ءماجىلىس سايلاۋىنان كەيىن ۇكىمەتتىڭ قۇرامى ايتارلىقتاي وزگەرگەن جوق. مينيسترلەردىڭ باسىم بولىگى ءوز ورنىن ساقتاپ قالدى. ەڭبەك جانە حالىقتى الەۋمەتتىك قورعاۋ ءمينيسترى بولعان ءبىرجان نۇرىمبەتوۆ مەن ۇلتتىق ەكونوميكا مينيسترلىگىن باسقارعان رۋسلان دالەنوۆ قانا قىزمەتتەن كەتتى.
ولاردىڭ ورنىنا ۆيتسە-مينيسترلەر كەلدى. ال سىرتقى ىستەر ءمينيسترى مۇحتار تىلەۋبەردى پرەمەر-ءمينيستردىڭ ورىنباسارى قىزمەتىن قوسا اتقارادى. Sputnik قازاقستان تىلشىسىنە سۇقبات بەرگەن ساياساتتانۋشىلار ۇكىمەتتەگى كادرلىق اۋىس-ءتۇيىستى ءتۇسىندىردى.
مينيستر مارتەبەسى كوتەرىلدى
ساياساتتانۋشى دانيار اشىمباەۆتىڭ ايتۋىنشا، سىرتقى ىستەر ءمينيسترىنىڭ مارتەبەسىن ۆيتسە-پرەمەرگە دەيىن كوتەرۋ تاجىريبەسى بۇرىن دا بولعان.
"1999 جىلى قاسىم-جومارت توقاەۆ سىرتقى ىستەر ءمينيسترى مەن ۆيتسە-پرەمەر قىزمەتىن قاتار اتقارعان. سوندىقتان پرەزيدەنت وسى تاجىريبەنى جاقسى بىلەدى. سول كەزدە ديپلوماتيالىق كورپۋستى دامىتۋعا قاتىستى ءبىراز ماڭىزدى شەشىمدەر قابىلدانعان بولاتىن. ال جاڭا پرەزيدەنتتىڭ كومانداسىندا سىرتقى ىستەر جۇيەسىنەن كەلگەن ماماندار از ەمەس. سوڭعى جىلدارى سىرتقى ىستەر مينيسترلىگىنە ەكونوميكالىق جانە ينۆەستيتسيالىق سيپاتتاعى مىندەتتەردى جۇكتەۋگە تىرىسقان. وسى تاجىريبە تاعى قايتالاناتىن شىعار", - دەيدى اشىمباەۆ.
ال ساياسي شولۋشى عازيز ابىشەۆ تاعى ەكى ءمينيستردى ەسكە الدى. ولار دا ۆيتسە-پرەمەر قىزمەتىن قوسا اتقارعان.
"كەزىندە قارجى ءمينيسترى بولعان باقىت سۇلتانوۆقا دا ۆيتسە-پرەمەر قىزمەتى جۇكتەلگەن. يندۋسترياليزاتسيا قولعا الىنعاندا اسەت يسەكەشەۆ ۆيتسە-پرەمەر بولدى. تۇتاس ءبىر باعىتتىڭ مىندەتى ءبىر مينيسترگە جۇكتەلگەندە وسىنداي مارتەبە بەرىلەدى. سەبەبى ول ادام باسقا ۆيتسە-مينيسترلەردى شۇعىل شاقىرىپ، كەڭەس وتكىزۋى كەرەك. ۆەدومستۆوارالىق جوبالارعا جەتەكىشىلىك ەتەدى. بىزدە سىرتقى ەكونوميكالىق باعىتتى كۇشەيتىپ جاتقان سياقتى", - دەپ اتاپ كورسەتتى ابىشەۆ.
ساراپشىنىڭ سوزىنە قاراعاندا، بۇگىندە الەمدىك ەكونوميكانى قالپىنۋ كەلتىرۋ مەن ينفەكتسيالىق قاۋىپسىزدىك اياسىندا ينتەگراتسيالىق جوبالاردى ىسكە اسىرعان ماڭىزدى. ەۋرازيالىق ەكونوميكالىق وداقپەن، باتىس ەلدەرىمەن، كورشى قىتايمەن دە تىعىز قارىم-قاتىناس جۇرگىزۋ كەرەك. سول سەبەپتى سىرتقى ىستەر ءمينيسترىن ۆيتسە-پرەمەرگە دەيىن كوتەرىپ وتىر.
