23 jastaǵy tájik qyzy First Night («Alǵashqy tún») halyqaralyq onlaın-aýkıon arqyly páktigin 10 myń dollarǵa satatynyn málimdedi, dep jazady «Adyrna» ulttyq portaly kznews.kz. saıtyna silteme jasap.
Bul platformada álemniń ár túkpirinen boıjetkender «alǵashqy túnin» dáýletti erkekterge satady.
Dýshanbelik boıjetken Ozodı radıosynyń tilshisine otbasyndaǵy qarjylyq qıyndyqqa baılanysty páktigin satyp, týǵandaryna kómektesýge bel býǵanyn aıtady.
Onlaın-aýkıonda Ortalyq Azııadan shyqqan boıjetkenderdiń loty óte kóp. Tájikstan men Túrkimenstannan ázirge bireýden. Musylman elderinen kóptegen Iran boıjetkeni shetel azamattaryna turmysqa shyqqysy keledi.
Aýkıonda páktik quny 3 myńnan 1 mln dollarǵa deıin baǵalanǵan. Marshall araldaryndaǵy kompanııa dep tirkelgen «Alǵashqy tún» saıtynyń quryltaıshylary ózine eshqandaı jaýapkershilik almaıtynyn jarııalaǵan.
Saıt ókiliniń sózinshe, kelisim «satýshy men satyp alýshy» arasynda júredi. Tájikstandaǵy «Femıda» uıymynyń jetekshisi Sanoat Solıeva joǵarydaǵy tájik qyzynyń is-áreketi Tájikstan zańdary boıynsha zań buzýshylyq bolyp sanalmaıdy deıdi.
«Tájikstan zańdary mundaı is-áreketke ruqsat bermeıdi de, tyıym salmaıdy da. Biraq bul ar-ujdan jaǵynan bizdiń mentalıtke qaıshy. Tájik qyzdary turmysqa shyqqansha, páktigin, aryn saqtaýy tıis. Ózimniń tájirıbemnen tájik qyzdary osyndaı qadamǵa bardy degendi birinshi ret estip turmyn», — deıdi Sanoat Solıeva.
Osynaý aqparatqa baılanysty "Adyrna" ulttyq portaly ózimizdiń qarakózderdiń birnesheýine suraý salyp, pikirin bildi. Bizben tildesken qyzdar aty-jónderin ózgertýdi surady. Sonymen páktigin saýdalaýǵa qatysty qazaq qyzdarynyń kózqarasy qandaı?
JOO-nyń 2 kýrs stýdenti Aıǵanym: "Jalpy, qyz páktigi degendi mańyzdy máselege aınaldyrýdyń qajeti joq dep sanaımyn. Pák bolyp turmys qurǵan qyzdarymyzdyń qadirine jetken erkek óte az ǵoı. Ne kerek sol páktik degen? Aqylsyz erkekterge páktikti sata salǵan jón. Al senimen shynymen otbasyn qurǵysy keletin erkek páktigińe qaramaıdy dep oılaımyn",-deıdi.
Eki balanyń anasy Gúlshat: "Masqara, uıat jaǵdaı ǵoı páktigin satý degen. Aq nekege adal kelmegen qyzdyń keıin qandaı qadiri bolady? Qazaq qyzy aryn, uıatyn bıik ustaýǵa tıis. Mundaı páktikti satý degenge qarsymyn!Bul tipti, musylmanǵa jat dúnıe ǵoı. Musylman qyz qardaı appaq, kirshiksiz taza bolýy kerek"-degen pikirde.
Bizben áńgimesinde Aıaýlym: "Árkim ózi biledi ǵoı, ne istese de. Páktik degen nárseni qyzdan talap etsek, erkekten de sondaı adaldyq talap etilsin. Munyń bári eski zamannyń sarqynshaqtary dep qaraımyn",-deıdi.
Osy máselege baılanysty jigitterimiz ne der eken?
"Qoǵamnyń azǵyndanýy bul. Nekege deıin etegin kótergen qyzdan qandaı adal áıel shyǵady? Menińshe, ózin syılaıtyn erkek tek pák qyzǵa úılenýi kerek. Páktigin satqan qyz basqany da satady",-dep renishin bildirdi Maqsat esimdi suhbattasymyz.
Al magıstrant Erjan Baıbólek: "Adaldyq áldebir páktikpen ólshenbeıdi. Páktigi joq qyzdyń bári adal emes degenmen kelispeımin. Eń aldymen jigitter ózimiz úshin jaýap bereıikshi. Otbasylyq baqytty osyndaı usaq ustanymmen qurtatyndar az emes. Topastyq der edim muny. Pák qyzdy kósheden alyp qashyp úılenetin jigitter bar. Osylaı jabaıylyqpen úılenip, pák qyzdyń ómirin talqan etýdi de aıtý kerek qoı, eń aldymen",-deıdi.
"Alǵan jarym adal shyqpasa, talaq etýden taıynbaımyn",-deıdi Musa atty oqyrman.
Qalaı desek te, bul másele áli talaı jyl talqydan túspeıtini sózsiz. Adaldyqtyń ólshemin ajyratý úshin qazaq qoǵamyna ýaqyt kerek ekeni anyq.
Muqash MURATULY,
"Adyrna" ulttyq portaly.
Foto ashyq derekkózden alyndy.
