الەمدە كوروناۆيرۋس جۇقتىرعان ادامداردىڭ جالپى سانى 72 ميلليونعا جۋىقتادى. دجونس حوپكينس ۋنيۆەرسيتەتىنىڭ مالىمەتى بويىنشا ىندەتتى ەڭ كوپ جۇقتىرعان ەلدەردىڭ العاشقى بەستىگى كەلەسىدەي: اقش (16 ميلليون), ءۇندىستان (شامامەن 10 ميلليون), برازيليا (6,8 ميلليون), رەسەي (2,6 ميلليون), فرانتسيا (2,4 ميلليون).
ەۋروپادا اۋرۋدىڭ الدىن-الۋ جانە باقىلاۋ ورتالىعىنىڭ مالىمەتى بويىنشا يتاليا COVID-19 – دان قايتىس بولعاندار سانى بويىنشا ەۋروپادا ءبىرىنشى ورىنعا شىققان.
وتكەن اپتادا ۇلىبريتانيادا كوروناۆيرۋستىڭ مۋتاتسياعا ۇشىراعان جاڭا ءتۇرى انىقتالعان. ىندەتتىڭ تارالۋ قارقىنى كۇشەيگەندىكتەن، ەلدە ساقتىق شارالارى كۇشەيتىلىپ، انگليانىڭ وڭتۇستىك-شىعىسىندا قاتاڭ كارانتين ءتارتىبى ەنگىزىلدى.
جاڭا ەرەجەگە ساي، دۇكەندەر، قوعامدىق تاماقتانۋ ورىندارى، شاشتارازدار جانە سپورت زالدارى جابىلادى. تۇرعىندارعا مۇمكىندىگىنشە سىرتقا شىقپاۋعا كەڭەس بەرىلگەن.
ال وڭتۇستىك كورەيادا دا شەكتەۋ شارالارى ەنگىزىلدى. مۇندا بىرنەشە كۇن قاتارىنان ناۋقاستاردىڭ تاۋلىكتىك سانى 1000-نان ازايماي تۇر. ەل استاناسى سەۋلدە بۇگىننەن باستاپ، الەۋمەتتىك اراقاشىقتىق ساقتاۋ ەرەجەلەرى كۇشەيتىلىپ، ءتورت ادامنان ارتىق جينالۋعا تىيىم سالىندى. تاۋ شاڭعى كۋرورتتارى مەن تانىمال تۋريستتىك نىساندار دا جابىلدى. ەل ۇكىمەتىنىڭ مالىمەتىنشە، كوروناۆيرۋسقا قارسى ەكپە ەگۋ ناۋقانى اقپان، ناۋرىز ايلارىندا باستالۋى مۇمكىن.
دۋمان ارعىنگەلدى،
«ادىرنا» ۇلتتىق پورتالى
