Mäjılıs sailauynan keiın ükımettıŋ qūramy aitarlyqtai özgergen joq. Ministrlerdıŋ basym bölıgı öz ornyn saqtap qaldy. Eŋbek jäne halyqty äleumettık qorǧau ministrı bolǧan Bırjan Nūrymbetov men ūlttyq ekonomika ministrlıgın basqarǧan Ruslan Dälenov qana qyzmetten kettı.
Olardyŋ ornyna vise-ministrler keldı. Al syrtqy ıster ministrı Mūhtar Tıleuberdı premer-ministrdıŋ orynbasary qyzmetın qosa atqarady. Sputnik Qazaqstan tılşısıne sūqbat bergen saiasattanuşylar ükımettegı kadrlyq auys-tüiıstı tüsındırdı.
Ministr märtebesı köterıldı
Saiasattanuşy Daniiar Äşımbaevtyŋ aituynşa, syrtqy ıster ministrınıŋ märtebesın vise-premerge deiın köteru täjıribesı būryn da bolǧan.
"1999 jyly Qasym-Jomart Toqaev syrtqy ıster ministrı men vise-premer qyzmetın qatar atqarǧan. Sondyqtan prezident osy täjıribenı jaqsy bıledı. Sol kezde diplomatiialyq korpusty damytuǧa qatysty bıraz maŋyzdy şeşımder qabyldanǧan bolatyn. Al jaŋa prezidenttıŋ komandasynda syrtqy ıster jüiesınen kelgen mamandar az emes. Soŋǧy jyldary syrtqy ıster ministrlıgıne ekonomikalyq jäne investisiialyq sipattaǧy mındetterdı jükteuge tyrysqan. Osy täjıribe taǧy qaitalanatyn şyǧar", - deidı Äşımbaev.
Al saiasi şoluşy Ǧaziz Äbışev taǧy ekı ministrdı eske aldy. Olar da vise-premer qyzmetın qosa atqarǧan.
"Kezınde qarjy ministrı bolǧan Baqyt Sūltanovqa da vise-premer qyzmetı jüktelgen. İndustrializasiia qolǧa alynǧanda Äset İsekeşev vise-premer boldy. Tūtas bır baǧyttyŋ mındetı bır ministrge jüktelgende osyndai märtebe berıledı. Sebebı ol adam basqa vise-ministrlerdı şūǧyl şaqyryp, keŋes ötkızuı kerek. Vedomstvoaralyq jobalarǧa jetekışılık etedı. Bızde syrtqy ekonomikalyq baǧytty küşeitıp jatqan siiaqty", - dep atap körsettı Äbışev.
Sarapşynyŋ sözıne qaraǧanda, bügınde älemdık ekonomikany qalpynu keltıru men infeksiialyq qauıpsızdık aiasynda integrasiialyq jobalardy ıske asyrǧan maŋyzdy. Euraziialyq ekonomikalyq odaqpen, batys elderımen, körşı Qytaimen de tyǧyz qarym-qatynas jürgızu kerek. Sol sebeptı syrtqy ıster ministrın vise-premerge deiın köterıp otyr.
Ekı ministr nege kettı
Daniiar Äşımbaevtyŋ oiynşa, ministr qyzmetınen ketken ekı şeneunık - synǧa jiı ūşyraǧandar. Al ükımettıŋ qūramy qatty özgermeidı degen boljam äu basta bolǧan.
"Ruslan Dälenov ekonomikalyq "guru" bola almady. Tolyqqandy strategiia jasalǧan joq. Al ükımet tarapynan qolǧa alynǧan şaralardy jiı synǧa aldy. Bırjan Nūrymbetovty vedomstvonyŋ sapasyz jūmysy üşın aiyptaǧan. Oǧan qosa, tuǧan aǧasy jemqorlyqqa qatysy bar degen küdıkke ılındı", - deidı Äşımbaev.
Osy oraida sarapşy 42 500 teŋgenıŋ jyryn eske aldy. Sol kezde esep-qisaptyŋ ädıstemesı köp söz boldy. Elektrondy jüieden de aqau şyqty. Zeinetaqy jinaǧyn paidalanu boiynşa alǧaşqy ūsynystardyŋ töŋıregınde kelıspeuşılık bolǧan. Al Ruslan Dälenovke mäjılıste jiı synalatyn.
"Dälenovtı ǧylymi-zertteu salasyna nemese EAEO jüiesıne auystyratyn şyǧar. Mäselen, Mäskeuge Euraziialyq komissiiaǧa jıberuı mümkın", - dep atap körsettı Äbışev.
Ükımet qūramy taǧy özgere me
Ruslan Dälenovtyŋ ornyna ūlttyq ekonomika vise-ministrı bolǧan Äset Erǧaliev keldı. Ol ükımettegı eŋ jas ministr. Jasy – 34-te.
"Ol jas, Londonda jūmys ıstegen. Myqty ekonomist, bılımı de zaman talabyna sai", - deidı saiasi şoluşy Äbışev.
Onyŋ oiynşa, biyl ükımettıŋ qūramy taǧy özgeruı mümkın.
"Menıŋşe, Asqar Mamin äzırşe öz komandasyn saqtap qalǧysy kelıp otyr. Qazırgı jaǧdai da solai bolyp tūr. Oǧan ministrlerdı auystyrǧan tiımsız. Soi (Aleksei Soi – densaulyq saqtau ministrı) jaqynda ǧana taǧaiyndalǧan. Aimaǧambetov (Ashat Aimaǧambetov - bılım jäne ǧylym ministrı) bolsa, özın jaqsy körsete bıldı. Qalǧany bırqalypty jūmys ıstep jatyr. Basşylyq ta solai baǧalaityn şyǧar. Bälkım, jazda özgerıs bolyp qalady", - deidı Äbışev.
Al saiasattanuşy Samat Nūrtaza Mamin komandasyn bır-bırımen oinauǧa töselgen hokkeişılerge teŋedı. Sol sebeptı ministrlerdıŋ basym bölıgı öz ornynda qaldy.
"Äsırese, pandemiia kezınde oŋai bolǧan joq. 2020 jyly säuır-qyrküiek ailarynda öte auyr boldy. Sol kezde ministrler kabinetı öz jūmysyn taza "törtke" oryndap şyqty. Basşysy auysqan ekı ministrlık osy "toptyŋ" älsız buyny bolǧan siiaqty", - dep jazdy Nūrtaza Facebook paraqşasynda.
Aita keteiık, bügın ekı jaŋa ministr halyqqa adal qyzmet etuge ant berıp, resmi türde öz jūmysyna kırıstı.
Basqalarmen bölıse
otyryŋyz
