول. وبلىستاعى ءباسپاسوز حاتشىلارى مەن ءتۇرلى وڭىردەگى ارىپتەستەردىڭ بىرلەسە جۇمىس اتقارۋ. سوعان دانەكەر بولۋ»، - دەدى "Jetisý media" كمم ءبولىم باسشىسى ايمان اسىل.