ەكى مينيستر نەگە كەتتى
دانيار اشىمباەۆتىڭ ويىنشا، مينيستر قىزمەتىنەن كەتكەن ەكى شەنەۋنىك - سىنعا ءجيى ۇشىراعاندار. ال ۇكىمەتتىڭ قۇرامى قاتتى وزگەرمەيدى دەگەن بولجام ءاۋ باستا بولعان.
"رۋسلان دالەنوۆ ەكونوميكالىق "گۋرۋ" بولا المادى. تولىققاندى ستراتەگيا جاسالعان جوق. ال ۇكىمەت تاراپىنان قولعا الىنعان شارالاردى ءجيى سىنعا الدى. ءبىرجان نۇرىمبەتوۆتى ۆەدومستۆونىڭ ساپاسىز جۇمىسى ءۇشىن ايىپتاعان. وعان قوسا، تۋعان اعاسى جەمقورلىققا قاتىسى بار دەگەن كۇدىككە ءىلىندى", - دەيدى اشىمباەۆ.
وسى ورايدا ساراپشى 42 500 تەڭگەنىڭ جىرىن ەسكە الدى. سول كەزدە ەسەپ-قيساپتىڭ ادىستەمەسى كوپ ءسوز بولدى. ەلەكتروندى جۇيەدەن دە اقاۋ شىقتى. زەينەتاقى جيناعىن پايدالانۋ بويىنشا العاشقى ۇسىنىستاردىڭ توڭىرەگىندە كەلىسپەۋشىلىك بولعان. ال رۋسلان دالەنوۆكە ماجىلىستە ءجيى سىنالاتىن.
"دالەنوۆتى عىلىمي-زەرتتەۋ سالاسىنا نەمەسە ەاەو جۇيەسىنە اۋىستىراتىن شىعار. ماسەلەن، ماسكەۋگە ەۋرازيالىق كوميسسياعا جىبەرۋى مۇمكىن", - دەپ اتاپ كورسەتتى ابىشەۆ.
ۇكىمەت قۇرامى تاعى وزگەرە مە
رۋسلان دالەنوۆتىڭ ورنىنا ۇلتتىق ەكونوميكا ۆيتسە-ءمينيسترى بولعان اسەت ەرعاليەۆ كەلدى. ول ۇكىمەتتەگى ەڭ جاس مينيستر. جاسى – 34-تە.
"ول جاس، لوندوندا جۇمىس ىستەگەن. مىقتى ەكونوميست، ءبىلىمى دە زامان تالابىنا ساي", - دەيدى ساياسي شولۋشى ابىشەۆ.
ونىڭ ويىنشا، بيىل ۇكىمەتتىڭ قۇرامى تاعى وزگەرۋى مۇمكىن.
"مەنىڭشە، اسقار مامين ازىرشە ءوز كومانداسىن ساقتاپ قالعىسى كەلىپ وتىر. قازىرگى جاعداي دا سولاي بولىپ تۇر. وعان مينيسترلەردى اۋىستىرعان ءتيىمسىز. تسوي (الەكسەي تسوي – دەنساۋلىق ساقتاۋ ءمينيسترى) جاقىندا عانا تاعايىندالعان. ايماعامبەتوۆ (اسحات ايماعامبەتوۆ - ءبىلىم جانە عىلىم ءمينيسترى) بولسا، ءوزىن جاقسى كورسەتە ءبىلدى. قالعانى بىرقالىپتى جۇمىس ىستەپ جاتىر. باسشىلىق تا سولاي باعالايتىن شىعار. بالكىم، جازدا وزگەرىس بولىپ قالادى", - دەيدى ابىشەۆ.
ال ساياساتتانۋشى سامات نۇرتازا مامين كومانداسىن ءبىر-بىرىمەن ويناۋعا توسەلگەن حوككەيشىلەرگە تەڭەدى. سول سەبەپتى مينيسترلەردىڭ باسىم بولىگى ءوز ورنىندا قالدى.
"اسىرەسە، پاندەميا كەزىندە وڭاي بولعان جوق. 2020 جىلى ءساۋىر-قىركۇيەك ايلارىندا وتە اۋىر بولدى. سول كەزدە مينيسترلەر كابينەتى ءوز جۇمىسىن تازا "تورتكە" ورىنداپ شىقتى. باسشىسى اۋىسقان ەكى مينيسترلىك وسى "توپتىڭ" ءالسىز بۋىنى بولعان سياقتى", - دەپ جازدى نۇرتازا Facebook پاراقشاسىندا.
ايتا كەتەيىك، بۇگىن ەكى جاڭا مينيستر حالىققا ادال قىزمەت ەتۋگە انت بەرىپ، رەسمي تۇردە ءوز جۇمىسىنا كىرىستى.
