بەلگىلى قازاقستاندىق ءانشى تورەعالي تورەالى ءولى جانۋارمەن تۇسكەن سۋرەتىن جاريالادى. ەكولوگيا، گەولوگيا جانە تابيعي رەسۋرستار مينيسترلىگى ءانشىنىڭ وسى فوتوسۋرەتىنە قاتىستى پىكىر ءبىلدىردى، دەپ حابارلايدى «ادىرنا» ۇلتتىق پورتالى Tengrinews.kz -كە سىلتەمە جاساپ.
قولدانۋشىلار ءارتىس تۇلكىلەردى اۋلاپ، ولجاسىمەن سۋرەتكە ءتۇستى دەپ توپشىلادى. تورەعالي تورەالىنىڭ ارەكەتتەرى قازاقستاندىقتار اراسىندا ەكىۇشتى پىكىر تۋدىردى. كەيبىرى ءانشىنىڭ ارەكەتىن سىنعا الىپ، ونى جازالاۋعا شاقىرسا، باسقا ءبىرى، كەرىسىنشە، اڭ اۋلاۋدى ناسيحاتتاعانى ءۇشىن ماقتادى.
بىلتىر جەلتوقسان سوڭىندا تورەعالي تورەالى الماتى وبلىسىندا اڭ اۋلاۋعا شىققان. كەيىن ول جانكۇيەرلەرىنە اڭشىلىق ناتيجەسىن كورسەتكەن. الايدا، سۋرەتكە ءبارى ريزا بولا قويعان جوق. كوپتەگەن ادام الەۋمەتتىك جەلى بۇل سۋرەتتى قالاي وتكىزگەنىنە تاڭعالعان، ويتكەنى جاڭا ەرەجەلەرگە سايكەس Instagram زورلىق-زومبىلىق بەلگىلەرى بار فوتوسۋرەتتەردى بۇعاتتايدى.
"شەكتەن شىققان","ماسقارا","قاتىگەزدىك","كوڭىلىم قالدى","قاتالدىق" - جازباداعى پىكىرلەر وسىنداي.
وسى وقيعادان كەيىن Tengrinews.kz ءتىلشىسى ارتىسپەن بايلانىسقا شىعىپ، ونىڭ ارەكەتىن ءتۇسىندىرىپ بەرۋىن سۇرادى. الايدا ول بۇل جاعدايعا تۇسىنىكتەمە بەرۋدەن باس تارتتى. تورەعالي تورەالى فوتوسۋرەتتە تۇلكى ەمەس، شيەبورى ەكەنىن عانا اتاپ ءوتتى. سونداي-اق، ول اڭدى ەشكىم اتپاعانىن، ونى تازى تۇقىمدى اڭ اۋلاۋ يتتەرى ۇستاپ العانىن ايتتى.
قازىرگى ۋاقىتتا تورەعالي تورەالىنىڭ سول جازباسى پاراقشاسىندا جوق. ءانشى سۋرەتتەردى Instagram-داعى پاراقشاسىنان نە وشىرگەن، نە جاسىرىپ قويعان.
ايتا كەتەيىك، اڭشىلىققا جەڭىلمەگەن قازاقستاندىق بوكسشى ايدوس ەربوسىنۇلى دا بارعان. ول دا دەنەسى قاناعان جانۋاردى Instagram-پاراقشاسىندا جاريالاعان. سپورتشى بۇل كۇنى ەكى شيەبورى ۇستاعانىن ايتقان.
پىكىر جازعان قولدانۋشىلار ونى قولدادى.
"كەرەمەت", "تاماشا كورىنىس", "ناعىز قازاقى فوتوسۋرەت", "ناعىز ادال جانە تازا اڭشىلىق", "ناعىز قازاق", - دەپ جازدى قولدانۋشىلار.
ارتىنشا ەكولوگيا مينيسترلىگى ءانشىنىڭ سۋرەتىنە قاتىستى تۇسىنىكتەمە بەردى. ۆەدومستۆو مالىمدەۋىنشە، تۇلكى اۋلاۋعا تىيىم سالىنباعان، سوندىقتان ولاردى اۋلاۋعا رۇقساتى بولسا، ءانشىنىڭ اڭشىلىعى زاڭعا قايشى ەمەس.
"اۋىل شارۋاشىلىعى مينيسترلىگىنىڭ 2015 جىلعى بۇيرىعىنا سايكەس تۇلكى اۋلاۋعا 1 قاراشادان 15 اقپانعا دەيىن رۇقسات ەتىلەدى. بىراق ءتيىستى ليتسەنزيا بولۋى مىندەتتى. الايدا مۇنداي فوتوسۋرەتتەردى جاريالاۋ جانۋارلارعا قاتىستى زورلىق-زومبىلىقتى ناسيحاتتاۋ بولىپ سانالادى. قازىرگى ۋاقىتتا الماتى وبلىسىنىڭ پوليتسيا دەپارتامەنتى ءىستىڭ ءمان-جايىن انىقتاپ جاتىر. پوليتسيا ناتيجەگە قۇقىقتىق باعا بەرەدى", - دەدى ەكولوگيا مينيسترلىگىنىڭ قىزمەتكەرلەرى.
