الەم ەكونوميكاسى قۇلدىراپ، جۇرىسىنەن جاڭىلدى. پاندەميا قاتارىنان بىرنەشە سوققى بەرىپ، ەندى باس كوتەرىپ كەلە جاتقان ەلدەردىڭ ساعىن سىندىرىپ قانا قويماي، مەديتسينا سالاسىن سان سوقتىرىپ جىبەردى. اقش-تان باستاپ كارى قۇرلىقتىڭ دا مەديتسيناسى ەلىن بۇل قورقىنىشتى تۇستەن وياتا الماي الەككە ءتۇستى دەپ جازادى «ادىرنا» ۇلتتىق پورتالى Newsroom.kz سايتىنا سىلتەمە جاساپ.
ينفەكتسيا وشاعى قىتاي بولعانىمەن ەڭ ۇلكەن زارداپتى ول تارتۋدىڭ ورنىنا، قايتا قارىشتاپ ۇشۋدىڭ الدىندا تۇر. بۇلاي دەۋىمىزگە بريتانيانىڭ بيزنەس جانە ەكونوميكانى زەرتتەۋ ورتالىعى (CEBR) سەبەپ. ولاردىڭ جازۋىنشا، قىتاي ونىڭ الدىڭعى بولجامنان 5 جىلعا ەرتە، ياعني 2028 جىلى الەمگە ەكونوميكاداعى ءوسىمى جاعىنان الەمگە ءوز بيلىگىن جۇرگىزۋى مۇمكىن.
قىتايدىڭ الەم ەكونوميكاسىنداعى ۇلەسى 2000 جىلدان بەرى 3,6 %-دان 17,8%-عا ارتقان. 2023 جىلى ولار «ەڭ تابىستى ەكونوميكاسى» بار ەلگە اينالادى دەلىنگەن باياندامادا.
دۇنيەجۇزى دۇرلىگىپ جاتقان كەزدە قىتاي ەكونوميكاسى تەحنولوگياداعى جەتىستىگى مەن قورعانىش زاتتارىن ساتۋ بويىنشا ءبارىن ارتتا قالدىرايىن دەپ تۇر. پاندەميا باستالماي تۇرىپ قىتاي قورعانىش زاتتارىن ەڭ كوپ ەكسپورتتايتىن ەل بولعان.
قازان ايىنىڭ سوڭىندا پەكيندەگى LyncMed قورعانىش زاتتارىن وندىرەتىن ەڭ الىپ كومپانيا يەسى ءارى نەگىزىن سالۋشى پول ۆانگ سۇقباتتارىنىڭ بىرىندە ساتىلىمنىڭ وتكەن جىلمەن سالىستىرعاندا 10 ەسەگە وسكەنىن ايتقان.
Reuters اگەنتتىگى 6 جەلتوقسانداعى قىتاي شەكاراسىنىڭ قۇجاتتارى نەگىزىندە ەل ەكسپورتىنىڭ وتكەن جىلمەن سالىستىرعاندا 21,1%-عا وسكەنىن ايتادى. بۇل 2018 جىلدىڭ اقپان ايىمەن سالىستىرعاندا ەڭ جىلدام ءوسىم. ساندار ساراپشىلار كۇتكەننەن دە اسىپ تۇسكەن.
فوتو اشىق دەرەككوزدەن الىندى.
