23 جاستاعى تاجىك قىزى First Night («العاشقى ءتۇن») حالىقارالىق ونلاين-اۋكتسيون ارقىلى پاكتىگىن 10 مىڭ دوللارعا ساتاتىنىن مالىمدەدى، دەپ جازادى «ادىرنا» ۇلتتىق پورتالى kznews.kz. سايتىنا سىلتەمە جاساپ.
بۇل پلاتفورمادا الەمنىڭ ءار تۇكپىرىنەن بويجەتكەندەر «العاشقى ءتۇنىن» داۋلەتتى ەركەكتەرگە ساتادى.
دۋشانبەلىك بويجەتكەن وزودي راديوسىنىڭ تىلشىسىنە وتباسىنداعى قارجىلىق قيىندىققا بايلانىستى پاكتىگىن ساتىپ، تۋعاندارىنا كومەكتەسۋگە بەل بۋعانىن ايتادى.
ونلاين-اۋكتسيوندا ورتالىق ازيادان شىققان بويجەتكەندەردىڭ لوتى وتە كوپ. تاجىكستان مەن تۇركىمەنستاننان ازىرگە بىرەۋدەن. مۇسىلمان ەلدەرىنەن كوپتەگەن يران بويجەتكەنى شەتەل ازاماتتارىنا تۇرمىسقا شىققىسى كەلەدى.
اۋكتسيوندا پاكتىك قۇنى 3 مىڭنان 1 ملن دوللارعا دەيىن باعالانعان. مارشالل ارالدارىنداعى كومپانيا دەپ تىركەلگەن «العاشقى ءتۇن» سايتىنىڭ قۇرىلتايشىلارى وزىنە ەشقانداي جاۋاپكەرشىلىك المايتىنىن جاريالاعان.
سايت وكىلىنىڭ سوزىنشە، كەلىسىم «ساتۋشى مەن ساتىپ الۋشى» اراسىندا جۇرەدى. تاجىكستانداعى «فەميدا» ۇيىمىنىڭ جەتەكشىسى سانوات سوليەۆا جوعارىداعى تاجىك قىزىنىڭ ءىس-ارەكەتى تاجىكستان زاڭدارى بويىنشا زاڭ بۇزۋشىلىق بولىپ سانالمايدى دەيدى.
«تاجىكستان زاڭدارى مۇنداي ءىس-ارەكەتكە رۇقسات بەرمەيدى دە، تىيىم سالمايدى دا. بىراق بۇل ار-ۇجدان جاعىنان ءبىزدىڭ مەنتاليتكە قايشى. تاجىك قىزدارى تۇرمىسقا شىققانشا، پاكتىگىن، ارىن ساقتاۋى ءتيىس. ءوزىمنىڭ تاجىريبەمنەن تاجىك قىزدارى وسىنداي قادامعا باردى دەگەندى ءبىرىنشى رەت ەستىپ تۇرمىن»، — دەيدى سانوات سوليەۆا.
وسىناۋ اقپاراتقا بايلانىستى "ادىرنا" ۇلتتىق پورتالى ءوزىمىزدىڭ قاراكوزدەردىڭ بىرنەشەۋىنە سۇراۋ سالىپ، پىكىرىن ءبىلدى. بىزبەن تىلدەسكەن قىزدار اتى-جوندەرىن وزگەرتۋدى سۇرادى. سونىمەن پاكتىگىن ساۋدالاۋعا قاتىستى قازاق قىزدارىنىڭ كوزقاراسى قانداي؟
جوو-نىڭ 2 كۋرس ستۋدەنتى ايعانىم: "جالپى، قىز پاكتىگى دەگەندى ماڭىزدى ماسەلەگە اينالدىرۋدىڭ قاجەتى جوق دەپ سانايمىن. پاك بولىپ تۇرمىس قۇرعان قىزدارىمىزدىڭ قادىرىنە جەتكەن ەركەك وتە از عوي. نە كەرەك سول پاكتىك دەگەن؟ اقىلسىز ەركەكتەرگە پاكتىكتى ساتا سالعان ءجون. ال سەنىمەن شىنىمەن وتباسىن قۇرعىسى كەلەتىن ەركەك پاكتىگىڭە قارامايدى دەپ ويلايمىن",-دەيدى.
ەكى بالانىڭ اناسى گۇلشات: "ماسقارا، ۇيات جاعداي عوي پاكتىگىن ساتۋ دەگەن. اق نەكەگە ادال كەلمەگەن قىزدىڭ كەيىن قانداي قادىرى بولادى؟ قازاق قىزى ارىن، ۇياتىن بيىك ۇستاۋعا ءتيىس. مۇنداي پاكتىكتى ساتۋ دەگەنگە قارسىمىن!بۇل ءتىپتى، مۇسىلمانعا جات دۇنيە عوي. مۇسىلمان قىز قارداي اپپاق، كىرشىكسىز تازا بولۋى كەرەك"-دەگەن پىكىردە.
بىزبەن اڭگىمەسىندە اياۋلىم: "اركىم ءوزى بىلەدى عوي، نە ىستەسە دە. پاكتىك دەگەن نارسەنى قىزدان تالاپ ەتسەك، ەركەكتەن دە سونداي ادالدىق تالاپ ەتىلسىن. مۇنىڭ ءبارى ەسكى زاماننىڭ سارقىنشاقتارى دەپ قارايمىن",-دەيدى.
وسى ماسەلەگە بايلانىستى جىگىتتەرىمىز نە دەر ەكەن؟
"قوعامنىڭ ازعىندانۋى بۇل. نەكەگە دەيىن ەتەگىن كوتەرگەن قىزدان قانداي ادال ايەل شىعادى؟ مەنىڭشە، ءوزىن سىيلايتىن ەركەك تەك پاك قىزعا ۇيلەنۋى كەرەك. پاكتىگىن ساتقان قىز باسقانى دا ساتادى",-دەپ رەنىشىن ءبىلدىردى ماقسات ەسىمدى سۇحباتتاسىمىز.
ال ماگيسترانت ەرجان بايبولەك: "ادالدىق الدەبىر پاكتىكپەن ولشەنبەيدى. پاكتىگى جوق قىزدىڭ ءبارى ادال ەمەس دەگەنمەن كەلىسپەيمىن. ەڭ الدىمەن جىگىتتەر ءوزىمىز ءۇشىن جاۋاپ بەرەيىكشى. وتباسىلىق باقىتتى وسىنداي ۇساق ۇستانىممەن قۇرتاتىندار از ەمەس. توپاستىق دەر ەدىم مۇنى. پاك قىزدى كوشەدەن الىپ قاشىپ ۇيلەنەتىن جىگىتتەر بار. وسىلاي جابايىلىقپەن ۇيلەنىپ، پاك قىزدىڭ ءومىرىن تالقان ەتۋدى دە ايتۋ كەرەك قوي، ەڭ الدىمەن",-دەيدى.
"العان جارىم ادال شىقپاسا، تالاق ەتۋدەن تايىنبايمىن",-دەيدى مۇسا اتتى وقىرمان.
قالاي دەسەك تە، بۇل ماسەلە ءالى تالاي جىل تالقىدان تۇسپەيتىنى ءسوزسىز. ادالدىقتىڭ ولشەمىن اجىراتۋ ءۇشىن قازاق قوعامىنا ۋاقىت كەرەك ەكەنى انىق.
مۇقاش مۇراتۇلى،
"ادىرنا" ۇلتتىق پورتالى.
فوتو اشىق دەرەككوزدەن الىندى.
